މަޖިލިސް އިންތިޚާބާއި ގުޅޭ މައްސަލަތަކެއް އޭސީސީން ބަލަނީ
30 މާރިޗު 2024 | ހޮނިހިރު 08:42elections.acc.gov.mv/complain މެދުވެރިކޮށް މައްސަލަތައް އޭސީސީ އަށް ހުށަހެޅޭނެ
ފްލެޓުގެ މައްސަލަ: އޭސީސީއަށް އެއްވި އާއްމު ރައްޔިތުންނާއި ކޮމިޝަންގެ މެންބަރުން ބައްދަލެއް ނުކުރި
އަންނަ އޭޕްރިލް މަހު ބާއްވާ މަޖިލިސް އިންތިޚާބާއި ގުޅޭ މައްސަލަތަކެއް އޭސީސީން ބަލަން ފަށައިފިއެވެ.
އެނގިފައިވާ ގޮތުން އިންތިޚާބާއި ގުޅުން ހުރި 10 މައްސަލަ އެއް އެ އިދާރާ އަށް ވަނީ ހުށަހަޅާފައެވެ. އޭސީސީގެ އޮފިޝަލަކު ރާއްޖެ އެމްވީ އަށް ވިދާޅުވީ އިންތިޚާބާއި ގުޅުން ހުރި 8 މައްސަލަ އެއްގެ ތަހުގީގު މިހާރު ފަށާފައިވާ ކަމަށެވެ. މި އިންތިޚާބާއި ގުޅޭގޮތުން އެ އިދާރާއަށް ހުށަހަޅާފައިވާ މައްސަލަތަކަށް ބަލާއިރު އެންމެ ގިނައިން ހިމެނެނީ އިންތިޚާބު ދުވަސްވަރު ދައުލަތުގެ ވަސީލަތްތައް ބޭނުން ކޮށްގެން ކެމްޕޭނު ކުރުން ފަދަ މައްސަލަތައް ކަމަށް އޭނާ ވިދާޅުވިއެވެ. ހަމައެހެންމެ މަޖިލިސް އިންތިޚާބަށް ކެމްޕޭނު ކުރުމުގައި ރިޝްވަތު ހުށަހެޅުމުގެ އިތުރުން އިންތިހާބުގައި ވާދަކުރާ ކެންޑިޑޭޓުންގެ ހައްގަށް އުނިކަން ލިބޭ ގޮތަށް ކެމްޕޭނު ކުރާ ކަމަށް ތުހުމަތުކޮށް ހުށަހަޅާފައިވާ މައްސަލަތައް ވެސް ހިމެނޭ ކަމަށް އޭނާ ވިދާޅުވިއެވެ.
އިންތިޚާބާއި ގުޅޭ ކޮރަޕްޝަންގެ މައްސަލަތައް ހުށަހެޅުމަށް އެ އިދާރާއިން ބާރު އަޅައެވެ. އެގޮތުން އެފަދަ މައްސަލަތައް އިންތިހާބަށް ހާއްސަކޮށްފައިވާ ޕޯޓަލް elections.acc.gov.mv/complain މެދުވެރިކޮށް އޭސީސީ އަށް ހުށަހެޅޭނެކަމަށް އެ އިދާރާއިން ބުނެއެވެ.
