ޔޫރޮޕާ ލީގުގެ ގަދަ އަށަކަށް ބާސެލޯނާ ދާންޖެހޭ ކަމަށާއި އެކަމަށްޓަކައި ކުޅޭ އެންމެ މުހިންމު މެޗަކީ މިރޭ ނަޕޯލީއާ ދެކޮޅަށް ކުޅޭ މެޗުކަމަށް ބާސެލޯނާއިން ބުނެފި އެވެ.

ކޯޗު ޒަވީ ހަނާންޑޭޒް ބުނީ ޗެމްޕިއަންސް ލީގުގައި ބަޔާން މިއުނިކް އަތުން 8-2އިން މީގެ ހަތަރު އަހަރުކުރިން ބަލިވި ފަހުން ޔޫރަޕުގެ މުބާރާތެއްގެ ގަދަ އަށަކަށް ދިއުމަށް ކުޅޭ މެޗުގެ މުހިންމުކަން ކުޅުންތެރިންނަށް ވިސްނައިދެމުންދާ ކަމަށެވެ.

އޭނާ ބުނީ މި ސީޒަނަށް ފަހު ކޯޗުކަމުން އޭނާ ވަކިވި ނަމަވެސް ބާސެލޯނާ ކުރިއަށްދާން ޖެހޭ ކަމަށާއި އޭނާއަކީ މިހާރު ވަކި މުއްދަތަކަށް ހުންނާނެ މީހެއްކަން އެންމެނަށް ވެސް އެނގޭނެ ކަމަށެވެ.

މި މެޗަށް ނުކުންނައިރު އޭނާ އަށް ކުރިމަތިވެފައިވާ އެންމެ ބޮޑު މައްސަލައަކީ މިޑްފީލްޑަރުންނަށް އަނިޔާވުމުގެ މައްސަލަ އެވެ. ފުރަތަމަ 11ގެ މުހިންމު ތިން ކުޅުންތެރިން ކަމަށްވާ ގަވީ އާއި ޕެޑްރޯ އަކީ ފްރޭންކީ ޑިޔޮންގަށް ވަނީ އަނިޔާވެފަ އެވެ. މި ތިން ކުޅުންތެރިންވެސް މި މެޗުގައި ނުފެންނާނެ އެވެ. މީގެ އިތުރުން އެޓޭކިން މިޑްފީލްޑަރު ފެރަން ޓޮރޭޒާއި މާކަސް އަލޮންސޯ އާއި އަލެހަންދްރޯ ބަލްޑޭއަށް ވެސް ކުޅެވޭނެކަން ޔަގީނެއްނޫނެވެ.

މީގެ އިތުރުން ޑިފެންސްލައިނުގައި ކުޅުވާނީ ތަޖުރިބާކާރު ޑިފެންޑަރު އިނިގޯ މާޓިނޭޒްތޯ ނުވަތަ ޒުވާން ޑިފެންޑަރު ޕައު ކުބްރާސީތޯ ވެސް ނިންމަން ޒަވީ އަށް ވަނީ ޖެހިފަ އެވެ. އުމުރުން 17 އަހަރުގެ ކުބްރާސީ ވަނީ މި ސީޒަނުގައި މޮޅަށް ކުޅެފަ އެވެ. މިހެންވެ ގޯލްކީޕަރު މާކް އަންދްރޭ ޓާސްޓެގަން ފަދަ ކުޅުންތެރިން ތާއީދު އޮތީ ކުބްރާސީ ލައްވައި ފަހަތަށް ކުޅުވުމަށެވެ. ނަމަވެސް އޭނާގެ ޅަކަމާއެކު މިފަދަ މުހިންމު މެޗެއްގައި ކުޅުވުމާމެދު ޒަވީ ވަކި ގޮތެއް ނުނިންމަ އެވެ.