ބެލިންހަމްގެ އަގާމެދު ކްލޮޕް: ކުޑަކުއްޖަކަށް ފެރާރީ ކާރެއް ގަނެނުދޭނެ!

އިނގިރޭސި ޒުވާން މިޑްފީލްޑަރު ޖޫޑް ބެލިންހަމް ގަތުމަށް 100 މިލިއަން ހަރަދު ކުރުމަކީ ރަނގަޅު ކަމެއްނޫން ކަމަށް ލިވަޕޫލްގެ ކޯޗު ޔާގެން ކްލޮޕް ބުނެފި އެވެ.

އޭނާ މިހެން ބުނީ 19 އަހަރުގެ ކުޅުންތެރިޔާ ވިއްކަން ޖަރުމަނުގެ ބޮރޫޝިޔާ ޑޯޓްމުންޑްއިން ކިޔާ އަގު 110 މިލިއަން ޕައުންޑާ ގާތް ކުރުމުންނެވެ. ލިވަޕޫލަށް ގިނަ ތަށި ތަކެއް ހޯދާދީފައިވާ ކޯޗު ބުނީ އެއީ ކުޑަކުއްޖަކު ދުނިޔޭގެ އެންމެ އަގުބޮޑު އެއް ކާރު ކަމަށްވާ ފެރާރީ ބްރޭންޑްގެ ކާރެއް ގަންނަން އެދުމުން އެކަމާ އެއްބަސްވުން ފަދަ ކަމެއް ކަމަށެވެ.

އޭނާ ބުނީ ލިވަޕޫލް ވަރުގަދަ ކުރުމަށް އަންނަ ސީޒަން ފެށުމުގެ ކުރިން ފަސް ކުޅުންތެރިން ގަތުމަށް ކޮންމެ ކުޅުންތެރިއަކަށް 100 މިލިއަން ޕައުންޑް ހަރަދު ނުކުރެވޭނެ ކަމަށެވެ.

ލިވަޕޫލްގެ ނަތީޖާތައް މި ސީޒަނުގައި ވަނީ ވަރަށް ބޮޑަށް ދަށްވެފަ އެވެ. އަދި އަންނަ ސީޒަނުގައި ޔޫރަޕުގެ މުބާރާތަކުން ޖާގަ ނުލިބުމަކީ ވެސް ވުން ގާތްކަމެކެވެ. ނަމަވެސް ޓީމު ވަރުގަދަ ކުރުމަށް ބެލިންހަމް ގެނައުމުގެ ވިސްނުން އެ ޓީމުން މިހާރު ވަނީ ގާތްގަނޑަކަށް ދޫކޮށްލައިފަ އެވެ. މީގެ ބަދަލުގައި ޗެލްސީގެ މެންސަން މައުންޓަކީ ލިވަޕޫލުން ވަރަށް ބޭނުންވާ ކުޅުންތެރިއެކެވެ.