ވީއޭއެމްގެ އިސްތިއުނާފު މައްސަލައިގައި ކުރިއަށް ނުދާން ލަތީފް ނިންމަވައިފި

ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ ހިންގުން ނޯމަލައިޒިން ކޮމިޓީއަކާ ހަވާލުކުރަން ކޮމިޝަނާ އޮފް ސްޕޯޓްސްއިން މީގެ ކުރިން ނިންމީ ޤާނޫނާ ޚިލާފަށް ކަމަށް ބެލެވޭނެ ޤާނޫނީ ހަމައެއް ނެތް ކަމަށް ސިވިލް ކޯޓުން ނިންމުމުން، އެ ހުކުމް ބަލައި ނުގަނެ ހައި ކޯޓުގައި އިސްތިއުނާފް ކުރި މައްސަލަ ވީއޭއެމްގެ ކުރީގެ ރައީސް މުޙައްމަދު ލަތީފް ނަންގަވައިފިއެވެ.

ވީއޭއެމްގެ ރައީސް ކަމުގައި ހުރިިިއިރު ކޮމިޝަނާ އޮފް ސްޕޯޓްސްއާ ދެކޮޅަށް ލަތީފް ހުށަހެޅި މައްސަލައިގައި ކުރިއަށް ނުދާން ނިންމަވައި ލަތީފް ވިދާޅުވީ އެ މައްސަލަ ކޯޓުން ނެންގެވީ ވީއޭއެމްގެ މިހާރުގެ ހިންގާ ކޮމިޓީއަށް އެއްބާރުލުން ދިނުމާއެކު، ކުޅިވަރާ ބެހޭ ވަޒީރު އަޙްމަދު މަޚްލޫފް މާލެ ސަރަހައްދަށް އިއުލާންކޮށްފައިވާ ވޮލީބޯޅައިގެ އިންޑޯ އާއި އައުޓްޑޯ ކޯޓުގެ ޑިޒައިން ފެނި، އެކަމަށް މަރުހަބާ ކިޔުމުގެ ގޮތުން ކަމަށެވެ.  

އަދި ވޮލީއަށް ލިބޭ ކޮންމެ ކުރިއެރުމަކަށް އަބަދުވެސް މަރުހަބާ ކިޔާނެ ކަމަށާއި، އަދި މިހާރުގެ ހިންގާ ކޮމިޓީއަށް އެއްބާރުލުން ދިނުމުގައި އަބަދުވެސް ދެމިހުންނާނެ ކަމަށް ވިދާޅުވިއެވެ. އެހެންކަމުން މިފަދަ ދަޑިވަޅެއްގައި އެސޯސިއޭޝަންގެ އެއްމެ ބޮޑު ސްޕޮންސަރު ކަމަށްވާ ސަރުކާރު ގޮވައިގެން ކޯޓަށް ދިޔުމަކީ ކުޅިވަރަށްވެސް އެކަމުން ދެރަ ލިބިދާނެ ކަމެެއް ކަމަށްވާތީ އާއެކު ވޮލީ ކުޅުންތެރިންނާއި ވޮލީގެ ކުރިމަގަަށްޓަކައި މައްސަލައިގައި އިތުރަށް ކުރިއަށްނުދާން ނިންމީ ކަމަށްވެސް ލަތީފް ވިދާޅުވިއެވެ.

ސެންޓްރަލް އޭޝިއާ ޒޯނަލް ވޮލީބޯލް އެސޯސިއޭޝަނުގެ ރައީސްގެ މަގާމު އަދާކުރައްވަމުންދާ ލަތީފް ވިދާޅުވީ ވޮލީބޯޅައިިގެ ކޮންމެ ކުރިއެރުމަކަށް އަބަދުވެސް މަރުހަބާ ކިޔާނެ ކަމަށާއި ސަރުކާރުން ވޮލީއަށް ކޮށްދޭނެ ކަމަށް އިއުލާންކޮށްފައިވާ މަޝްރޫއުތަކުގެ ސަބަބުން ބޮޑު ކުރިއެރުމެއް ލިބިގެންދާނެ ކަމަށް ގަބޫލުކުރައްވާ ކަމަށެވެ.

ވީއޭއެމްގެ ހިންގާ ކޮމިޓީ އުވާލައި، ނޯމަލައިޒިން ކޮމިޓީއާ އެ އެސޯސިއޭޝަން ހިންގުން ކޮމިޝަނާ އޮފް ސްޕޯޓްސް އަޙްމަދު ސަލީމް (ހީނާ) ހަވާލުކޮށްފައިވަނީ 2019 ވަނަ އަހަރުގެ ޖޫން މަހުގެ 10 ވަނަ ދުވަހުއެވެ. ފުރަތަމަ ފަސް މެންބަރުންގެ ކޮމިޓީއަކުން ވީއޭއެމް ހިންގާފައިވާއިރު، އެފްއައިވީބީގެ އިންޒާރާއެކު ފަހުން އެ ކޮމިޓީ އުވާލިއެވެ.

އެކަމަކު އެއަށްފަހު ކޮމިޝަނާ އޮފް ސްޕޯޓްސް ސޮއިކުރައްވައި، 2019 ވަނަ އަހަރުގެ ނޮވެމްބަރު މަހުގެ 19 ވަނަ ދުވަހު ވީއޭއެމަށް ފޮނުވި ސިޓީގައި ވަނީ އެ އަހަރުގެ އޮކްޓޯބަރު މަހުގެ 31 ވަނަ ދުވަހު ވީއޭއެމްގެ މެންބަރު ކުލަބުތަކުން އިސްވެ ބޭއްވި އެކްސްޓްރާ އޯޑިނަރީ ކޮންގްރެސްގައި ލަތީފުގެ އިތުބާރު ނެތްކަމުގެ ވޯޓެއްނަގައި، ހާޒިރުވެތިބި ފުރިހަމަ މެންބަރުންގެ އިއްތިފާގުން ފާސްކުރުމާ ގުޅިގެން، ވީއޭއެމްގެ އިންތިޚާބު ބޭއްވެންދެން ކުރަންޖެހޭ ކަންކަން ކުރުމަށާއި، ވީއޭއެމްގެ ދުވަހުން ދުވަހަށް ކުރަންޖެހޭ ކަންކަން ކުރުމަށް ތިން މެންބަރުންގެ މައްޗަށް އެކުލެވިގެންވާ ނޯމަލައިޒިން ކޮމިޓީއެއް އެކުލަވާލާފައިވާ ކަމަށް ބުނެފައެވެ.

އެކަމަކު ލަތީފުގެ ބެލުމުގެ ދަށުން މިދިޔަ އޭޕްރީލް މަހު ވީއޭއެމްގެ އިންތިޚާބު ބޭއްވިއިރު، ހަ ކުލަބުގެ ތާއީދާއެކު މުޙައްމަދު ރަނޭޝް (ރަނޭ) ވަނީ އިންތިޚާބު ކާމިޔާބުކުރައްވާފައެވެ.

މީގެ ކުރިން ލަތީފް ވަނީ ނޯމަލައިޒިން ކޮމިޓީއާ ވީއޭއެމް ހަވާލުކުރި ކުރުން ބަދަލުކުރަން ސިވިލް ކޯޓަށް ހުށަހަޅުއްވާފައެވެ. އެ މައްސަލައިގައި އެދުނު ވަގުތީ އަމުރު ނެރެދެވެން ނެތް ކަމަށް އޭރު ސިވިލް ކޯޓުން ނިންމިއިރު، އެ ކޯޓުން ވަނީ ވީއޭއެމްގެ ހިންގުން ނޯމަލައިޒިން ކޮމިޓީއަކާ ހަވާލުކުރަން ކޮމިޝަނާ އޮފް ސްޕޯޓްސްއިން ނިންމާފައިވަނީ ޤާނޫނާ ޚިލާފަށް ކަމަށް ބެލެވޭނެ ޤާނޫނީ ހަމައެއް ނެތް ކަމަށް ހުކުމް ކޮށްފައެވެ.

ވީއޭއެމްގެ ހިންގާ ކޮމިޓީ އުވާލާފައި އޮތީ ކޮމިޝަނާ އޮފް ސްޕޯޓްސްއަށް ލިބިގެންނުވާ ބާރެއްގެ ދަށުން ކަމަށާއި، ދިވެހިރާއްޖޭގެ ކުޅިވަރުގެ ޤާނޫނުގެ ދަށުން ކުޅިވަރު އެސޯސިއޭޝަނެއްގެ ހިންގާ ކޮމިޓީ އުވާލުމުގެ ބާރު ކޮމިޝަނާ އޮފް ސްޕޯޓްސްއަށް ދެ ހާލަތެއްގައި ލިބޭއިރު، ވީއޭއެމްއަށް އެ ދެ ހާލަތްވެސް އައިސްފައި ނުވާ ކަމަށް އޭރު މައްސަލަ އާއެކު ކުރިއަށްދަމުން ލަތީފް ވަނީ ވިދާޅުވެފައެވެ.