ދަރުމަވެރި ޒުވާނުންތަކެއްގެ ވަރުގަދަ މެސެޖެއް، މުޅި ދުނިޔެއަށް!

ހިތްވަރާއި ސާބިތުކަމުގައިވެސް އެއީ ނަމޫނާއެކެވެ. މިންވަރަށް ޝުކުރުކޮށް، ލިބުނު އެއްޗަކުން ފުއްދާލައިގެން އުޅުމުގައިވެސް އެއީ ހަމަ ނަމޫނާއެކެވެ. އިންސާނީ ޙަޟާރާތު، އެތައް ގޮތަކުން ކުރިއަރާފައިވާ އަދުގެ ދުނިޔޭގައި، ބައެއްގެ މުށްދަށުވެ ގަތުލުވާން ޖެހުނު ކަމުގައި ވީ ނަމަވެސް ޣައްޒާގެ މަސްރަހުން މުޅިންވެސް ފެންނަނީ ހަމަ މި ދެންނެވި ފަދަ ސާބިތު ނަމޫނާ ދަރިންތަކެކެވެ. ކުޑައެއް ބޮޑެއް ކިޔާނެ ކަމެއް ނެތެވެ. ޒުވާނުންވެސް ހަމަ އެފަދައެވެ.

ޟަރޫރަތަކީ އީޖާދުގެ މަންމައޭ ބުނާނެ އެތައް މިސާލެއް ޣައްޒާއިން ދެއްކި ދާނެއެވެ. މިއީވެސް އެކަހަލަ މިސާލެކެވެ. ނިރުބަވެރި އިޒްރޭލުގެ ޢުދުވާންތަކުގައި މުޅި ޣައްޒާ ހަފުސްކޮށް، ޢާބާދީގެ އެންމެހެން މަގުމަތިކޮށްފައި ވާ ދަނޑިވަޅެއްގައި، ޣައްޒާގެ ޒުވާނުންގެ ޓީމަކުން ދަނީ އާދަޔާ ޚިލާފު މަސައްކަތެއް ކުރަމުންނެވެ. އެ މީހުންގެ މަސައްކަތަކީ، ޣައްޒާއަށް އެތެރެ ކުރެވޭ މަދު ކާބޯތަކެތިކޮޅު ބަންދުކޮށްފައި ހުންނަ ދަޅު ހުސްވުމުން، އެ ދަޅުތައް ބޭނުން ކޮށްގެން ގެދޮރު އެޅުމެވެ. ބޯހިޔާވަހިކަމެއް ހޯދައިދިނުމުގެ މަޤްޞަދުގައެވެ. އިންސާނީ ކާރިޘާއެއް އޭގެ އެންމެ ހިތްދަތި ފައްތަރަށް ވެއްޓި، ވަޞީލަތްތައް އިންތިހާއަށް ހީނަރުވެފައި ވާ ޣައްޒާގެ ޒުވާނުންނަށް މިއަދު ވަނީ، އެކިއެކި އީޖާދުތައް ކުރަން މަޖުބޫރުވެފައެވެ.

ޣައްޒާ ކޮންޓްރޯލް ކުރާ ޙަމާސް ޖަމާޢަތުގެ ވަސް، މި ބިންމަތިން ފޮހެލާނެ ކަމަށް ވަޢުދުވަމުން އިޒްރޭލުން ގަތުލުއާންމު ހިންގަން ފެށިފަހުން 5 މަސްދުވަސް ފާއިތުވެ، 6 ވަނަ މަހަކާ ދަނީ ގާތް ވަމުންނެވެ. ދީރް އަލް ބަލާހްގައި ގެދޮރު ގެއްލިފައި ވާ މީހުންނަށް ޚާއްޞަކޮށްފައި އޮންނަ އަލް ނަޚީލް ކޭމްޕުގެ މެދަކާ ހިސާބުގައި، ޒުވާނުންގެ ދަރުމަވެރި ގުރޫޕަކުން ވަނީ ކާބޯތަކެތި ބަންދުކުރާ ދަޅުތަކުން ކޮޓަރިއެއް އަޅާފައެވެ. ޒުވާނުންގެ ގުރޫޕުން މިހާރު ވަނީ އެ ކޮޓަރި، ޢާއިލާއަކަށް ހަދިޔާވެސް ކޮށްފައެވެ. އެ ޢާއިލާއަކީ އެއްވެސް ވަރެއްގެ ހިޔާވަހިކަމެއް ނެތި، މަގުމަތީގައި ދިރިއުޅެމުން ދިޔަ ޢާއިލާއެކެވެ.

ޒުވާން ދަރުމަވެރިންގެ ތެރޭގައި ހިމެނުނު އެކަކީ އާސިމް ކަރީމްއެވެ. އާސިމް ކިޔައިދިން ގޮތުގައި އެ ކޮޓަރީގެ މަސައްކަތަށް ބޭނުންވާ ދަޅުތައް އެއްކުރީ 2 ހަފުތާއެއްހާ ދުވަހުގެ ތެރޭގައެވެ. 3000 އަށް ވުރެ ގިނަ ދަޅު ބޭނުންކޮށްގެން އަޅާފައި ވާ އެ ކޮޓަރިން ފެންނަން ހުރި ބައެއް ބާވަތްތަކަށް ބަލާއިރު، އެއްގަމު މަސް، ފާވާ ބީންސް، ހަމަސް، އަދި ގްރީން ބީންސް ފަދަ ބާވަތްތައް ބަންދުކޮށްފައި ހުންނަ ދަޅުތައް ފާހަގަ ކުރެވެއެވެ. މި ބާވަތްތަކަކީ އިޒްރޭލުގެ ރަޙުމެއް ނެތް ވަކިތަކުގެ ތެރެއިން ޣައްޒާއަށް ފޯރާ ކާބޯތަކެތީގެ އެންމެ އަސާސީ މިންވަރުގެ ތެރޭގައި ހިމެނޭ ބާވަތްތަކެކެވެ.

މި އާދަޔާ ޚިލާފު ހިޔާވައްސަކީ، އެފަދަ އެތައް ހިޔާވައްސެއްގެ ފެށުން ކަމަށް ޒުވާނުންގެ ގުރޫޕުން ބުނެއެވެ. ބޯހިޔާވަހިކަން ހޯދައިދިނުމުގެ އިތުރަށް، މި ޙާލަތުގައިވެސް ތިމާވެށި ހިމާޔަތް ކުރުމަކީ ޒުވާނުންގެ މަޤްޞަދުތަކުގެ ތެރޭގައި ހިމެނޭ ކަމެކެވެ.

ޣައްޒާގެ ދެކުނުގެ ސިޓީއެއް ކަމަށްވާ ރަފަހުގެ އާބާދީ މިހާރު ވަނީ 1.5 މިލިއަނަށް ވުރެ މައްޗަށް އަރާފައެވެ. ގިނަ މީހުން ދިރިއުޅެމުންދާ ޓެންޓްތަކާއި މަގުތައް ތަޣައްޔަރު ވެފައި ވަނީ އެކި ޒާތްޒާތުގެ ކުނިބުނިންނެވެ. ޔަހޫދީން ދެމުންދާ ހަމަލާތަކުގެ ސަބަބުން އުފެދޭ ސަލާމަތީ ކަންބޮޑުވުންތަކާ ގުޅިގެން އެ ސިޓީގެ ސާފުކުރުމުގެ ހިދުމަތް އެކަށީގެންވާ މިންވަރަކަށް ކުރިއަކަށް ނުގެންދެވެއެވެ. ނަތީޖާއަކަށް ވީ، އިންތިހާ ބަލިމަޑުކަން ފެތުރެމުން ދިއުމެވެ.

ޣައްޒާގެ ސަރަހައްދުގައި ކުނި ޖަމާވުމުގެ ނުރައްކާ އިންޒާރު، އިންސާނީ ހައްގުތަކާއި ތިމާވެށީގެ ޖަމިއްޔާތަކުން ފާއިތުވި އަހަރުތަކުގައި ދީފައިވެ އެވެ. އިޒްރޭލުން ހިންގަން ފެށި ގަތުލުއާންމާއެކު ކުރިމަލާން ޖެހުނު ދަތިތަކާ އެކު ހާލަތު ގޯސްވީއެވެ. އެއްވެސް ހައްލެއް ފެންނަން ނެތް ދަރަޖައަކަށެވެ.