ރިއަލް އެސްޓޭޓް ވިޔަފާރީގެ ބިލު މަޖިލީހަށް ހުށަހަޅައިފި
ރިއަލް އެސްޓޭޓް ދާއިރާ ކުރި އެރުވުމާއި ޤާނޫނު ތަންފީޒުރުމުގެ މަސްޢޫލިއްޔަތު އަދި މޮނިޓަރ ކުރުން ފަދަ މުހިންމު ކަންކަމުގެ ތަފްސީލު ވަނީ މި ބިލުގައި ހިމަނާފައި
ރައްޔިތުންގެ މަޖިލީހުގެ ޖަލްސާގެ ތެރެއިން
ރިއަލް އެސްޓޭޓް ވިޔަފާރީގެ ބިލު މަޖިލީހަށް ހުށަހަޅައިފިއެވެ.
ސަރުކާރުގެ ފަރާތުން މި ބިލު ހުށަހަޅުއްވާފައި ވަނީ ތޮއްޑޫ ދާއިރާގެ މެންބަރު ހަސަން ޝިޔާންއެވެ.
މި ބިލު ހުށަހެޅުމުގެ ބޭނުމަކީ ދިވެހިރާއްޖޭގެ ރިއަލް އެސްޓޭޓް ވިޔަފާރީގެ ދާއިރާ ދެމެހެއްޓެނެވި ގޮތެއްގައި ތަރައްޤީކޮށް، އެ ވިޔަފާރި ހަރުދަނާކޮށް ކުރިއެރުވުން ކަމަށް ބިލުގައި ވަނީ ބުނެފައެވެ. އަދި ހާމަކަން ބޮޑު ޖަވާބުދާރީ ކުރުވޭނެ ނިޒާމެއްގެ ދަށުން އެ ވިޔަފާރި ހިންގޭނެ މަގުފަހިކުރުމަށްޓަކައި މަަސައްކަތް ކުރުމަކީ ވެސް މި ބިލުގެ މަޤްސަދެކެވެ. އަދި މި ބިލު ޤާނޫނަކަށް ވެގެން އަންނަ އިރު ރިއަލްއެސްޓޭޓް ދާއިރާގެ އިތުރު އުސޫލުތަކެއް ކަނޑައެޅުމަށް ބޭނުންވާ ޤާނޫނީ އޮނިގަނޑު އެކުލަވާލާނެއެވެ. އޮނިގަނޑު އެކުލަވާލާ ކަންކަމުގެ ތެރޭގައި
- ރިއަލް އެސްޓޭޓް ވިޔަފާރީގެ ދާއިރާގައި ހަރަކާތްތެރިވާ ޕްރޮމޯޓަރުންނާއި ޑިވެލޮޕަރުން ރަޖިސްޓްރީކުރުމުގެ އުސޫލްތަކާއި އެފަދަ މަޝްރޫޢުތައް ހިންގުމުގައި އެ ފަރާތްތަކުގެ ޒިންމާ ބަޔާންކުރުން
- ރިއަލް އެސްޓޭޓް ޕްރޮޖެކްޓްތަކުން ތަރައްޤީކުރާ ތަންތަން ގަންނަ ފަރާތްތަކުގެ މަސްލަހަތު ރައްކާތެރިކުރުމުގެ އުސޫލު ބަޔާންކުރުން
- ރިއަލް އެސްޓޭޓް ވިޔަފާރީގައި ހަރަކާތްތެރިވާ އެންމެހާ ފަރާތްތަކުން ޝަކުވާ ހުށަހެޅުމާއި ޤާނޫނާ ޚިލާފުވާ ފަރާތްތަކާއި މެދު ފިޔަވަޅު އެޅޭނެ ނިޒާމެއް ޤާއިމްކުރުމާއި ބެހޭ އުސޫލްތައް ބަޔާންކުރުން ހިމެނެއެވެ.
މި ބިލު އެކުލަވާލާފައި ވަނީ 10 ބާބުގެ މައްޗަށެވެ. އަދި ބިލުގައި 64 މާއްދާ ހިމެނެއެވެ.
މި ބިލުގައި ރިއަލް އެސްޓޭޓާއި ގުޅޭ ވިޔަފާރިތަކުގެ ގިނަ ތަފްސީލްތަކެއް ހިމަނާފައިވެއެވެ. އެގޮތުން ރިއަލް އެސްޓޭޓަކީ ކޮބާކަމާއި، މަހްފޫމްތަކުގެ އަސާސް ތަފްސީލުކޮށް ބުނެދީފައިވެއެވެ. ހަމައެހެންމެ ރިއަލް އެސްޓޭޓް ޕްރޮޖެކްޓްތަކަކީ ކޮބާ ކަމާއި، އިމާރާތާއި، އާއްމު ސަރަހައްދާއި، އާއްމު ވަސީލަތް، އެލޮޓްމެންޓުން، ޑިވެލޮޕަރ، ޔުނިޓުގެ ވެރި ފަރާތް، ޔުނިޓުގެ ވެރިފަރާތް، ޔުނިޓުގެ ވެރިފަރާތުގެ ޖަމިއްޔާ، ޕްރޮމޯޓަރަކީ ކޮބައިކަމާއި އެ ފަރާތްތަކުގެ ދައުރު ތަފްސީލްކޮށް ބަޔާންކޮށްފައިވެއެވެ. ހަމައެހެންމެ ރިއަލް އެސްޓޭޓް ދާއިރާ ކުރި އެރުވުމާއި، ޤާނޫނު ތަންފީޒުރުމުގެ މަސްޢޫލިއްޔަތު އަދި މޮނިޓަރ ކުރުން ފަދަ މުހިންމު ކަންކަމުގެ ތަފްސީލު ވަނީ މި ބިލުގައި ހިމަނާފައެވެ. މި ބިލުގައި އެ ދާއިރާގައި މަސައްކަތް ކުރާ ފަރާތްތަކުގެ ހައްގުތަކަށް ވެސް އަލިއަޅުވާލާފައިވެއެވެ.
