ބަޔާނުން އަލްފަންސޯ ޑޭވިސް އަށް އައު އެއްބަސްވުމެއް ހުށަހަޅައިފި

ޖަރުމަނުގެ ބަޔާން މިއުނިކަށް ކުޅެމުން އަންނަ ކެނެޑާގެ ޑިފެންޑަރު އަލްފަންސޯ ޑޭވިސް އަށް، އެ ކުލަބުގެ ފަރާތުން އައު އެއްބަސްވުމެއް ހުށަހަޅައިފި އެވެ.

އުމުރުން 23 އަހަރުގެ ޒުވާން ޑިފެންޑަރު ބަޔާނަށް ބަދަލުވީ 2019 ވަނަ އަހަރު އެވެ. އެ ކުލަބާއެކު އެންމެ ފަހުން އޭނާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ އަންނަ އަހަރުގެ ޖޫން މަހުގެ ނިޔަލަށެވެ. އެއްބަސްވުމުގައި ބާާކީ އެއް އަހަރު އޮތްއިރު، ބައެއް ކުލަބުތަކުން އޭނާ ހޯދުމުގެ ޝައުޤުވެރިކަން ގެންގުޅޭ ކަމަށް މީޑިއާ ތަކުން ވަނީ ރިޕޯޓުކޮށްފަ އެވެ.

އެކަމާ ގުޅޭ ގޮތުން ވާހަކަ ދައްކަވަމުން ބަޔާންގެ ޑައިރެކްޓަރު މެކްސް އެބާލް ވިދާޅުވީ، ބަޔާނުން ވަނީ ޑޭވިސް އަށް ވަރަށް ރަނގަޅު އަދި ވަރަށް މުހިންމު ހުށަހެޅުމެއް ހުށަހަޅާފައި ކަމަށެވެ. އިތުރަށް އެބާލް ވިދާޅުވީ، ދިރިއުޅުމުގައި އާނއެކޭ ނުވަތަ ނޫނެކޭ ބުނަން ޖެހޭ ޙާލަތްތައް ވެސް އަންނާނެ ކަމަށެވެ. ނަމަވެސް މިހާތަނަށް ޑޭވިސްގެ ފަރާތުން ވަކި ޖަވާބެއް ނުލިބޭ ކަމަށް ވެސް އޭނާ ބުންޏެވެ.

ޑޭވިސް ހޯދުމުގެ ޝައުޤުވެރިކަން ގެންގުޅޭ ކުލަބުތަކުގެ ތެރޭގައި ސްޕެއިންގެ ރެއާލް މެޑްރިޑު ހިމެނޭ ކަމަށް މީޑިއާ ތަކުން ވަނީ ރިޕޯޓުކޮށްފަ އެވެ. އެ ސުވާލު އަމާޒު ކުރުމުން އެބާލް ވިދާޅުވީ، ޑޭވިސްއާ ގުޅޭ އެއްވެސް ކަމެއްގައި މިހާތަނަށް ރެއާލްގެ ފަރާތުން ބަޔާނަށް ހުށަހެޅުމެއް ލިބިފައި ނެތް ކަމަށާއި، އެކަމުގެ މަޝްވަރާއެއް ވެސް ކުރިއަށް ނުގެންދާ ކަމަށެވެ.

ޑޭވިސް ވަނީ މިހާތަނަށް ބަޔާނަށް 182 މެޗު ކުޅެދީ ނުވަ ލަނޑު ޖަހައިފަ އެވެ. އެ ކުލަބާއެކު އޭނާ ވަނީ 13 ތައްޓެއް ކާމިޔާބު ކޮށްފަ އެވެ. މިހާރު ކުރިއަށްދާ ސީޒަންގައި ވެސް އޭނާ އަކީ ބަޔާންގައި މުހިންމު ކުޅުންތެރިޔެކެވެ.