ޔޫއޭފާގެ އަދަބު ބަޔާން މިއުނިކަށް، ދެން ސަޕޯޓަރުން ނުވެއްދޭނެ

ސަޕޯޓަރުން ގަވާއިދާ ހިލާފުވުމުގެ ސަބަބުން ޔޫރަޕުގެ ފުޓްބޯޅަ ޖަމިއްޔާ ޔޫއޭފާއިން ކަނޑައެޅި އަދަބު ޖަރުމަނުގެ ބަޔާން މިއުނިކުން ގަބޫލުކޮށްފިއެވެ.

ޔޫއޭފާއިން ބަޔާނަށް އަންގާފައިވަނީ ކުރިއަށް އޮތް ޗެމްޕިއަންސް ލީގު ފުޓްބޯޅަ މުބާރާތުގައި ބަޔާން މިއުނިކް ރަށުން ބޭރުގައި ކުޅޭ މެޗަށް ސަޕޯޓަރުން ނުވެއްދޭނެ ކަމަށެވެ.

ޔޫއޭފާއިން މި ގޮތަށް ނިންމީ ގަދަ 16ގައި ލާޒިއޯއާ ދެކޮޅަށް ބަޔާން ކުޅުނު މެޗުގައި ސަޕޯޓަރުން ދަނޑުގައި ބަޑިބޭހުގެ އާލާތްތައް ބޭނުންކޮށް ދަނޑަށް ހަވާ އުކުމުގެ ސަބަބުންނެވެ.

ބަޔާންއިން ވަނީ ސަޕޯޓަރުން ތަކުރާރުކޮށް ޗެމްޕިއަންސް ލީގުގައި މި އަމަލު ހިންގުން ސަބަބަކަށް ދައްކައި ޔޫއޭފާއިން ދިން އަދަބު ގަބޫލުކޮށްފަ އެވެ.

ބަޔާންގެ ސީއީއޯ ޖޭން ކްރިސްޓިއަން ޑްރީސަން ބުނީ ދަނޑަށް އަލިފާން ހިފާފާނެ ގޮތަކަށް ހަވާ އުކުމަކީ ގަބޫލުކުރެވޭނެ ކަމެއްނޫން ކަމަށާއި މިއަމަލުގެ ސަބަބުން މިއަދަބު އިސްތިއުނާފުވެސް ނުކުރެވޭނެ ކަމަށެވެ.

ކުއާޓާ ފައިނަލުގައި ބަޔާން ކުޅެންޖެހޭ ޓީމެއް އެނގޭނީ ހުކުރު ދުވަހު ހަވީރު އޮންނަ ގުރު ނެގުމުގެ ރަސްމިއްޔާތުގަ އެވެ.