"ގިނަ ފަހަރަށް ކަދުރު ވިއްކަނީ ނު އަގުގަ"

ރަމަޟާން މަހަކީ އަހަރެމެން މުސްލިމުންގެ ކެއިންބުއިމުގެ އާދަތަކަށް ބޮޑު ބަދަލެއް އަންނަ ދުވަސްވަރެކެވެ. ކާބޯތަކެތީގެ ބާޒާރަށް ނަޒަރު ހިންގާއިރު، ރަމަޟާން މަހާ ދިމާކޮށް އެ ބާވަތަކަށް އެންމެ ގިނަ ބަޔަކު ޑިމާންޑް ކުރާ އެކައްޗަކަށް ވެފައި އޮންނަނީ ކަދުރެވެ. ހިނގަމުން މިދާ 1445 ވަނަ އަހަރުގެ ރަމަޟާން މަހާ މުސްލިމު އުއްމަތް ބައްދަލު ކުރާ މި ދަނޑިވަޅަކީ މެދުއިރުމަތީގެ މަސްރަޙު އިންތިހާއަށް ހަލަބޮލިވެ، ހާސްކަމާއި ނުތަނަވަސްކަން އުފެދިފައިވާ ދަނޑިވަޅެކެވެ. ދުނިޔޭގެ ބާޒާރުތަކުގައި ތަކެތީގެ އަގުތައް، އޭގެ އެންމެ އިންތިހާއަށް އުފުލިފައި ވާ ދަނޑިވަޅެކެވެ. މިޞްރުގެ ކަދުރު ބާޒާރުންވެސް ފެންނަނީ ހަމަ އެ މަންޒަރެވެ. އިވެނީ ހަމަ އެ އަޑުތަކެވެ.

މިޞްރުގެ ބާޒާރުތަކުގައި ކަދުރުގެ އަގު ބޮޑުވެފައި ވާ އިރު، އެ ޤައުމުގެ އެތައް ބަޔަކަށް ވަނީ ކަދުރު ގަތުމުގައި ބޮޑެތި ގޮންޖެހުންތަކާ ކުރިމަތިލާން ޖެހިފައެވެ. ކަދުރަކީ ރަމަޟާން މަހުގެ ސުފުރާ މަތީގައި އެންމެ ތިޔާގި އެއް ބާވަތަށް ވީ ނަމަވެސް، އަދުގެ ޙާލަތު ވަނީ ވަރަށް ބޮޑަށް ބަދަލުވެފައެވެ.

މިޞްރުގެ ވެރިކަން ކުރާ ޤާޚިރާގައި ކުރިއަށް ގެންދާ ކަދުރު ފެސްޓިވަލުގެ މިއަހަރުގެ ހަރަކާތް ކުރިއަށް ގެންދިޔައީ ފެބުރުއަރީ 28 އިން މަރޗް 5 ވަނަ ދުވަހުގެ ނިޔަލަށެވެ. ފެސްޓިވަލަށް ވިޔަފާރި ކުރަން ދިޔަ ގިނަ ބަޔަކު ވަނީ، އުފުލެމުން ދާ އަގުތަކާ މެދު ކަންބޮޑުވުން ފާޅު ކޮށްފައެވެ. އަދި މި ފަހަރު ކަދުރު ގަންނަ މިންވަރު މަދު ކޮށްފައި ވާނެ ކަމަށްވެސް އެމީހުން ބުނެއެވެ.

މިދިޔަ 2 އަހަރެއްހާ ދުވަހަކީ މިޞްރުގެ ބާޒާރުތަކުގައި، ޟަރޫރީ ކާބޯތަކެތީގެ އަގުތައް އިންތިހާއަށް އުފުލެމުން ދިޔަ ދުވަސްތަކެކެވެ. މިދިޔަ ސެޕްޓެމްބަރު މަހަކީ އަގުތައް އުފުލުމުގެ ރެކޯޑެކެވެ. މިޞްރުގެ ބާޒާރުތަކުގައި ތަކެތީގެ އަގުތައް އުފުލުނު ނިސްބަތް ނުވަތަ އިންފްލޭޝަން ރޭޓް ވަނީ 38 ޕަސެންޓަށް އަރާފައެވެ. އިޤްތިޞާދީ ކުރިއެރުމުގެ ދުވެލި އޮތީ މަޑުޖެހިފައެވެ. ދިރިއުޅުމުގެ ފެންވަރު އިންތިހާއަށް ދަށަށް ގޮސްފައި ވާ ކަމުގެ ޝަކުވާގެ އަޑު ކަނޑައިގެން ނުދާ ފަދައެވެ.

ހުސްވި ހަފުތާގައި މިޞްރުން ވަނީ ބައިނަލްއަޤުވާމީ މާލީ އިދާރާ (އައިއެމްއެފް) މެދުވެރިކޮށް ހޯދާ އެހީގެ މިންވަރު، 8 ބިލިއަން ޑޮލަރަށް އިތުރު ކުރާ އެއްބަސްވުމެއް އެކުލަވާލާފައެވެ. އެއްބަސްވުން އެކުލަވާލީ، މިޞްރު ފައިސާގައި އެޅިފައި އޮތް ކަސްތޮޅު ނައްޓާ، 600 ބޭސިސް ޕޮއިންޓަށް ރޭޓް މަތިކުރުމަށް މިޞްރުގެ މަރުކަޒީ ބޭންކުން ނިންމިތާ ގަޑިއިރުތަކެއް ފަހުންނެވެ. މަރުކަޒީ ބޭންކުގެ ނިންމުމަކީ އިޤްތިޞާދު ހަމަ މަގަކަށް އެޅުވުމުގެ މަޤްޞަދުގައި ނިންމުމެކެވެ.

މިޞްރު ފައިސާގެ އަގު ވަނީ ރެކޯޑް މިންވަރަކަށް ދަށްވެފައެވެ. ޑޮލަރަށް 49.5 މިޞްރު ޕައުންޑްގެ ރޭޓަށް ވެއްޓިފައެވެ. ކުރީގެ ރެކޯޑްތަކަށް ބަލާއިރު ޑޮލަރަކަށް ޖެހިފައިވާ އެންމެ ދަށް ރޭޓަކީ 30.85 މިޞްރު ޕައުންޑެވެ. އެއީ އެ ރޭޓެއް ދިފާޢު ކުރުމަށް މިޞްރުން އެތައް މަހެއް ވަންދެން މަސައްކަތް ކުރި ރޭޓެކެވެ.

އިޤްތިޞާދެއްގެ ބިންގާ ގުޑުގުޑު އަޅަން ހިސާބުން، އެތަނެއްގައި ކަޅުބާޒާރެއް އުފެދި ނިދިއުން ނާދިރެވެ. މިޞްރުގައިވެސް ކަން އޮތީ އެކަހަލަ ގޮތަކަށެވެ. ރަމަޟާން މަހާ ދިމާކޮށް، ގިނަ ބާވަތްތަކެއް އަގު ބޮޑު ކޮށްފައި ވަނީ އިންތިހާއަށެވެ. ކަޅުބާޒާރެއް އުފުދިފައި އޮތުމުގެ ސަބަބުން، ޑޮލަރަކަށް 60 އާއި 70 ދެމެދު ޢަދަދަކަށް މިޞްރު ޕައުންޑު ޚަރަދުކޮށްގެން ނޫނީ އެއްޗެއް ގަނެވޭ ނުވެފައިވެސް އެބަ ހުއްޓެވެ.

މިޞްރު ފައިސާގެ އަގު ދަށް ކުރި ކުރުމުގެ އަސަރުތައް އަދި އޮތީ ފެންނަން ކަމަށާ، ކުރިއަށް އޮތް ދުވަސްތަކުގައި އެކަމަކު އަސަރުތައް ފެންނަން ފަށާނެކަން، އެނަލިސްޓުން ވަނީ ލަފާކޮށްފައެވެ.