އާސަންދައިން ބިލުތަކަށް ފައިސާ ނުދައްކާތީ ލަންކާ ހޮސްޕިޓަލްސް އިން އާސަންދައިގެ ހިދުމަތް ދިނުން މެދުކަނޑާލައިފި
2 އެޕްރީލު 2025 | ބުދަ 02:18ދިވެހިން ބޭސްފަރުވާގެ ޚިދުމަތް ހޯދަމުންގެންދާ ލަންކާ ހޮސްޕިޓަލްސް އިން ހުށައަޅާފައިވާ ބިލުތަކަށް ފައިސާ ނުދައްކާތީ އާސަންދައިގެ ޚިދުމަތް ވަގުތީ ގޮތުން ވަނީ މެދުކަނަޑާލާފައި
ކޮލަމްބޯގައި ހުންނަ ލަންކާ ހޮސްޕިޓަލްސް : ބިލު ތަކަށް ފައިސާ ނުދައްކާތީ އެތަނުން އާސަންދައިގެ ހިދުމަތް ދިނުން ވަނީ މެދުކަނޑާލާފަ
އާސަންދައިން ބިލުތަކަށް ފައިސާ ނުދައްކާތީ ގިނަ އަދަދެއްގެ ދިވެހިން ހިދުމަތް ހޯދާ ސްރީލަންކާގެ، ލަންކާ ހޮސްޕިޓަލްސް އިން އާސަންދައިގެ ދަށުން ހިދުމަތް ދިނުން މެދުކަނޑާލައިފި އެވެ.
ކޮލަމްބޯގައި ހުންނަ ލަންކާ ހޮސްޕިޓަލްސް އަށް ބޭސްފަރުވާ ހޯދުމަށް ދާ މީހުންނަށް އާސަންދަ ޚިދުމަތް ދިނުން މެދުކަނޑާލާފައި ވާއިރު، މިކަމާ ގުޅިގެން ރާއްޖެ އެމްވީ އިން ކުރި ސުވާލަށް ޖަވާބު ދެއްވަމުން އާސަންދައިގެ އެމްޑީ އައިމިނަތު ޒީނިޔާ ވިދާޅުވީ ގިނަ ދިވެހިން ބޭސްފަރުވާގެ ޚިދުމަތް ހޯދަމުންގެންދާ ލަންކާ ހޮސްޕިޓަލްސް އިން ބިލުތަކަށް ފައިސާ ނުދައްކާތީ އާސަންދައިގެ ޚިދުމަތް ވަގުތީ ގޮތުން މެދުކަނޑާލާފައި ވާކަމަށެވެ.
ޒީނިއާ ވިދާޅުވީ ފައިސާ ނުދައްކާ ގިނަ އަދަދެއްގެ އައުޓްސްޓޭންޑިންގ ބިލްތަކެއް ފޮނުވާފައި އެބަހުރި ކަމަށާއި އެކަމަށް ހައްލެއް ހޯދުމަށް މިހާރުވެސް މަސައްކަތް ކުރައްވަމުން ގެންދަވާކަމަށެވެ. ނަމަވެސް މިކަމަށް ނަގާނެ ވަކި މުއްދަތެއް އެނގިނުލައްވާ ކަމަށް ވެސް އޭނާ ވިދާޅުވިއެވެ.
އަޅުގަނޑުމެންނަށް އެމީހުން އެބައިން މެއިލްއެއް ކޮށްލާފަ. އައުޓްސްޓޭންޑިން ބިލްތަކެއް ހުރީމަ، އެމީހުން މިވަގުތު ކްރެޑިޓް އަށް ޚިދުމަތް ނުދޭނެ ކަމަށް ވިދާޅުވެފައި. ދެން އަޅުގަނޑުމެން މި މަސައްކަތް ކުރަނީ ވީހާވެސް އަވަހަކަށް އެކަން ހައްލު ކުރެވޭތޯ. މިހާރުވެސް މި ގެންދަނީ އެ މައްސައްކަތް ކުރަމުން .އާސަންދައިގެ އެމްޑީ އައިމިނަތު ޒީނިޔާ
ރާއްޖެ އެމްވީއަށް މައުލޫމާތު ލިބިފައިވާ ގޮތުގައި ލަންކާ ހޮސްޕިޓަލްސް އިން އާސަންދައިގެ ހިދުމަތް ދިނުން ހުއްޓާލީ އެތަކެއް މިލިއަން ރުފިޔާއެއް ގެ ބިލުތަކަށް ފައިސާ ނުދައްކާ ހުރުމުންނެވެ.
ލަންކާއަކީ ދިވެހިން ބޭސްފަރުވާގެ ޚިދުމަތް ހޯދުމަށް އެންމެ ގިނައި ދާ އެއް ގައުމެވެ. އެގޮތުން ބޭސްފަރުވާ ހޯދުމަށް އެ ގައުމުގައި ދިގު މުއްދަތަކަށް ދިރިއުޅޭ ދިވެހިން ވެސް ގިނަކަން ފާހަގަކޮށްލަން ޖެހެއެވެ.
ލަންކާގެ ހޮސްޕިޓަލަކުން އާސަންދަ ދިނުން ހުއްޓާލާފައިވާއިރު، މީގެ ކުރިން ދިވެހިންގެ ތެރެއިން ގިނަ ބަޔަކު ބޭސްފަރުވާ ހޯދަންދާ އިންޑިއާގެ މަނިޕާލް ހޮސްޕިޓަލުން ވެސް އާސަންދަ ދިނުން ވަނީ ހުއްޓާލާފަ އެވެ. އެކަމާއި ގުޅިގެން އޭރު އާސަންދައިން ބުނެފައިވަނީ އިންޑިއާގެ މަނިޕާލް ހޮސްޕިޓަލާ އެކު އޭރު އެއްބަސްވެފައިވާ އަގުތައް އެ ކުންފުނިން މުރާޖައާ ކުރަމުންދާތީވެ، އާސަންދަ ސްކީމުގެ ދަށުން އެ ހޮސްޕިޓަލަށް ބަލިމީހުން ފޮނުވުން މިވަގުތަށް ހުއްޓާލީ ކަމުގައެވެ.
ލަންކާގެ ހޮސްޕިޓަލަކުން އާސަންދަ ދިނުން ހުއްޓާލާފައިވާއިރު، ޔޫއޭއީ އާއި ތައިލެންޑުގެ ހޮސްޕިޓަލްތަކުން އާސަންދަ ހޯދައިދެއްވާނެ ކަމަށް ރައީސް ޑރ. މުހައްމަދު މުއިއްޒު ވަނީ މީގެ ކުރިން ވިދާޅުވެފަ އެވެ. ނަމަވެސް ޔޫއޭއީ އަދި ތައިލެންޑުން އާސަންދައިގެ ހިދުމަތް ލިބޭނެ ތާރީހު ސާފު ނޫން ކަމަށާއި، ދިރާސާ ކުރުމުގެ މަސައްކަތް ކުރަމުން އަންނަ ކަމަށް މިނިސްޓަރ އޮފް ސޯޝަލް އެންޑް ފެމިލީ ޑިވެލޮޕްމަންޓް ޑޮކްޓަރ ޢާއިޝަތު ޝިހާމް އޭރު ވަނީ ވިދާޅުވެފައެވެ. އޭގެ ފަހުން ވެސް މިއަދާއި ހަމައަށް ވެސް އެ ދެ ގައުމުން ސިއްހީ ހިދުމަތް ހޯދާ ފަރާތްތަކަށް އާސަންދަ ލިބުމުގައި ދަތިތަކެއް ހުރި ކަމަށް މައުލޫމާތު ލިބިފައިވެ އެވެ.
މި ސަރުކާރު ވެރިކަމަށް އައި ފަހުން އާސަންދައިގެ ހިންގުން ވަނީ ވަރަށް ބޮޑަށް ދޯދިޔާވެފަ އެވެ. އެގޮތުން ކުރިން އާސަންދައިގެ ދަށުން ލިބުނު ގިނަ ބޭސް މިހާރު ނުލިބޭކަމުގެ ޝަކުވާ ވެސް ވަނީ ބޮޑުވެފަ އެވެ. އޭގެ ތެރޭގައި ކެންސަރު އަދި ހަކުރު ބައްޔަށް ފަރުވާ ކުރާ މީހުން ދާއިމަށް ކާން ޖެހޭ ބައެއް ބޭސްތައް ހިމެނެ އެވެ.
މީގެ އިތުރުން ދިވެހިން ކުރިން ބޭނުން ކުރަމުން އައި ވަރަށް ގިނަ ބޭސްތަކެއް މިހާރު އާސަންދައިގެ ދަށުން ނުލިބޭ ކަމުގެ ޝަކުވާ ވަނީ ބޮޑުވެފައެވެ.
