ރައްޔިތުންގެ މަޖިލީހުގެ އިންތިހާބު ނުނިމެނީސް މި ސަރުކާރުން އެއްވެސް ކަމެއް ހާމައެއްނުކުރާނެ - ރައީސް ސާލިހު
ވެރިކަމަށް ވަޑައިގަންނަވަން ހެއްދެވީ ދޮގުކަން ގަބޫލުކުރާ ރައްޔިތުން ގިނަ
ކުރީގެ ރައީސް އިބްރާހީމް މުހައްމަދު ސާލިހު
ރައްޔިތުންގެ މަޖިލީހުގެ އިންތިހާބު ނުނިމެނީސް މި ސަރުކާރުން އެއްވެސް ކަމެއް ހާމައެއް ނުކުރާނެ ކަމަށާއި، ކޮށްފިކަމުގައިވާނަމަ އެ ވެގެންދާނީ ދޮގަކަށް ނުވަތަ އޮޅުވާލުމަކަށް ކަމަށް ކުރީގެ ރައީސް އިބްރާހީމް މުހައްމަދު ސާލިހު ވިދާޅުވެއްޖެއެވެ.
ބުރާސްފަތި ދުވަހުގެ ރޭ ކުރިއަށް ގެންދިޔަ އެމްޑީޕީ މިސްރާބު ހަމަމަގަށް ޖަލްސާގައި ވާހަކަފުޅުދައްކަވަމުން ރައީސް ސާލިހު ވިދާޅުވީ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަންނަވަން ވެވަޑައިގެންނެވި ވައުދުފުޅުތަކަކީ ބޮޑު ދޮގުތަކެއްކަން ރައްޔިތުންގެ ގިނަ ބަޔަކު ގަބޫލުކުރާކަމަށެވެ. އަދި މިކަމާ މެދު ޝައްކުކުރާ އެއްވެސް މީހަކު ވެސް ރާއްޖޭގައި ނެތް ކަމަށެވެ.
ރައީސް ސާލިހު ވިދާޅުވީ އަނެއްކާވެސް ކަންބޮޑުވެވަޑައިގަންނަވަނީ ކުރިއަށް އޮތް ރައްޔިތުންގެ މަޖިލީހުގެ އިންތިހާބު ކާމިޔާބު ކުރެއްވުމަށްޓަކައި ދޮގު މައްޗަށް ދޮގު ހައްދަވާ އޮޅުވާލަމުން ގެންދަވާތީ ކަމަށެވެ. އަދި އެކަން ހުއްޓުވެން ޖެހޭ ކަމަށާއި، ވެވަޑައިގެންނެވި ވައުދުފުޅުތަކައް ވީގޮތެއް ސާފުކޮށް ސުވާލުކުރެވެންޖެހޭ ކަމަށެވެ.
ރައީސް ސާލިހު ވިދާޅުވީ ސަރުކާރުގެ ސިޔާސީ މަގާމުތަކުގެ މައުލޫމާތު ސަރުކާރަށް ހާމަކުރަން ނުވެސް ކެރޭނެކަން ޔަގީންވެވަޑައިގަންނަވާ ކަމަށެވެ.
ރައީސް ސާލިހު ވިދާޅުވީ ކަންކަން ހާމަނުކުރަކަމުގައިވާނަމަ ރައްޔިތުންގެ މަޖިލީހުގެ ތެރެއިން ޖަވާބުދާރީކުރައްވާނެ ކަމަށެވެ. އަދި އަޅަންޖެހޭ ފިޔަވަޅު އަޅުއްވާނެ ކަމަށާއި، އެއީ ރައްޔިތުންގެ ހައްގުގައި ކުރަންޖެހޭ ކަމެއް ކަމަށެވެ.
މީގެއިތުރުން ޑިމޮކްރެޓިކް ނިޒާމެއްގެ ޕްރައިމަރީއެއްގައި ބައިވެރިވެ ޓިކެޓް ލިބުނު މީހާ ދުރުގައި ބަހައްޓާފައި ޓިކެޓް ދޭނީ ރައްޓެހި މީހާއަށް ނޫން ކަމަށާއި، އެއީ ޑިމޮކްރަސީ ހިނގާ ގޮތް ނޫން ކަމަށެވެ.
