އަނަސް މަރާލީ ލައިގެން ހުރި ޓީޝާޓްގެ ސަބަބުން އޮޅިގެން:ރައީސް

މިދިޔަ ހޯމަ ދުވަހު ވަޅިން ހަމަލާދީ ޒުވާނަކު މަރާލީ އޭނާ ލައިގެން ހުރި ޓީޝާޓްގެ ސަބަބުން އޮޅިގެން ކަމަށް ރައީސުލްޖުމްހޫރިއްޔާ އަބްދުﷲ ޔާމީން ވިދާޅުވެއްޖެ އެވެ.

ބުރާސްފަތި ދުވަހުގެ ރޭ ހުޅުމާލޭގައި ފަހިވެހި އިޖްތިމާއީ މަރުކަޒު ހުޅުވުމުގެ ރަސްމިއްޔާތުގައި ވާހަކަދައްކަވަމުން ރައީސުލްޖުމްހޫރިއްޔާ އަބްދުﷲ ޔާމީން ވިދާޅުވި ގޮތުގައި، ލިޓަސް ފިހާރަތެރޭގައި ވަޅިން ހަމަލާދީ ކޮށާލި ރ. މީދޫ ފެންފިޔާޒުގޭ އުމުރުން 25 އަހަރުގެ މުހައްމަދު އަނަސްގެ ކުށެއް ނެތް ކަމަށާއި، ކުށްެރިވަނީ އޭނާ ލައިގެން ހުރި ޓީޝާޓްކަމަށެވެ.

"އިހައްދުވަހު އެންމެފަހުން މަރުވި ކުއްޖާ މަރާލެވިފައިވަނީ ކީއްގެންތޯ. އޭނާއެއް ނޫނޭ ކުށްވެރިވަނީ. އޭނާ ލައިގެން ހުރި ޓީޝާޓު ކުށްވެރިވަނީ. އެއީ އޭނާ ލައިގެން ހުރި ޓީޝާޓުގައި އެހެން ކުއްޖަކު ހުރެގެން އެއީ އެކުއްޖާ ކަމަށް ހީކޮށް ކުއްޖެއްގެ ފުރާނައާއި މަސްގަނޑާއި ވަކިވެގެންދިޔައީ. މީތޯ އަޅުގަނޑުމެން ތަހުޒީބީ ދުނިޔެއެއްގައި އުޅެންވީގޮތަކީ. ކީއްވެގެންތޯ ސިޔާސީ ލީޑަރުން އައިސް މިކަންކަން ހުއްޓުވުމަށް ވާހަކަ ނުދައްކަނީ،" ރައީސް ޔާމީން ވިދާޅުވި އެވެ.

މި މައްސަލައާ ގުޅިގެން ފުލުހުން މިހާތަނަށް މިފަދަ އެއްވެސް މައުލޫމާތެއް ހާމައެއްނުކުރެ އެވެ.

ރައީސް ޔާމީން ވިދާޅުވީ، ބައެއް ފަރާތްތަކުން އެމަނިކުފާނުގެ ވެރިކަމުގައި މަރަށް މަރު ނުހިފާނެ ކަމަށް ބުނެ ވާހަކަ ދެއްކި ނަމަވެސް، އެމަނިކުފާނުގެ ޒައާމަތުގައި އެކަން ކުރައްވާނެ ކަމަށެވެ. ރައީސް ޔާމީން ވިދާޅުވީ "މި ރައީސް މަރުގެ ހުކުމް ތަންފީޒު ކުރާނެ" ކަމަށެވެ.

މިއީ މުޅި މުޖުތަމައުގެ މަސްލަހަތަށް ކުރަންޖެހޭ ކަންކަން ކަމަށާއި ރާއްޖޭގެ މި މައުސޫމު މުޖުތަމައު ހަރާބު ވެގެންދާކަށް ބޭނުމެއް ނޫން ކަމަށް އެމަނިކުފާނު ވިދާޅުވި އެވެ. ރައީސް ޔާމީން ވިދާޅުވީ، މި ގައުމުގައި އަބަދު ދައްކަންޖެހޭނީ ހަޒާނާ ބަހާ ވާހަކަ ނޫން ކަމަށާއި، މިއީ ވެސް ދައްކާ އިސްލާހު ކުރަންޖެހޭނެ ކަންކަން ކަަމަށެވެ.

ގުޅިފައިވާ ސިޔާސީ ޕާޓީގެ ހަތަރު ލީޑަރުންނަށް މުހާތަބު ކުރައްވާ ރައީސް ވިދާޅުވީ، ހަތަރު ލީޑަރުން އެއްގަލަށް އަރާވަޑައިގެން އުޅުއްވާއިރު، ކުރީ ޒަމާނުގައި ހިނގާފައިވާ ކޮރަޕްޝަނުގެ މައްސަލަތައް ހައްލު ކުރުމަށް އެންމެ ފުރަތަމަ އެއްބަސްވަންޖެހޭ ކަމަށެވެެ. އެއަށްފަހު ހިނގާދިޔަ ކޮރަޕްޝަނުގެ މައްސަލަތައް ހައްލު ކުރުމަށް އެމަނިކުފާނާއެކު މަސައްކަތް ކުރުމަށް ރައީސް ގޮވާލެއްވި އެވެ. އޭރުން އެމްއެމްޕީއާރްސީގެ މައްސަލަ ހައްލުވާގޮތަށް އެެހެން މައްސަލަތައްވެސް ހައްލުވާނެ ކަމަށް އެމަނިކުފާނު ވިދާޅުވި އެވެ.

ރައީސް ޔާމީން ވިދާޅުވީ މި ސަރުކާރުން އެންމެ އިސްކަމެއްދެނީ، ރައްޔިތުންނަށް ބޭނުންވާ ހިދުމަތްތައް ފޯރުކޮށްދިނުމަށް ކަމަށާއި ހުޅުމާލެ ތަރައްގީ ކުރުމަކީ ސަރުކާރުން ވަރަށް ބޮޑު އިސްކަމެއް ދޭ ކަމެއް ކަމަށެެވެ. މިއަހަރުގެ ތެރޭގައި ހަތް ހާސް ފްލެޓް އެޅުމުގެ މަސައްކަތް ފެށިގެންދާނެ ކަމަށް ވެސް އެމަނިކުފާނު ވިދާޅުވި އެވެ.

ސަރުކާރުން މިފަދަ ކަންކަން ކޮށްދިނުމުގެ ބޭނުމަކީ، ރައްޔިތުންގެ އުންމީދުތަައް ފުއްދާދިނުން ކަމަށާއި ރައްޔިތުންނަށް އަމާން މުޖުތަމައުއެއް ގާއިމް ކުރުމަކީ ސަރުކާރުން އެންމެ ބޮޑު އިސްކަމެއް ދެއްކާ ކަން ކަމަށް ރައީސް ޔާމީން ވިދާޅުވި އެވެ.

"ދިވެހި ރައްޔިތުންނަށް ގެނެވޭ ކުރިއެރުމެއް ގެނެސްދިނުމުގައި ކީއްތޯ ވާނީ މިހުރިހާ ސިޔާސީ ލީޑަރުން އަހަރެންެގެ ހިއްސާއެއްވެސް އެބައޮތޭ. ތީ ހަމައެކަނި ރައީސް ޔާމީން ކޮށްދިންކަމެއް ނޫނޭ ވިދާޅުވެލައްވަން ވީނޫންތޯ. އެ ފުރުސަތު އަޅުގަނޑު މިދިނީ ނޫންތޯ،" ރައީސް ވިދާޅުވި އެވެ.

އެމަނިކުފާނު މިހެން ވިދާޅުވިއިރު، އެމްޑީޕީގެ ރައީސް މަހައްމަދު ނަޝީދާއި އަދާލަތު ޕާޓީގެ ރައީސް ޝެއިޚް އިމްރާން އަބްދުﷲ ވަނީ ޖަލަށް ލައިފަ އެވެ. އެއީ ބޭއިންސާފު ހުކުމެއް ކަމަށް ގިނަ ބަޔަކު ބުނާއިރު، ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ މައްޗަށް ރިޝްވަތުގެ ތުހްމަތުކޮށް، އެ މަނިކުފާނު ހައްޔަރުކުރި އެވެ. ޖަލުން މިނިވަންކޮށްފައި ހުއްޓަސް މިހާރު ތަނީ ޝަރީއަތް ހިންގަމުންނެވެ.