ޓޮޓެންހަމުން އެންމެ ކުޅުންތެރިއަކަށް 100 މިލިއަން ޕައުންޑް ހަރަދު ނުކުރާނެ ކަމަށް ކޯޗު އެންޖޭ ޕޮޗްޓެޗެގްލޫ ބުނެފި އެވެ.

އޭނާ މިހެން ބުނީ ކުރިއަށް އޮތް ޓްރާންސްފާ މާކެޓުގައި ޓީމަށް އިތުރު ކުޅުންތެރިން ގެނައުމާބެހޭ ގޮތުން ވާހަކަ ދައްކަމުންނެވެ.

މި ސީޒަނަށް ޓީމާ ހަވާލުވުމަށްފަހު ޕޮސްޓެޗެގްލޫގެ އިރުޝާދުގެ ދަށުން ޓޮޓެންހަމުން މިހާތަނަށް ވަނީ 10 ކުޅުންތެރިއަކު ގެނެސްފަ އެވެ. އަދި ކުޅުންތެރިންނަށް ހޭދަކުރި އަދަދު ވަނީ 150 މިލިއަން ޕައުންޑް ފަހަނައަޅައި ގޮސްފަ އެވެ. މީގެ ތެރޭގައި ޖޭމްސް މެޑިސަން ގަތުމަށް ހޭދަކުރި 40 މިލިއަނާއި ބެރަން ޖޯންސަން ގަތުމަށް ހޭދަކުރި 50 މިލިއަން ޕައުންޑް ވެސް ހިމެނެ އެވެ. އަދި ޖެނުއަރީ މަހު ލޯނު އެއްބަސްވުމެއްގެ ދަށުން ވަނީ ޗެލްސީގެ ކުރީގެ ފޯވަޑް ޓިމޯ ވާނާ ވެސް ގެނެސްފަ އެވެ. ނަމަވެސް ކޯޗު ބުނީ އޭނާ ބޭނުންވާ ފެންވަރަށް އަދި ޓީމަށް ނާދެވޭ ކަމަށާއި ކުޅުންތެރިން ވެސް އިތުރަށް ހޯދަންޖެހޭ ކަމަށެވެ.

އޭނާ ބުނީ ޓީމަކަށް ކާމިޔާބު ލިބޭނީ ރަނގަޅު ކުޅުންތެރިންނާއެކު ދިގު މުއްދަތެއްގައި މަސައްކަތް ކުރެވިގެން ކަމަށާއި އޭނާގެ ޓީމުގެ ޕްލޭނަކީ އެއީ ކަމަށެވެ.