މަގޫދޫގެ އެއާޕޯޓް މަސައްކަތް ހުއްޓާލުމުން ރަށު ރައްޔިތުން މުޒާހަރާ އަށް
29 މާރިޗު 2024 | ހުކުރު 17:27ސިޔާސީ އަނިޔާކުރުން ހުއްޓާލުމަށް ވެސް އެއްވެފަިއވާ އާއްމުން ދަނީ ގޮވާލަމުން
މަގޫދޫގެ އެއާޕޯޓް މަސައްކަތް ހުއްޓާލުމުން ރަށު ރައްޔިތުން މުޒާހަރާ ކުރަނީ
ފ.މަގޫދޫގެ އެއާޕޯޓްގެ މަސައްކަތް ހުއްޓާލުމުން ރަށު ރައްޔިތުން މުޒާހަރާ އަށް ނުކުމެއްޖެއެވެ.
އެ ރަށު ކައުންސިލްގެ ނައިބު ރައީސް އަބްދުލް ހަމީދު ރާއްޖެ އެމްވީ އަށް ވިދާޅުވީ މުޒާހަރާ ކުރަން ފަށާފައި ވަނީ 21:30ގައި ކަމަށެވެ.
މަގޫދޫ އެއާޕޯޓަކީ ނިމިދިޔަ ސަރުކާރުން އަޅަން ފެށި އެއާޕޯޓެއް ކަމަށާއި އެ އެއާޕޯޓުގެ މަސައްކަތުގެ ބޮޑު އިންސައްތައެއް ނިމިފައިވާ ކަމަށް އޭނާ ވިދާޅުވިއެވެ. އެހެންނަމަވެސް އެ އެއާޕޯޓްގެ މަސައްކަތް ހުއްޓާލަން ނިމިދިޔަ ހަފްތާގެ ބުދަ ދުވަހު ރަސްމީކޮށް އަންގާފައިވާ ކަމަށް އޭނާ ވިދާޅުވިއެވެ. އަދި އެ މަސައްކަތް ހުއްޓާލުމުގެ ކުރިން ކައުންސިލާއި އެއްވެސް މަޝްވަރާ އެއް ވެސް ކޮށްފަ ނުވާތީ އޭނާ ވަނީ އެކަމުގެ ކަންބޮޑުވުން ފާޅުކުރައްވާފައެވެ. އޭނާ ވިދާޅުވީ އެއްވެފައިވާ އާއްމުންގެ ޑިމާންޑަކީ ވީ އެންމެ އަވަހަކަށް އެއާޕޯޓުގެ މަސައްކަތް ފެށުން ކަމަށެވެ.
އަދި އެއްވެފައިވާ މީހުންނަކީ ވަކި ސިޔާސީ ޕާޓީއަކަށް ނިސްބަތްވާތީ އެއްވި ބައެއްނޫން ކަމަށާއި އެ އެންމެން ވެސް އެދެނީ ރަށަށް ރަނގަޅު ގޮތްތަކެއް ވުމަށް ކަމަށް އޭނާ ވިދާޅުވިއެވެ. މީގެ އިތުރުން މިކަމަކީ ސިޔާސީ ބޭނުމަކަށް ކޮށްފައިވާ ކަމެއް ކަމަށް އޭނާ ވިދާޅުވިއެވެ. ސަރުކާރުން މަގޫދޫގެ އެއާޕޯޓްގެ މަސައްކަތް ހުއްޓާލީ މަޖިލިސް އިންތިޚާބުގައި ނިލަންދޫ ދާއިރާ އަށް ވާދަކުރައްވާ ރައީސް ޑރ.މުހައްމަދު މުއިއްޒުގެ ކޮއްކޯފުޅު ފާތިމަތު ސައުދާ އަށް އިންތިޚާބު ކާމިޔާބު ކުރުމުގެ ފުރުސަތު ބޮޑުކުރުމަށް ކަމަށް އޭނާ ވިދާޅުވިއެވެ.
ނިލަންދޫ އިން ޑިމާންޑްކުރަނީ ނިލަންދޫ އެއާޕޯޓުގެ މަސައްކަތް އަވަސްކުރުމަށް ކަމަށާއި ސަރުކާރުން އެ މަސައްކަތް ކުރުމަށް ހިނގާ ހިނގާ އޮތް މަޝްރޫޢު އެއް މަޑު ޖައްސާލުމަކީ ބަލައިގަނެވޭ ކަމެއް ނޫން ކަމަށް އޭނާ ވިދާޅުވިއެވެ. އެއްވެފައިވާ އާއްމުން ދަނީ މަގޫދޫ ރައްޔިތުންނަށް ދެމުންދަނީ އަނިޔާ އެއް ކަމަށް ސިފަކުރަމުންނެވެ. އަދި ސިޔާސީ އަނިޔާކުރުން ހުއްޓާލުމަށް ވެސް އެ ފަރާތްތަކުން ދަނީ ގޮވާލަމުންނެވެ.
