މޯލްޑިވްސް ޕޯޓްސް ލިމިޑެޓް (އެމްޕީއެލް)ގެ ވިޔަފާރި ފުޅާކުރުމަށްޓަކައި ރީ-އެކްސްޕޯޓްކުރުމުގެ މަސައްކަތް ފަށަން ތައްޔާރުވެފައި ވާކަމަށް އެ ކުންފުނިން ހާމަކޮށްފިއެވެ.
އެމްޕީއެލްއިން ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި، އެކުންފުނީގެ ޗީފް އެގްޒެކެޓިވް އޮފިސަރ މުޙައްމަދު ވަޖީހު ވިދާޅުވީ، ކުންފުނި ބާރުވެރިކޮށް އިތުރަށް އާމްދަނީ ހޯދުމުގެ ގޮތުން ޓްރާންސްޝިޕްމަންޓް ކާގޯ ހޭންޑްލުކުރުމުގެ މަސައްކަތް މިހާރު ވަނީ ފަށާފައި ކަމުގައެވެ.
މީގެ އިތުރުން ވަޖީހު ވިދާޅުވީ، މިކަމާ ގުޅޭގޮތުން މި ޝިޕްމަންޓްތައް ވައިގެ މަގުން އެކްސްޕޯޓު ކުރުމަށްޓަކައި ކަސްޓަމްސްއާއި އެއަރލައިންތަކާވެސް ވާހަކަދެކެވި، އެއްބަސްވުންތަކާ ހަމައަށް ގޮސްފައިވާކަމަށެވެ. އެހެންކަމުން، މުދާ އެކްސްޕޯޓު ކުރުމުގެ އެންމެހާ މަރުހަލާތައް ނިމި، މުދާ އެކްސްޕޯޓު ކުރުމަށް ތައްޔާރުވެފައި ވާކަމަށްވެސް ވަޖީހު ވިދާޅުވިއެވެ.
މީގެ ސަބަބުން ލިބިގެންދަނީ އާމްދަނީ އިތުރުކުރުމަށް ރަނގަޅު ފުރުސަތެއް ކަމަށާއި، މިކަމުގެ ސަބަބުން ޑޮލަރުގެ ދަތިކަމަށްވެސް ހައްލު ލިބިގެންދާނެކަމަށް ވަޖީހު ވިދާޅުވިއެވެ.
އެއް ގައުމުން ރާއްޖެއަށް އެތެރެކުރާ މުދާ އެހެން ގައުމަކަށް އެކްސްޕޯޓްކުރުމަށް ވަރަށް ބޮޑު ޑިމާންޑެއް އޮވެއެވެ.
