ބައިނަލްއަޤްވާމީ އަންހެނުންގެ ދުވަހުގެ މުނާސަބަތުގައި ފަލަސްޠީނުގެ އަންހެނުންނަށް އެއްބާރުލުން ދިނުމުގެ ގޮތުން ފަލަސްޠީނަށް ތާއީދުކުރާ އަންހެނުންތަކެއް ހުކުރު ދުވަހު ވޮޝިންޓަން ޑީސީގައި ސުލުހަވެރި މުޒާހަރާއެއް ކުރިއަށް ގެންގޮސްފިއެވެ.

ފަލަސްތީނިއަން ޔޫތު މޫވްމެންޓްގެ ފަރާތުން އިންތިޒާމްކޮށްގެން ކުރިއަށް ގެންދިޔަ މި މުޒާހަރާއަކީ ޣައްޒާގެ އަންހެނުންނާއި ކުޑަކުދިންނަށް ކުރިމަތިވެފައިވާ ނުރައްކާތެރި ހާލަތަށް ސަމާލުކަން ހޯދުމަށާއި، ވަގުތުން ހަނގުރާމަ ހުއްޓާލައި، އިޒްރޭލަށް އެމެރިކާގެ އަސްކަރީ އެހީތެރިކަން ދިނުން ހުއްޓާލުމަށް ގޮވާލައި ކުރިއަށް ގެންދިޔަ މުޒާހަރާއެކެވެ.

ފަލަސްތީނުގެ ޔޫތު މޫވްމަންޓަށް ނިސްބަތްވާ މިރަންޑާ ދުބޭ ވިދާޅުވީ މިދިޔަ އޮކްޓޯބަރު މަހު އިސްރާއީލުން ޣައްޒާއާ ދެކޮޅަށް ހަނގުރާމަ ފެށި ފަހުން ފަލަސްތީނުގެ އަންހެނުން "މި ހަމަނުޖެހުންތަކުގެ ކުރީ ސަފުގައި" ތިބި ކަމަށެވެ.

ޣައްޒާގެ އަންހެނުންނަށް ވިހެއުމަށް މަޖުބޫރުވަނީ ނުރައްކާތެރި ހާލަތްތަކަކާއި ސާފުތާހިރުކަމެއް ނެތް ހާލަތްތަކެއްގަ އެވެ. "އޮކްޓޯބަރު 7 ވަނަ ދުވަހުން ފެށިގެން މިހާތަނަށް 20،000 ކުދިން އުފަންވެފައި ވޭ. އެކަށީގެންވާ އަޅާލުމެއް ނެތި ތުއްތު ކުދިން ބަނޑުހައިހޫނުކަމުގައި މަރުވެ، މައިންނަށް ދަރިންނަށް އެހީތެރިކަން ފޯރުކޮށްނުދެވެއެވެ.

ޣައްޒާގައި އޮކްޓޯބަރު މަހުގެ 7 ވަނަ ދުވަހު އިސްރާއީލުން ހިންގި ހަނގުރާމައިގައި މިހާތަނަށް 8،900 އަންހެނުން ޝަހީދުވެފައިވާ ކަމަށް ޣައްޒާގެ މީޑިއާ އޮފީހުން ބުނެއެވެ.

އިސްރާއީލުން ޣައްޒާއަށް ދެމުންދާ ހަމަލާތަކުގައި ފަލަސްތީނުގެ 30،800 އަށް ވުރެ ގިނަ މީހުން ޝަހީދުވެ، 72،400 އަށް ވުރެ ގިނަ މީހުން ވަނީ މިހާތަނަށް ޒަޚަމްވެފައެވެ.

ފަލަސްތީނުގެ ޖަމާއަތްތަކުން އަންދާޒާކުރާ ގޮތުގައި އޮކްޓޯބަރު މަހުގެ ހަތްވަނަ ދުވަހުން ފެށިގެން ފަލަސްތީނުގެ އެތައް ހާސް ބަޔަކު ވަނީ ޣައްޒާގައި އިސްރާއީލު ސިފައިން ހައްޔަރު ކޮށްފައެވެ.

އިޒްރޭލުން ވަނީ ޣައްޒާއަށް ކާބޯތަކެއްޗާއި އިންސާނީ އެހީ ފޯރުކޮށްދިނުމަށް ހުރަސްތަކެއް އަޅައި، އެ ގައުމުގެ އާބާދީ، ހާއްސަކޮށް ޣައްޒާގެ އުތުރުގެ ރައްޔިތުން ބަނޑުހައިހޫނުކަމުގެ ތެރެއަށް ވައްޓާލައިފައެވެ.

އިސްރާއީލު ހަނގުރާމައިގެ ސަބަބުން ޣައްޒާގެ އާބާދީގެ 85 އިންސައްތަ މީހުން ކާބޯތަކެއްޗާއި ސާފު ފެނާއި ބޭހުގެ ދަތިކަން ބޮޑުވެ ގެދޮރު ގެއްލިފައިވާއިރު، އެންކްލޭވްގެ އިންފްރާސްޓްރަކްޗަރގެ 60 އިންސައްތަ ވަނީ ހަލާކުވެ ނުވަތަ ބޭނުން ނުކުރެވޭވަރުވެފައި ކަމަށް އދއިން ބުނެއެވެ.

ބައިނަލްއަގްވާމީ ކޯޓް އޮފް ޖަސްޓިސްގައި އިޒްރޭލުގެ މައްޗަށް ވަނީ ޖަރީމާހިންގުމުގެ ތުހުމަތުކޮށްފަ އެވެ. މިދިޔަ ޖެނުއަރީ މަހު އެކޯޓުން ނެރުނު ވަގުތީ ހުކުމެއްގައި ވަނީ ޣައްޒާގައި ދިރިއުޅޭ އާންމުންނަށް އިންސާނީ އެހީތެރިކަން ފޯރުކޮށްދިނުމަށް ޖިނާއީ އަމަލުތައް ހުއްޓާލައި ފިޔަވަޅުތައް އެޅުމަށް ތެލްއަވީވްއަށް އަންގާފައެވެ.