ލިވަޕޫލުން ދެއްކި ކުޅުމާާމެދު ކްލޮޕް ހުރީ ހިތްހަމަޖެހިފަައި

އިނގިރޭސި ޕްރިމިއާ ލީގުގައި މެންޗެސްޓަރ ޔުނައިޓެޑާ ދެކޮޅަށް ލިވަޕޫލްގެ ކުޅުންތެރިން ދެއްކި ކުޅުމާމެދު ހިތްހަމަޖެހޭ ކަމަށް އެ ޓީމުގެ ކޯޗު ޔާގަން ކްލޮޕް ބުނެފި އެވެ.

އޭނާ މިހެން ބުނީ، ޔުނައިޓެޑުގެ އަމިއްލަ ދަނޑުގައި އެ ޓީމާ ދެކޮޅަށް ކުޅުނު މެޗު އެއްވަރުވުމުންނެވެ. އެ މެޗު އެއްވަރުވީ 2-2 އިންނެވެ. މެޗުން މޮޅުވެ އެއް ވަނަ އަށް ޖެހިލަން ލިވަޕޫލަށް ފުރުސަތު އޮތް ނަމަވެސް، އެއްވަރުވުމުން އެ ޓީމު އޮތީ ދެ ވަނައިގަ އެވެ.

މެޗަށްފަހު ވާހަކަ ދައްކަމުން ކްލޮޕް ބުނީ، ލިވަޕޫލްގެ ކޯޗުކަމުގައި އޭނާ ހޭދަކުރި މުއްދަތުގައި، އެންމެ ފަހުން ޔުނައިޓެޑާ ދެކޮޅަށް ކުޅުނު ދެ މެޗުހާ ބޮޑަށް ޑޮމިނޭޓުކޮށްގެން ލިވަޕޫލް ކުޅުނު މެޗެއް ނުފެންނަ ކަމަށެވެ. އެހެން ނަމަވެސް، މެޗު އެމީހުން ބޭނުންވި ނަތީޖާއެއް ނުލިބުނު ކަމަށާއި، އެއްވަުރުވުމުން ވެސް ހިތްހަމަޖެހޭ ކަމުގައި ކްލޮޕް ބުންޏެވެ.

އިތުރަށް ވާހަކަ ދައްކަމުން ކްލޮޕް ބުނީ، ލިވަޕޫލުން މަސައްކަތް ކުރަމުން އަންނަނީ ކުރިއަށް ވިސްނައިގެން ކަމަށެވެ. އެހެންކަމުން ދެން މަސައްކަތް ކުރާނީ ކުރިއަށް ހުރި މެޗުތަކަށް ކަމަށާއި، ބޭނުން ވަނީ އެ މެޗުތަކުން ނަތީޖާ ރަނގަޅު ކުރުން ކަމަށް ވެސް އޭނާ ބުންޏެވެ. އެހެންކަމުން މެޗުގައި ހެދިފައިވާ ގޯސްތަކަށް، ފަރިތަކުރުންތަކުގައި ސަމާލުކަން ދޭނެ ކަމުގައި ވެސް އޭނާ ވަނީ ބުނެފަ އެވެ.

ލީގު ތާވަލްގެ ދެ ވަނައިގައި ލިވަޕޫލް އޮތީ މިހާތަނަށް ކުޅުނު 31 މެޗުން 71 ޕޮއިންޓު ހޯދައިގެންނެވެ. ހަމަ އެ އަދަދަށް މެޗު ކުޅެގެން އެއް ވަނައިގައި އޮތް އާސެނަލަށް ވެސް ލިބެނީ 71 ޕޮއިންޓެވެ. އެހެން ނަމަވެސް، އެ ޓީމު ކުރި ހޯދަނީ ލަނޑުގެ ތަފާތުންނެވެ.