މިސްރާބު ހަމަމަގަށް އަޅުވަން އައްޑޫ ސިޓީ އެންމެ ކުރިއަށް ނިކުމެ އޮންނާނެ: ޝާހިދު

މިސްރާބު ހަމަމަގަށް އަޅުވަން އައްޑޫ ސިޓީ އެންމެ ކުރިއަށް ނިކުމެ އޮންނާނެކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.

އެމްޑީޕީގެ މަޖިލިސް ކެމްޕޭނުގައި އައްޑޫ ސިޓީއަށް ވަޑައިގެން އެސިޓީގެ އެމްޑީޕީ ކެމްޕޭން ޓީމްތަކާ ބައްދަލުކުރައްވައި ވާހަކަ ދައްކަވަމުން ޝާހިދު ވިދާޅުވީ އައްޑޫ ސިޓީއަކީ އަބަދުވެސް މަޖިލިސް އިންތިޚާބުގައި އެމްޑީޕީއިން މެޖޯރިޓީ ހޯދާ ސިޓީއެއްކަމަށާއި، އައްޑޫ ސިޓީއަކީ އެމްޑީޕީގެ "ކިއްލާއެއް" ކަމަށެވެ. އަދި ސަރުކާރުގެ އަމާޒަކަވެސް ވާނީ އެމްޑީޕީއަށް އައްޑޫގެ ގޮނޑިތައް ގެއްލުވާލަންކަމަށާއި، އެހެންނަަމަވެސް އައްޑޫ ރައްޔިތުން އެފުރުސަތު ނުދޭނެކަމަށެވެ.

އައްޑޫގެ ކެމްޕޭން ޓީމްތަކާއެކު ބޭއްވި ބައްދަލުވުމުގައި ޝާހިދުވަނީ އައްޑޫ ސިޓީގެ ތަރައްޤީގެ މަޝްރޫއުތައް މި ސަރުކާރުން ހުއްޓާލާފައިވާކަން ފާހަގަކުރައްވާފައެވެ. އަދި ވެރިކަމަށް އައުމަށް މިސަރުކާރުން ބޮޑެތި ދޮގުތައް ހެދިކަން ވަކިން ޚާއްސަކޮށް އައްޑޫ ރައްޔިތުންނަށް ހެއްކާއެކު އެނގޭނެކަމަށް ޝާހިދު ވިދާޅުވިއެވެ. މިސާލެއްގެ ގޮތުގައި ޝާހިދު ނެންގެވީ އައްޑޫ ޕޮލިސް އެކަޑެމީއަކީ އިންޑިއާ ސިފައިންގެ ބޭސް އެއްކަމަށާއި އެތަނުގައި އެތައް ހާސް ސިފައިން އެބަތިބިކަމަށް ބުނެ މިހާރުގެ ސަރުކާރުގެ އިސް ބޭފުޅުން ދެއްކި ވާހަކައެވެ.

މި ސަރުކާރުން ރައްޔިތުންގެ އިހްސާސްތަކަށް ނުބަލައި، އިސްކުރަނީ އެމީހުންގެ ސިޔާސީ ވިސްނުންކަމަށާއި، އެ މިސްރާބަށް ދިޔަ ނުދީ، މިސްރާބު ހަމަމަގަށް އަޅުވަން ޖެހޭކަމަށް ޝާހިދު ވިދާޅުވިއެވެ.