4000 ފުލެޓް ލިބެނީ ޝަރުތުހަމަވާ އެންމެންނަށް ނޫން
ވައިކަރަދޫ ދާއިރާގެ މެންބަރު ހުސައިން ޒިޔާދު
އޭސީސީ މެންބަރުން ފުލެޓާއި ދޭތެރޭގައި އަމަލުކުރަނީ މަޖިލީހަށް މެޖޯރިޓީ ލިބިއްޖެނަމަ އެތަނުގައި ތިބެވޭނެކަމަށް ދެކިގެން ކަމަށް ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން މެންބަރު ޒިޔާދު ވިދާޅުވީ ފުލެޓް މައްސަލައިގައި އޭސީސީގެ ނިޔަތް ގޯސްކަން އެނގެނީ، ފުލެޓް މައްސަލައިގައި އޭސީސީން އަމަލުކުރާ ގޮތުން ކަމަށާއި، އޭސީސީން ގޯސް ހަދާކަން އެނގެނީ ޝަރުތަށް ބެލުން ކަމަށެވެ. ފުލެޓް ލިބޭ ޝަރުތަކީ މާލޭގައި 15 އަހަރުވަންދެން ދިރިއުޅުން ކަމަށާއި، ކުރިމަތިލާފައި ތިބި 9000 ވަރަކަށް މީހުން ތިބިއިރު ގިނަ މީހުންނަކީ ޝަރުތު ހަމަވާ މީހުން ކަމަށް މެންބަރު ޒިޔާދު ވިދާޅުވިއެވެ.
މެންބަރު ވިދާޅުވީ 4000 ފުލެޓް ލިބެނީ ޝަރުތުހަމަވާ އެންމެންނަށް ނޫން ކަމަށާއި، ފުލެޓް ލިބެނީ މިހާރު ހެދިފައި ހުރި މިންވަރަށް ކަމަށެވެ. ނަމަވެސް ނުލިބޭ މީހުންނަކީ ވެސް ޝަރުތުހަމަވާ މީހުން ކަމަށެވެ.
މެންބަރު ޒިޔާދު ވިދާޅުވި ކުރީ ސަރުކާރުން ދީފައި އޮތް އެއްޗެއް ބަދަލުކުރާކަމުގައިވާނަމަ، އެމީހެއްގެ ފުލެޓް ނުލިބެނީ ކޮންކޮން ޝަރުތެއް ހަމަނުވެގެންކަން އެނގެންޖެހޭނެ ކަމަށެވެ. ނަމަވެސް އޭސީސީން އެވަރުވެސް ބުނެނުދެވޭއިރު، ހަމައެކަނި ދައްކާ ވާހަކައަކީ ޝަރުތުހަމަނުވާ ވާހަކަ އެކަނި ކަމަށެވެ.
މެންބަރު ޒިޔާދު ވިދާޅުވީ އޭސީސީން އެގޮތަށް އަމަލުކުރަމުންދަނީ، މަޖިލިސް އިންތިހާބުގައި ސަރުކާރަށް މެޖޯރިޓީ ލިބިއްޖެނަމަ، އޭސީސީ މިހާރު އޮތްގޮތަށް ބާއްވާނެކަމަށް ދެކިގެން ކަމަށެވެ. އަދި ފުލެޓުގެ މައްސަލަ އޮތްކަމަށް އޭސީސީއަށް އެނގުނީ ސަރުކާރު ބަދަލުވި ފަހުން ކަމަށާއި، އޭގެކުރިން އޭސީސީއަކަށްވެސް އެކަމެއް ނޭނގޭ ކަމަށެވެ.
