ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ އިންތިޚާބު އަންނަ އޭޕްރީލް މަހުގެ 12 ވަނަ ދުވަހަށް ފަސްކުރަން އެ އެސޯސިއޭޝަނުގެ އެންމެ ފަހުގެ އިންތިޚާބީ ރައީސް މުޙައްމަދު ލަތީފް ހުށަހެޅި ނަމަވެސް، އެ ގޮތަށް ކުރިއަށްދާން ކުލަބުތަކުން ބޭނުންނުވުމުން، އެފްއައިވީބީން އަންގާފައިވާ ގޮތަށް އިންތިޚާބު ބޭއްވުމަށް ނިންމައިފިއެވެ.

ދާދި ފަހުން ދުނިޔޭގެ ވޮލީބޯޅައިގެ މައި ޖަމުޢިއްޔާ (އެފްއައިވީބީ) އާއި އޭޝިއަން ވޮލީބޯލް ކޮންފެޑެރޭޝަން (އޭވީސީ) އިސްވެ އޮވެ އުފައްދާފައިވާ "އެޑްހޮކް ކޮމިޝަން" އިން ވަނީ ވީއޭއެމުގެ މައްސަލަ ނިންމައި، އައު އިންތިޚާބަކަށް ދިޔުމަށް ގައިޑްލައިނެއް އެކުލަވާލާފައެވެ. އެގޮތުން އެފްއައިވީބީގެ ނިންމުމާއެކު ވީއޭއެމުގެ އިންތިޚާބީ ކޮންގްރެސްއަށް ތައްޔާރުވުމުގެ ގޮތުން ބާއްވާ އެކްސްޓްރާ އޯޑިނަރީ ކޮންގްރެސް ބުދަ ދުވަހު ބޭއްވިއިރު، އިންތިޚާބީ ކޮންގްރެސް އަންނަ މަހުގެ އެއްވަނަ ދުވަހު ބޭއްވުމަށް އެފްއައިވީބީން ވަނީ އެދިފައެވެ.

އަދި މީގެ އިތުރުން އެފްއައިވީބީން ވަނީ ކުރިއަށް އޮތް އިންތިޚާބުގައި ވޯޓުލެވޭނީ 2015 ވަނަ އަހަރުން ފެށިގެން 2018 ވަނަ އަހަރާ ދެމެދުގެ ތެރެއިން، މަދުވެގެން ތިން އަހަރު ކޮންމެވެސް އެއް މުބާރާތެއްގައި ވާދަކޮށްފައިވާ ކުލަބުތަކަށް ކަމަށާއި، އެ ގޮތުން ތިން އަހަރުގައި ގަވާއިދުން އެއް މުބާރާތެއް ކުޅެފައިވަނީ ޖުމްލަ ނުވަ ކުލަބެއް ކަމަށް ނިންމާފައެވެ. އެ ކުލަބުތަކުގެ ތެރޭގައި ހިމެނެނީ ދިވެހި ސިފައިންގެ ކުލަބު، ޕޮލިސް ކުލަބު، އައްޑޫ ސްޕޯޓްސް ކުލަބު، ސްޕޯޓްސް ކުލަބު ހޯކްސް، ގުޑީސް ސްޕޯޓްސް ކުލަބު، މޯލްޑިވިއަން ސްޕޯޓްސް އެންޑް ރެކްރިއޭޝަން، ޔޫތު ނިއު ޖަނަރޭޝަން އަދި ކުލަބު ހާފް ލައިން ލިންކޭޖެވެ.

އެގޮތުން ބުދަ ދުވަހުގެ ހަވީރު ޒޫމް މެދުވެރިކޮށް އެކްސްޓްރާ އޯޑިނަރީ ކޮންގްރެސް ބޭއްވިއިރު، މި ކޮންގްރެސްގައި ވީއޭއެމުގެ ހިންގާ ކޮމިޓީ އާއި، އެފްއައިވީބީން އެކުލަވާލި އެޑްހޮކް ކޮމިޝަނުގެ މެންބަރުންނާއި، އޭވީސީ އާއި ވީއޭއެމުގެ މެންބަރު ކުލަބުތަކުގެ އިތުރުން ކޮމިޝަނާ އޮފް ސްޕޯޓްސް އަދި މޯލްޑިވްސް އޮލިމްޕިކް ކޮމިޓީ (އެމްއޯސީ) އިން ވަނީ ބައިވެރިވެފައެވެ.

މި ކޮންގްރެސް ޗެއާކުރެއްވި ލަތީފް ވަނީ ވީއޭއެމުގެ އިންތިޚާބުގެ ކަންތައްތައް ކުރިއަށްގެންދާނީ 2015 ވަަނަ އަހަރުގެ އަސާސީ ގަވާއިދުގައިވާ ގޮތަށް، ނޫނީ 2017 ވަނަ އަހަރު ގެނެވުނު ބަދަލުތަކާއެކު އޮތް އަސާސީ ގަވާއިދުގައިވާ ގޮތަށް ތޯ މެންބަރު ކުލަބުކުގެ މެދުގައި ވޯޓެއް ނަގާފައެވެ. އެހެންކަމުން ނުވަ ކުލަބުގެ މެދުގައި ބޭއްވި ވޯޓުން ހަ ކުލަބުގެ ތާއީދާއެކު ވަނީ 2015 ވަނަ އަހަރުގެ އަސާސީ ގަވާއިދާ އެއްގޮތަށް އިންތިޚާބު ކުރިއަށްގެންދަން ފާސްކޮށްފައެވެ.

ވީއޭއެމުގެ އިންތިޚާބީ ކޮންގްރެސް އަންނަ މަހުގެ އެއްވަނަ ދުވަހު ބޭއްވުމަށް އެފްއައިވީބީން އެދުނު ނަމަވެސް، ބުދަ ދުވަހު ކުރިއަށްދިޔަ ކޮންގްރެސްގައި ލަތީފް ވަނީ ކުރިއަށް އޮތް ލޯކަލް ކައުންސިލްތަކުގެ އިންތިޚާބުގައި އޭނާ ވާދަކުރައްވާތީ، ވީއޭއެމުގެ އިންތިޚާބު އަންނަ މަހުގެ 12 ވަނަ ދުވަހަށް ފަސްކޮށްދިނުމަށް އެދެފައެވެ. އެކަމަކު ވީއޭއެމުގެ މައްސަލަ އިތުރަށް ދިގުލައިގެންދާން ބޭނުނުން ނުވާތީ ކުލަބުތަކުން އެކަމަށް އެއްބަސްވެފައެއް ނުވެއެވެ.

އެހެންކަމުން އެފްއައިވީބީން އަންގާފައިވާ ގޮތަށް އިންތިޚާބު ބޭއްވުމަށް މި ކޮންގްރެސްގައި ވަނީ ނިންމާފައެވެ. އެކަމަކު ވީއޭއެމްގެ އިންތިޚާބުގައި ވޯޓުލުން ސިއްރުކުރަން ޖެހޭތީ، އިންތިޚާބު ބާއްވާނެ ގޮތަކާ މެދު ވަކި ގޮތެއް ނިންމާނީ ހެލްތު ޕްރޮޓެކްޝަން އޭޖެންސީ (އެޗްޕީއޭ) ލަފާގެ މަތިން ކަމަށް ލަތީފް ވަނީ ވިދާޅުވެފައެވެ.

ވީއޭއެމުގެ އައު އިންތިޚާބު ބޭއްވުމަށް ތައްޔާރުވަމުންދާއިރު، ކުރިއަށް އޮތް އިންތިޚާބުގައި ވާދަނުކުރައްވަން ލަތީފް މީގެ ކުރިން ވަނީ ނިންމަވާފައެވެ. އަދި މި އަހަރުގެ ފެބްރުއަރީ މަހުގެ 22 ވަނަ ދުވަހު ލަތީފުގެ ދައުރު ވަނީ ހަމަވެފައެވެ.