އިންޓަނެޓުގެ ޚިދުމަތް ދޭގޮތުގެ ފެންވަރު މޮނިޓަރކޮށް ބެލެހެއްޓުމާ ގުޅޭ ކޮންސަލްޓެންސީ ޚިދުމަތް ދޭނެ ފަރާތެއް ހޯދަނީ

ރާއްޖޭގެ އެކި ކަންކޮޅުތަކުގައި ބްރޯޑްބޭންޑް ޚިދުމަތް ދޭގޮތުގެ ފެންވަރު ދެމެހެއްޓެނިވި ގޮތެއްގައި މޮނިޓަރކޮށް ބެލެހެއްޓުމާ ގުޅޭ ކޮންސަލްޓެންސީ ޚިދުމަތް ދޭނެ ފަރާތެއް ހޯދުމަށް މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީން އިއުލާނުކޮށްފިއެވެ.

މިނިސްޓްރީން ކުރި އިއުލާނެއްގައި ބުނީ، މިނިސްޓްރީން ވޯލްޑް ބެންކްގެ ހިލޭ އެހީގެ ދަށުން ކުރިއަށްގެންދާ ޑިޖިޓަލް މޯލްޑިވްސް ފޮރ އެޑަޕްޓޭޝަން، ޑިސެންޓަރަލައިޒޭޝަން އެންޑް ޑައިވަރސިފިކޭޝަން (ޑީމެޑް) ޕްރޮޖެކްޓަށް ލިބިފައިވާ ފައިސާގެ ތެރެއިން ބައެއް ކޮންސަލްޓެންސީގެ ހިދުމަތް ހޯދުމަށް ހަރަދު ކުރުމަށް ހަމަޖެހިފައިވާ ކަމަށެވެ.

މިނިސްޓްރީން މައުލޫމާތު ދޭ ގޮތުގައި މި ކޮންސަލްޓެންސީއަކީ ކޮމިއުނިކޭޝަންސް އޮތޯރިޓީ އޮފް މޯލްޑިވިސް (ސީ.އޭ.އެމް) އަށް ބޭނުންވާ ފުރިހަމަ މޮނިޓަރިންގ އެންޑް ރިޕޯޓިންގ ފްރޭމްވޯކެއް ޤާއިމުކޮށް، އިންޓަރނެޓް ފޯރުކޮށްދޭ އުމްރާނީ ވަސީލަތްތަކާއި ޚިދުމަތްދޭ ފަރާތްތަކުން ހުށަހަޅާފައިވާ ގޮތަށް ޚިދުމަތް ފޯރުކޯށްދޭކަން ކަށަވަރުކުރުމެވެ.

މީގެ ތެރޭގައި ރާއްޖޭގެ އެކި ކަންކޮޅުތަކުގައި ބްރޯޑްބޭންޑް ޚިދުމަތް ދޭގޮތުގެ ފެންވަރު ދެމެހެއްޓެނިވި ގޮތެއްގައި މޮނިޓަރކޮށް ބެލެހެއްޓުމަށްޓަކައި، ބޭނުންވާ އާލާތްތަށް ދެނެގަތުމާއި، މިފަދަ އާލާތްތައް އޮޕަރޭޓްކުރުމަށް ބޭނުންވާ ތަމްރީނު ފޯރުކޮށްދިނުން ހިމެނޭކަމަށް މިނިސްޓްރީން ބުނެއެވެ.

މީގެ އިތުރުން ޓެލެކޮމިއުނިކޭޝަން އިންޑަސްޓްރީގައި އޯޕަން އެކްސެސްއާއި އިންސާފުވެރި ވާދަވެރިކަން ކުރިއެރުވުމަށް ބޭނުންވާ ރެގިއުލޭޓަރީ ފްރޭމްވޯކްތައް އެކުލަވާލުމާއި އަދާހަމަކުރުން މަސައްކަތުގައި ހިމެނެއެވެ.

އަދި ރެގިއުލޭޓް ކުރުމުގެ އިތުރުން މި ދާއިރާ ހަރުދަނާ ގޮތެއްގައި މޮނީޓަރކޮށް ބެލެހެއްޓުމަށްޓަކައި ސީ.އޭ.އެމްގެ މުވައްޒަފުންގެ ޤާބިލްކަން އިތުރުކުރުމަށްޓަކައި، މުވައްޒަފުންނަށް ބޭނުންވާ ކެޕޭސިޓީ ބިލްޑިންގް ޕްރޮގްރާމްތައް ދެނެގަތުންވެސްް ހިމެނެއެވެ.

މި މަސައްކަތް ކުރުމަށް ޝައުގުވެރިވާ ޝަރުތު ހަމަވާ ކޮންސަލްޓިންގ ފާރމްތަކަށް "އެކްސްޕްރެޝަން އޮފް އިންޓްރަސްޓް" ހުށަހެޅުމުގެ ފުރުޞަތު މިހާރު ވަނީ ހުޅުވާލާފައެވެ. އެގޮތުން ހުށަހެޅުމުގެ ސުންގަޑިއަކީ 2024 އޭޕްރިލް 25 ވަނަ ދުވަހު ގަޑިން 10:00 އެވެ.