މިއަދުން ފެށިގެން 35 އަހަރުން މަތީގެ މީހުންނަށް ވެސް ހިލޭ މެޑިކަލް ޗެކަޕް ހެއްދޭނެ: އާސަންދަ
1 އެޕްރީލު 2024 | ހޯމަ 09:27ސްކޫލު ދަރިވަރުން ހަދަންޖެހޭ ޚާއްސަ ޓެސްޓުތައްވެސް ސަރުކާރުގެ ހޮސްޕިޓަލްތައް މެދުވެރިކޮށް ހެއްދޭނެ
އައިޖީއެމްއެޗް ޑޮކްޓަރުން މަސައްކަތުގައި
އާސަންދަ ސްކީމުގެ ދަށުން އުމުރުން 35 އަހަރުން މަތީގެ ފަރާތްތަކަށް މެޑިކަލް ޗެކަޕް ހެދުމަށް ބޭނުންވާ ޕެކޭޖް ތައާރަަފްކޮށް، ސްކޫލުތަކުގެ ދަރިވަރުންނަށް 18 އަހަރުން ދަށުގެ އުމުރުފުރައަށް ޚާއްސަ ސްކޫލު ސްކްރީނިން ސަރުކާރުގެ ހޮސްޕިޓަލްތައް މެދުވެރިކޮށް ހެދޭނެ އިންތިޒާމް ހަމަޖައްސައިފިއެވެ.
އާސަންދައިން ބުނީ ދިވެހި ކޮންމެ ރައްޔިތަކަށް އާސަންދަ ސްކީމްގެ ދަށުން އަހަރަކު 2 ފަހަރު މެޑިކަލް ޗެކަޕް ހެދުމުގެ މަގުފަހިކޮށްދިނުމަށް އެކުލަވާލާ ތަންފީޒުކުރަން ފަށާފައިވާ ޚާއްސަ ސިޔާސަތުގެ ދަށުން 1 އޭޕްރީލް 2024 އިން ފެށިގެން އުމުރުން 32 އަހަރުން މަތީގެ ފަރާތްތަކަށް މެޑިކަލް ޗެކަޕް ހެދުމަށް ބޭނުންވާ ޕެކޭޖް ތައާރަފްކޮށްފައިވާ ކަމަށެވެ. އަދި މިނިސްޓްރީ އޮފް އެޑިޔުކޭޝަނުން ކަނޑައަޅާފައިވާ ގްރޭޑްތަކުގެ ސްކޫލު ދަރިވަރުން ހަދަންޖެހޭ ޚާއްސަ ޓެސްޓުތައްވެސް ސަރުކާރުގެ ހޮސްޕިޓަލްތައް މެދުވެރިކޮށް ހެދޭނެ އިންތިޒާމް ހަމަޖައްސާފައިވާ ކަމަށެވެ.
މީގެ އިތުރުން އާސަންދައިން ބުނީ 1 ޖެނުއަރީ 2024 ގައި ތައާރަފްކުރެވުނު މެޑިކަލް ޗެކަޕް ތަންފީޒުކުރުމުގައި ދިމާވި ބައެއް ދަތިތަކަށް ރިއާއަތްކޮށް އުމުރުފުރާތަކާއި ޕެކޭޖަށް ވަނީ ބަދަލު ގެނެވިފައިވާ ކަމަށެވެ.
އެގޮތުން 19 އަހަރުންމަތީގެ އުމުރުފުރާތަކަށް ޚާއްސަ ކުރެވިފައިވާ އަސާސީ ޕެކޭޖްތަކަށް ބަދަލުގެނެވިފައިވާ ކަމަށް އާސަންދައިން ބުނެއެވެ.
އާސަންދައިން ބުނީ 01 އޭޕްރީލުން ފެށިގެން އިތުރުކުރެވޭ އުމުރުފުރާއަކީ 35 އަހަރުން މަތީގެ އުމުރުފުރައިގެ އިތުރުން 40 އަހަރުން މަތީގެ އުމުރުފުރާތަކަށް ޚާއްސަކޮށް ދުރާލާ ކެންސަރު ބަލި ދެނެގަތުމަށް ހަދަންޖެހޭ ޓެސްޓުތައް އެކުލެވޭ ޕެކޭޖެއް ކަމަށެވެ.
ކެންސަރު ސްކްރީނިންގ ޓެސްޓުތަކުގެ ތެރެއިން ވަކި މުއްދަތެއްގެ ތެރޭގައި ކަނޑައަޅާފައިވާ ޓެސްޓުތައް ފިޔަވާ އެހެން ޓެސްޓުތައް ސްކީމްގެ ތެރެއިން އަހަރަކު އެއްފަހަރު ހެއްދޭނެއެވެ. އަދި ވަކި މުއްދަތެއްގެ ތެރޭގައި ހެދުމަށް ކަނޑައަޅާފައިވާ ޓެސްޓުތައް ވެސް ޑޮކްޓަރު ލަފާދެއްވައިފިނަމަ ސްކީމް ތެރެއިން ހެދޭނެ އިންތިޒާމް ހަމަޖެހިގެންދާނެ ކަމަށް އާސަންދައިން ބުނެއެވެ.
