އެންރީކޭއާ އެއްވެސް މައްސަލަ އެއް ނުޖެހޭ ކަމަށް އެމްބާޕޭ ބުނެފި

ޕެރިސް ސެއިންޓް ޖާމަން (ޕީއެސްޖީ)ގެ ކޯޗު ލުއިސް އެންރީކޭއާ އެއްވެސް މައްސަލައެއް ނުޖެހޭ ކަމަށް، އެ ޓީމަށް ކުޅެމުން އަންނަ ފްރާންސްގެ ކީލިއަން އެމްބާޕޭ ބުނެފި އެވެ.

އޭނާ މިހެން ބުނީ ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ދެ ވަނަ ލެގުގައި ސްޕެއިންގެ ރެއާލް ސޮސިއެޑާޑް ބަލިކޮށް، ޕީއެސްޖީން ކުއާޓާ ފައިނަލްގެ ޖާގަ ހޯދި މެޗަށްފަހު އެވެ. އެ މެޗުގެ ކުރިން ޕީއެސްޖީން ފްރާންސް ލީގުގައި ކުޅުނު ދެ މެޗެއްގެ ވަކި ހިސާބަކުން އެންރީކޭ ވަނީ އެމްބާޕޭ ބަދަލުކޮށްފަ އެވެ.

އެއާއެކު ބައެއް މީޑިއާ ތަކުގައި ރިޕޯޓުކޮށްފައި ވަނީ، އެންރީކޭ އާއި އެމްބާޕޭއާ ދެމެދު އޮތް ގުޅުން ގޯސް ކަމަށެވެ. އަދި މެޗުތަކުގައި އެމްބާޕޭ ބަދަލު ކުރަން އެންރީކޭ ނިންމީ، މި ސީޒަނަށްފަހު އެމްބާޕޭ ކުލަބު ދޫކޮށްލަން ނިންމާފައިވާތީ ކަމަށް ވެސް ބުނެފައިވެ އެވެ. ނަމަވެސް އެންރީކޭ ވަނީ އެ ވާހަކަތައް ދޮގު ކޮށްފަ އެވެ.

އެމްބާޕޭ ބުނީ، އެންރީކޭއާ ދެމެދު ހުރިހާ ކަމެއް ވެސް އޮތީ ވަރަށް ރަނގަޅަށް ކަމަށެވެ. އޭނާއާ އޮންނަ ގުޅުން ރަނގަޅު ކަމަށާއި، އެއްވެސް މައްސަލައެއް ނުޖެހޭ ކަމަށް ވެސް އެމްބާޕޭ ބުންޏެވެ. އެކަން ފާހަގަކޮށް އޭނާ ބުނީ މީހުންނަށް ކޮންމެ ގޮތަކަށް ވެސް ހީކުރުމުގެ ފުރުސަތު އޮންނާނެ ކަމަށާއި، ނަމަވެސް އެއީ ހަގީގަތެއް ނޫން ކަމަށެވެ.

އިތުރަށް އެމްބާޕޭ ބުނީ އަބަދު ވެސް ބޭނުން ވަނީ ޗެމްޕިއަންސް ލީގުގައި އޭނާގެ އެންމެ މޮޅު ކުޅުން ދައްކަން ކަމަށާއި، އޭނާ އަށް ކުރެވޭ އެންމެ ރަނގަޅަށް މަސައްކަތް ކުރަން ބޭނުންވާ ކަމަށެވެ.