މުލަ ރޯދަ ދުވަސް ޣައްޒާއިން: ހާރު ނުކެވުނުތާ، ރޯދަ ވީއްލޭނެ ގޮތެއްވެސް ނެތް!

ކޮންމެ އަހަރަކުވެސް ރަމަޟާން މަހާ ދިމާކޮށް ގޭތެރެ ޒީނަތްތެރި ކުރުމަކީ ފިދާ ޙާމިދު ޤަވައިދުން ކޮށް އުޅުނު ކަމެކެވެ. ރޯދަ ވީއްލާ ވަގުތަށް ޚާއްޞަކޮށްގެން، ވީ ވަރަކުން އެކި ބާވަތްބާވަތުގެ ކާބޯތަކެތި ތައްޔާރު ކުރެއެވެ. މި އަހަރު ފިޔަވައެވެ. ނިރުބަވެރި އިޒްރޭލުން ހިންގަމުންދާ ވަރުގަދަ ޤަތުލުޢާންމުގައި ގެދޮރު ގެއްލި، ފިދާގެ ޢާއިލާ މިއަދު ދިރިއުޅެމުން ދަނީ ވަގުތީ ހިޔާވައްސެއްގައެވެ. ފިދާ ނިސްބަތް ވަނީ ޚާން ޔޫނިސްއަށެވެ. މިއަދު އެ ޢާއިލާއަކީ ޣައްޒާގެ އެންމެ ދެކުނުގައި ތޮއްޖެހިފައިވާ ދޮޅު މިލިއަނަށް ވުރެ ގިނަ މީހުންގެ ތެރޭގައި ގުނާލެވޭ ބައެކެވެ.

ހިނގަމުން މިދާ 1445 ވަނަ އަހަރުގެ ރަމަޟާން މަހަކީ ފިދާއާއި އޭނާގެ ޢާއިލާއަށް ތަފާތު ދުވަސްތަކެކެވެ. ދިރިއުޅެން ޖެހިފައި އޮތީ އެތައް ބަޔަކު ފިތިބާރުވެފައިވާ ކޭމްޕެއްގައެވެ. ކިރިޔަކިރިޔާ ބޯ ހިޔާ ކޮށްލެވޭ ފަދަ ޓެންޓެއްގައެވެ. ކާބޯތަކެއްޗާއި، ގައްގާ ގޭހާއި، ބޭސް ލިބުން އިންތިހާއަށް ދައްޗެވެ.

ރަމަޟާން މަހުގެ ފުރަތަމަ ދުވަހު ރޯދައަށް ހުރުމަށްޓަކައި ސުހޫރު ނުވަތަ ހާރުވެސް ކެއްކޭނެ ފަދައެއް ފިދާއަކަށް ނެތެވެ. ކައްކާނެ ގޭހެއް ނެތެވެ. ބޭރުގައި ހުޅުޖަހައިގެން ކައްކާލެވޭ ވަރަށް ވުރެ ފިނި ގަދައެވެ.

ސުހޫރަށް ކައްކާލެވޭނެ ފަދައެއް ނެތް އިރު، ފުރަތަމަ ދުވަހު ރޯދަވީއްލަން އެއްޗެއް ހަދާނެ ގޮތެއްވެސް ނެތެވެ. ހުރިހާ އެއްޗެއްގެ އަގު އުފުލިފައި ވަނީ އަތް ނުފޯރާ ހިސާބަށެވެ. މޭވާއާއި ތަރުކާރީގެ އަގުތައްވެސް އެހާމެ ބޮޑެވެ. އެއީ ފިދާގެ އެކަނި ޝަކުވާއެއް ނޫނެވެ. ޣައްޒާގެ މުޅި ޢާބާދީއަށް ހެން ކުރަން ޖެހިފައި އޮތް ޝަކުވާއަކީ އެއީއެވެ.

މި ދުވަސްވަރަކީ ޙަމަލާތައް މަޑުޖައްސާލުމުގެ މަޝްވަރާތައް ކުރިއަށް ދާ ދުވަސްވަރެވެ. ފިދާމެންގެ އުންމީދަކީ ވަގުތީ އެއްބަސްވުމެއްގެ ބަދަލުގައި، ދާއިމަށް ޙަމަލާތައް ހުއްޓާލުމެވެ. އަމިއްލަ ގެދޮރަށް ގޮސް، ރަމަޟާން މަހުގެ ރޫޙު ދިރުވާ އާލާ ކުރުމެވެ.

މި ފެށުނު ރަމަޟާން މަހަކީ ޣައްޒާގެ ރަށްވެހިން ދުށް އެންމެ ހިތްދަތި ރަމަޟާން މަހެވެ. ދޮށީ ޢުމުރުގެ މީހުންގެ ފަރާތުންވެސް އިވުނީ ހަމަ އެ އަޑެވެ.