ރެއާލް މެޑްރިޑުގެ އެޓޭކިން މިޑްފީލްޑަރު ޖޫޑް ބެލިންހަމަށް ދެއްކި ރަތްކާޑުގެ އިސްތިއުނާފު ސްޕެނިޝް ލީގުން ބަލައިނުގެނެ ފޮނުވާލައިފި އެވެ.
މިއާއެކު ލީގުގައި މި މަހު ރެއާލް ކުޅެންޖެހޭ އެއްވެސް މެޗެއްގައި އޭނާ އަށް ކުޅެވޭނެ ކަމުގެ ޔަގީންކަން ވަނީ ގެއްލިފަ އެވެ. ބޮޑަށް ބެލެވެނީ ސްޕެނިޝް ލީގުން ބެލިންހަމްގެ ރަތްކާޑުގެ މައްސަލަ ބަލައިނުގަންނަން ނިންމުމުން އޭނާއަށް ތިން މެޗުގެ ސަސްޕެންޝަނެއް އަންނާނެ ކަމަށެވެ. މިކަން މިގޮތަށްވެއްޖެނަމަ އިނގިރޭސި ކުޅުންތެރިޔާ އަށް ސެލްޓަވީގޯ އާއި އޮސަސޫނާ އަދި އެތްލެޓިކް ކުލަބާ ދެކޮޅަށް ކުޅޭ މެޗުގައި ނުކުޅެވޭނެ އެވެ.
ބެލިންހަމަކީ ރެއާލް މެޑްރިޑުގައި މިވަގުތުހުރި އެންމެ މޮޅު އެއް ކުޅުންތެރިޔާ އެވެ. އޭނާ އަށް ރަތްކާޑު ދެއްކީ ލީގުގައި މިދިޔަ ހަފުތާގައި ވެލެންސިއާއާ ދެކޮޅަށް ކުޅުނު މެޗުގައި ރެފްރީގެ ނިންމުންތަކާ ދެކޮޅު ހެދުމުގެ ސަބަބުންނެވެ. ރެއާލް މެޑްރިޑުން ބުނީ މިރަތްކާޑަކީ ބޭނުމެއްނެތި ރެފްރީ ދެއްކިކާޑެއް ކަމަށެވެ.
ނަމަވެސް ލީގުން މިހާތަނަށް ބުނަމުންއައީ ރެފްރީ މެޗު ނިންމާލުމާއެކު ބެލިންހަމްގެ އަމަލުތައް ހުރީ އޭނާ އަށް އަދަބުދޭންޖެހޭ ފަދަ ގޮތަކަށް ކަމަށެވެ.
