މި ސަރުކާރުން މަސައްކަތްކުރަނީ ރައީސް މުއިއްޒު ބޭނުންފުޅުވާ ބަޔަކަށް ގޯތިތައް ދިނުމަށް: އަކްރަމް
ބިންވެރިން ތިބީ ވާނުވާގައި
ޕްލޭނިންގ މިނިސްޓްރީގެ ކުރީގެ ސްޓޭޓް މިނިސްޓަރު، އަކްރަމް ކަމާލުއްދީން
މި ސަރުކާރުން މަސައްކަތްކުރަނީ ބިންވެރިޔާ ސްކީމްގެ ދަށުން ގޯތިތައް ލިބިފައިވާ މީހުންގެ ގޯތިތައް އަތުލައި، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބޭނުންފުޅުވާ ބަޔަކަށް އެ ގޯތިތައް ދިނުމަށް ކަމަށް، ޕްލޭނިންގ މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެއެވެ.
އަކްރަމް މިހެން ވިދާޅުވީ ބިންވެރިޔާ އަދި ގެދޮރުވެރިޔާ ސްކީމާގުޅޭ 5 މެންބަރުންގެ ހައުސިންގ ކޮމިޓީއެއް އެކުލަވާލައި އެކަން އާއްމުކުރުމާ ގުޅިގެންނެވެ.
އަކްރަމް ވިދާޅުވީ، ބިންވެރިޔާ ސްކީމުގެ ދަށުން ގޯތި ލިބޭނެކަމަށް ސަރުކާރު ގެޒެޓުގައި ޝާއިއުކޮށްފައިވާ ފަރާތްތަކަށް އެ ގޯތި ހަވާލުކުރުމަކީ ލާޒިމު ކަމެއް ކަމަށެވެ.
ސަރުކާރު ބަދަލުވުމާއެކު ގޯތި ހަވާލުކުރުމުގެ ޕްރޮގްރާމް ހުއްޓައިލިކަމަށާއި، އެތައް ބިންވެރިންނެއް މިނިސްޓްރީ އޮފް ހައުސިންގ ލޭންޑް އެންޑް އަރބަން ޑިވެލޮޕްމަންޓަށް ގޮސް ވާނުވާ ބަލަމުންދިޔައިރު، އެކި ފަހަރު އެމީހުން ދިނީ އެކި ޖަވާބު ކަމަށް އަކްރަމް ވިދާޅުވިއެވެ. އަދި ވިދާޅުވީ ބިންވެރިން ތިބީ ވާނުވާގައި ކަމަށެވެ.
މީގެ އިތުރުން ރައީސް މުއިއްޒު ވިދާޅުވިގޮތާ ޚިލާފަށް އެމަނިކުފާނުގެ ދޮގު ދޮލަނގު ޕްރޮގްރާމް ހިންގަވަން ފައްޓަވާފައި ވާކަމަށް އަކްރަމް ތުހުމަތުކުރެއްވިއެވެ.
ޕޯޓަލަށް އިޝާރާތްކުރައްވައި އަކްރަމް ވިދާޅުވީ، ރަޖިސްޓްރީ ހަވާލުކުރަމުން ދަނީ ޕޯޓަލް މެދުވެރިކޮށް އެޕޮއިންޓްމަންޓް ހައްދައިގެން ކަމަށާއި، އެ ޕޯޓަލަށް ވަނުމަށް ބިންވެރިންނަށް ވަރަށް ތަކުލީފު އުފުލަންޖެހޭ ކަމަށެވެ. އެޕޮއިންޓްމަންޓް ހެއްދުމަށް ދެނީ ވެސް ވަކި މުހުލަތެއް ކަމަށާއި، އެޕޮއިންޓްމެންޓް ނުލިބޭ މީހުން ނުވަތަ އެކަމަށް ނޭދެވުނު މީހާއަށް ވާންވީ ގޮތް ނޭނގޭކަމަށް އަކްރަމް ވިދާޅުވިއެވެ.
އަކްރަމް ވިދާޅުވީ މި ގޮތަކަށް މިކަން ނުކުރެވޭނެ ކަމަށާއި، ރައްޔިތުންގެ އަޑު އުފުލާނެ ކަމަށެވެ. އަދި މިނިސްޓްރީ ސާފުކޮށް ވާންވީ ގޮތް ނުބުނެ، ހާމަނުކުރަނީ ނާންނަ މީހުންގެ ގޯތިތައް އަތުލައި، ރައީސް މުއިއްޒު ބޭނުންފުޅުވާ ބަޔަކަށް ގޯތިތައް ބަހައިލުމަށް ކަމަށް އަކްރަމް ތުހުމަތުކުރެއްވިއެވެ.
ބިންވެރިޔާ ސްކީމުގެ ދަށުން، ކުރީ ސަރުކާރުން އާންމުންނަށް ދީފައިވާ ގޯއްޗެއް އަތުނުލައްވާނެ ކަމަށާއި، އެހެންނަމަވެސް ގޯތި ދީފައިވާ ސަރަހައްދުތައް ބަދަލުވެދާނެ ކަމަށް އައު ސަރުކާރުގެ ހައުސިންގ މިނިސްޓަރު، ޑރ. އަލީ ހައިދަރު ވަނީ ވިދާޅުވެފައެވެ. އެކަމުގައި ސަރުކާރުން އެކި ފަހަރު އެކި ގޮތަށް ވާހަކަ ދައްކާކަމަށް ބުނެ، ބައެއް ފަރާތްތަކުން ގެންދަނީ ކަންބޮޑުވުން ފާޅުކުރަމުންނެވެ.
ރައީސް ސާލިހުގެ ސަރުކާރުގައި ބިންވެރިޔާ ސްކީމުގެ ދަށުން ޝަރުތު ހަމަވި 19639 މީހުންނަށް ގޯތި ލިބެއެވެ. އެއީ ހުޅުމާލެއިން 1351 ބިން، ގުޅީފަޅުން 2218 ބިން އަދި ގިރާވަރު ފަޅުން 5432 ބިމެވެ. އެއީ ޖުމްލަ 9001 ގޯއްޗެވެ.
