މަޖިލީހުގައި ސައީދު އިންނަވަންޖެހޭ، އަސާސީ ޚިދުމަތް ކަށަވަރުކޮށްދިނުމަށް ކާމިޔާބު ގިނަ މަސައްކަތްތަކެއް ކުރައްވާފައިވޭ: ރައީސް ސާލިހު
6 މާރިޗު 2024 | ބުދަ 17:25ކަރަންޓުގެ ޚިދުމަތް ރަނގަޅު ކުރުމަށް ކުރި މަސައްކަތް ކާމިޔާބު
މަޖިލިސް20- ގައްދޫ ދާއިރާގެ އެމްޑީޕީ ކެންޑިޑޭޓް އަހުމަދު ސައީދުގެ ކެންޕޭން ޖަގަހަ ހުޅުވުމަށް ބޭއްވި ހަފްލާގައި ކުރީގެ ރައީސް އިބްރާހިމް މުހައްމަދު ސާލިހު ވާހަކަފުޅު ދައްކަވަނީ
ކުރިއަށް އޮތް ރައްޔިތުން މަޖިލީހުގައި މިދިޔަ ސަރުކާރުގެ ފެނަކަ ކޯޕަރޭޝަންގެ މެނޭޖިން ޑިރެކްޓަރު އަހުމަދު ސައީދު މުހައްމަދު އިންނަވަން ޖެހޭ ކަމަށާއި، އަތޮޅުތެރޭގެ ރައްޔިތުންނަށް އަސާސީ ޚިދުމަތް ކަށަވަރުކޮށްދިނުމަށް ކާމިޔާބު ގިނަ މަސައްކަތްތަކެއް އެބޭފުޅާ ކުރައްވާފައިވާ ކަމަށް ކުރީގެ ރައީސް އިބްރާހިމް މުހައްމަދު ސާލިހު ވިދާޅުވެއްޖެއެވެ.
ބުދަ ދުވަހުގެ ރޭ މަޖިލިސް20- ގައްދޫ ދާއިރާގެ އެމްޑީޕީ ކެންޑިޑޭޓް އަހުމަދު ސައީދުގެ ކެންޕޭން ޖަގަހަ ހުޅުވުމަށް ބޭއްވި ހަފްލާގައި ރައީސް ސާލިހު ވިދާޅުވީ ސައީދުއަކީ އެމްޑީޕީގެ ސީދާ ސިޔާސަތުތައް ތަންފީޒު ކުރެއްވުމުގައި ދެގޮތެއް ނުވެ މިހިސާބަށް މަސައްކަތް ކުރެއްވި ބޭފުޅެއް ކަމަށާއި، އެމްޑީޕީ އުފެދުނީއްސުރެ ރާއްޖޭގެ ތަރައްގީއަށް ކުރަމުން ދިޔަ މަސައްކަތުގެ ކުރީ ސަފުގައި އިސްވެ އުޅުއްވި ބޭފުޅެއް ކަމަށެވެ. އަދި މިދިޔަ ފަސް އަހަރުގެ ތެރޭގައި ސައީދު ވަރަށް ގިނަ މަސައްކަތް ކުރެއްވިކަން ރައީސް ސާލިހު ފާހަގަކުރެއްވިއެވެ.
ފެނަކައަށް އިޝާރާތް ކުރައްވައި ރައީސް ސާލިހު ވިދާޅުވީ ފެނަކަ ވަކި ބޭފުޅަކާއި ހަވާލުކުރެއްވުމަށް ވަރަށް ބޮޑަށް ވިސްނަންޖެހުނު ކަމަށާއި، އެންމެ ރަނގަޅު ބޭފުޅަކަށް އިހުތިޔާކުރެވުނީ ސައީދު ކަމަށެވެ.
ރައްޔިތުންނަށް އަަސާސީ ޚިދުމަތްތައް ގާއިމްކުރުމަށް ކުރަންޖެހުނު މަސައްކަތްތަކާއި ގުޅޭގޮތުން ރައީސް ސާލިހު ވިދާޅުވީ އެމަނިކުފާނުގެ ވެރިކަމުގައި ރައްޔިތުންގެ ފަރާތުން އެންމެ ބޮޑަށް އަންނަ އެއް ޝަކުވާއަކީ ކަރަންޓުގެ ޚިދުމަތް ރަނގަޅަށް ނުލިބޭ ކަމުގެ ޝަކުވާ ކަމަށާއި، ރޯދަމަސް ތެރޭގައި މިޝަކުވާތައް ގިނަވާ ކަމަށެވެ. އެގޮތުން ކަރަންޓުގެ ޚިދުމަތް ރަނގަޅު ކުރުމަށް ކުރި މަސައްކަތް ކާމިޔާބުވެ، ރައްޔިތުން އެދޭ ފަދަ ޚިދުމަތްތަކެއް ފޯރުކޮށްދެވިފައިވާ ކަމަށް ރައީސް ސާލިހު ވިދާޅުވިއެވެ.
މިއަދުގެ ސަރުކާރަށް ރައީސް ސާލިހު ވަނީ ފާާޑު ވިދާޅުވެ ވާހަކަފުޅު ދައްކަވާފައެވެ. އެމަނިކުފާނު ވިދާޅުވީ މިސަރުކާރު ވެރިކަމަށް އަންނަންވެގެން ރައްޔިތުންނަށް ދެއްކި ހުވަފެނާއި ހެދި ދޮގުތަކާއި އޮޅުވާލި އޮޅުވާލުންތަކާއި މިއަދު ރައްޔިތުންނަށް ހާމަވާ ކަމަށާއި، ގޯހެއް ހެދިއްޖެކަން ރައްޔިތުން ގަބޫލުކުރާ ކަމަށެވެ.
ރައީސް ސާލިހު ވިދާޅުވީ މި ގޯހުން ސަލާމަތްވުމަށް މަސައްކަތް ކުރުމަށް ރައްޔިތުން ތިބީ ތައްޔާރަށް ކަމަށާއި، ގައުމު ހަމަމަގަށް އެޅުވުމަށް މަޖިލިސް އިންތިޚާބުގެ މެޖޯރިޓީ އެމްޑީޕީން ހޯދަންޖެހޭ ކަމަށެވެ. އަދި މި މަޖިލީހުގެ އިންތިޚާބު ގިނަ ގޮނޑިތަކެއް ލިބޭނެ ކަމާއިމެދު ޝައްކުނުކުރައްވާ ކަމަށް އެމަނިކުފާނު ވިދާޅުވިއެވެ.
ރައީސް ސާލިހު ވިދާޅުވީ 20 ވަނަ ރައްޔިތުން މަޖިލިސް ފުރިހަމަވެގެންދާނީ އެ މަޖިލީހުގައި ސައީދު ވެސް ހުންނަވައިގެން ކަމަށާއި، އެކަމަށް ރައްޔިތުން މަސައްކަތްކޮށްދޭން ޖެހޭ ކަމަށެވެ. އަދި މިފަހަރުގެ އިންތިޚާބުގައި ގައްދޫ ދާއިރާގެ ގޮނޑި ސައީދަށް ހޮއްވައިވައިދެއްވުމަކީ ރައީސް ސާލިހު ވަނީ އިލްތިމާސްކުރައްވާފައެވެ.
