ލިވަޕޫލްގެ ލުއިޒް ޑިއާޒް ގަތުމަށް ސްޕޭނުގެ ބާސެލޯނާއިން ޝައުގުވެރިވުމުން އެކަން ނުކުރެވޭނެ ފަދަ އަގެއް ލިވަޕޫލުން ކަނޑައަޅައިފި އެވެ.

ކޮލަމްބިއާގެ ފޯވަޑް ޑިއާޒް ވިއްކަން ލިވަޕޫލުން ހަމަޖައްސާ އަގަކީ 140 މިލިއަން ޔޫރޯ ކަމަށް ކޮލަމްބިއާގެ ނޫސްތަކުން ބުނެ އެވެ. މިގޮތަށް މިކަންކުރީ ބާސެލޯނާގެ ރައީސް ހުއާން ލަޕޯޓާ ޑިއާޒްގެ އެޖެންޓާއެކު މަޝްވަރާ ބައްދަލުވުމެއް ބޭއްވި ކަމަށް ކޮލަމްބިއާގެ ނޫސްތަކުން ބުނަމުންދަނިކޮށެވެ.

2022 ވަނަ އަހަރު ލިވަޕޫލުން، ޑިއާޒް ގަތީ ޕޯޓޯ އަށް 46 މިލިއަން ޔޫރޯ ދީފަ އެވެ. އޭނާ އަންނަނީ ލިވަޕޫލްގައި މޮޅު ކުޅުމެއް ދައްކަމުންނެވެ. ނަމަވެސް ލިވަޕޫލަށް އޮތް ނުތަނަވަސްކަމަކީ ކޯޗު ޔާގެން ކްލޮޕް މި ސީޒަނަށް ފަހު ޓީމާ ވަކިވުމުން ގިނަ ކުޅުންތެރިންތަކެއް އޭނާގެ ފަހަތުން ކުލަބު ދޫކުރަން ވިސްނަފާނެތީ އެވެ. އަނެއް ސަބަބަކީ ޑިއާޒް ބާސެލޯނާ އަށް ކުޅެން ލޯބިކުރާ ކަމަށާއި އެއީ އޭނާގެ ހުވަފަނެއް ކަމަށް ކުޅުންތެރިޔާގެ ބައްޕަ ބުނެފައިވުމެވެ.

ޑިއާޒަކީ ލިވަޕޫލްގައި މި ސީޒަނުގައި އެންމެ މޮޅަށް ކުޅެމުން އަންނަ އެއް ކުޅުންތެރިޔާ އެވެ. ބާސެލޯނާއިން އޭނާއަށް ޝައުގުވެރިވަނީ އޭނާ އަކީ އެކުލަބުގެ ކުޅޭ ސްޓައިލަށް ހުރިހާ ގޮތަކުން ފެތޭ ކުޅުންތެރިއެއް ކަމަށް ބުނެ އެވެ.

ނަމަވެސް ބާސެލޯނާ އޮތީ މާލީ ގޮތުން ވަރަށް ދަށު ދަރަޖައެއްގައި ކަމުން އެންމެ ކުޅުންތެރިއަކަށް މިހާރު 100 މިލިއަން ޔޫރޯ ހޭދަކުރުމަކީ އެކުލަބަށް ކުރެވޭނެ ކަމެއްނޫނެވެ. ނަމަވެސް ލިވަޕޫލުން މިކަމުގައި އަމަލުކޮށްފައިވަނީ އެކުލަބުގެ ތަރިއެއްގެ ގޮތުގައި ހުއްޓައި ބްރެޒިލްގެ ފިލިޕޭ ކުޓީނިއޯ 150 މިލިއަން ޔޫރޯ އަށް ބާސެލޯނާ އަށް ގެންގޮސްފައިވާތީވެ އެކަމަށް ރިއާޔަތްކޮށްފައި ކަމަށް ބެލެވެ އެވެ. އަނެއްކުޅުން ދެކުނު އެމެރިކާގެ ކުޅުންތެރިންނަކީ އެމީހުންގެ ކެރިއަރުގެ ކޮންމެވެސް ހިސާބެއްގައި ސްޕޭނުގެ ބާސެލޯނާ ނުވަތަ ރެއާލް މެޑްރިޑަށް ކުޅެން ބޭނުންވާ ބައެއްކަން ލިވަޕޫލަށް އެނގޭތީ އެވެ.