ސަރުކާރުން ވަޒީފާއިން ވަކިކުރާ އާއްމުންނަށް އެމްޑީޕީން ޤާނޫނީ އެހީތެރިކަން ފޯރުކޮށްދެނީ
މި މައްސަލަ ރައްޔިތުންގެ މަޖިލީހުގެ ކަމާއި ގުޅުން ހުރި ކޮމިޓީތަކަށް ވެސް ހުށަހަޅާނެ ކަމަށް އެމްޑީޕީގެ ބައެއް މެމްބަރުން ވަނީ މީގެ ކުރިން ބުނެފަ
އެމްޑީޕީގެ ދިދަ
ވަޒީފާއިން ވަކިކުރާ އާއްމުންނަށް މޯލްޑީވިއަން ޑިމޮކްރެޓިކް ޕާޓީ، އެމްޑީޕީގެ ޤާނޫނީ އެހީތެރިކަން ފޯރުކޮަށްދޭން ނިންމާފައިވާ ކަމަށް އެ ޕާޓީން ބުނެފިއެވެ.
އެ ޕާޓީން ބުނީ އެސް.އޯ.އީ ތަކުގައި މަސައްކަތް ކުރަމުންދާ ގިނަ މުވައްޒަފުން ވަޒީފާއިން ވަކިކޮށް، ވަޒީފާގެ ބިރު ދައްކަމުންދާކަމުގެ މަޢުލޫމާތު އެ ޕާޓީ އަށް އެކިއެކި ފަރާތްތަކުން މި ހިއްސާކުރަމުންދާ ކަމަށެވެ. އެހެންކަމުން މިފަދަ ކަމެއް އެއްވެސް އެސް.އޯ.އީ އެއްގައި ހިނގާނަމަ އެކަމާ ގުޅޭ އެންމެހާ މަޢުލޫމާތު އެ ޕާޓީއަށް އީމެއިލް މެދުވެރިކޮށް helpline@mdp.org.mv އަށް ހިއްސާކޮށްދިނުމަށް އެ ޕާޓީން ވަނީ އެދިފައެވެ. ހަމައެހެންމެ އެ ޕާޓީގެ ފަރާތުން ވަޒީފާއިން ކަނޑާލާ ފަރާތްތަކަށް ޤާނޫނީ ގޮތުން ފޯރުކޮށްދޭން ޖެހޭ އެހީތަރިކަން ފޯރުކޮށްދޭނެ ކަމަށް އެ ޕާޓީން ވަނީ ބުނެފައެވެ.
ކުރިއަށް އޮތް ރައްޔިތުންގެ މަޖިލީހަށް ނުރަނގަޅު ނުފޫޒު ފޯރުވުމަށް ސަރުކާރުން ކެނޑި ނޭޅި މަސައްކަތް ކުރަމުންދާ ކަމަށް އެމްޑީޕީން ދަނީ ބުނަމުންނެވެ. އެގޮތުން ނުފޫޒުގެ ބޭނުންކޮށްގެން ވަޒީފާ ދިނުމާއި، ވަޒީފާގެ ބިރުވެރިކަން އުފެއްދުން މި ސަރުކާރުގައި އިންތިހާ އަށް އިތުރުވެފައިވާ ކަމަށް އެ ޕާޓީން ބުނެއެވެ. ހަމައެެންމެ މިހިނގާ ރަމަޟާން މަހުވެސް އެތައް ބަޔަކު ވަޒީފާއިން ވަކިކުރަމުންދާތީ އެކަމުގެ ކަންބޮޑުވުން ވަނީ ހިއްސާކޮށްފައެވެ. މި މައްސަލަ ރައްޔިތުންގެ މަޖިލީހުގެ ކަމާއި ގުޅުން ހުރި ކޮމިޓީތަކަށް ވެސް ހުށަހަޅާނެ ކަމަށް އެމްޑީޕީގެ ބައެއް މެމްބަރުން ވަނީ މީގެ ކުރިން ބުނެފައެވެ.
