މަޖިލިސް އިންތިޚާބު އާދިއްތަ ދުވަހު ބާއްވާ ސަބަބު އީސީގެ ރައީސް އޮޅުންފިލުއްވައިދެއްވައިފި

ރައްޔިތުންގެ މަޖިލިސް އިންތިޚާބު 21 އޭޕްރީލް 2024ވާ އާދިއްތަ ދުވަހު ބާއްވާ ސަބަބު އިލެކްޝަންސް ކޮމިޝަން (އީސީ)ގެ ރައީސް ފުއާދު ތައުފީގް އޮޅުންފިލުއްވައިދެއްވައިފިއެވެ.

މަޖިލީހުގެ އިންތިޚާބު އާދިއްތަ ދުވަހެއްގައި ބާއްވަން ނިންމާފައިވާތީ، އެކަމާ ގުޅިގެން އާންމުންގެ ފާޑުކިޔުން އިލެކްޝަން ކޮމިޝަނަށް ވަނީ އަމާޒުވެފައެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން އީސީއަށް ނުފޫޒު ފޯރުވަމުންދާ ކަމަށް ވެސް ބައެއް ސިޔާސީ ފަރާތްތަކުން ތުހުމަތުކޮށްފައި ވެއެވެ. ފަހަކަށްއައިސް ރާއްޖޭގައި ބޭއްވި ހުރިހާ އިންތިޚާބެއް ބާއްވަމުންދަނީ ސަރުކާރު ބަންދު ދުވަހެއް ކަމަށްވާ ހޮނިހިރު ދުވަހު ކަމަށާއި، އާދިއްތަ ދުވަހު އިންތިޚާބު ބާއްވަން ނިންމާފައިވަނީ ކޮން މަގުސަދެއްގައި ކަން ސާފުކޮށްދިނުމަށް ވެސް ބައެއް އާއްމު ރައްޔިތުން އެދިފައިވެއެވެ.

Advertisement

އީސީއަށް ފާޑުކިޔުންތައް އަމާޒުވެފައިވަނިކޮށް ފުއާދު ވިދާޅުވީ، އޭޕްރިލް މަހުގެ 21ގައި އިންތިޚާބު ބާއްވަނީ، އެއީ ރޯދަމަސް ނިމިގެން 10 ދުވަސް ދިނުމަށްފަހު ލިބޭ ފުރަތަމަ ދުވަސް ކަމަށްވާތީ ކަމަށެވެ. އަދި އިތުރަށް ލަސްކޮށްފިނަމަ، ގާނޫނުގައި ވާގޮތަށް، މިހާރު އޮތް މަޖިލިސް އުވުމުގެ އެއް މަސް ދުވަސް ކުރިން އައު މަޖިލިސް ނުހޮވިދާނެތީ ކަމަށް ފުއާދު ވިދާޅުވިއެވެ.

މަޖިލިސް އިންތިޚާބު އޭޕްރީލް 21ގައި ބާއްވަން އީސީން ނިންމާފައިވަނީ ރޯދަ މަހު އިންތިޚާބުތައް ބޭއްވުން މަނާވާ ގޮތަށް އިންތިޚާބުތަކާބެހޭ އާންމު ގާނޫނަށް ގެނައި އިސްލާހުގެ ބިލު، ރައީސް ޑރ. މުހައްމަދު މުއިއްޒު ތަސްދީގުކުރެއްވުމާ ގުޅިގެންނެވެ. 20 ވަނަ ރައްޔިތުންގެ މަޖިލީހުގެ އިންތިޚާބު ބާއްވަން ކުރިން ކަނޑައަޅާފައި އޮތީ މާޗު މަހުގެ 17 ވަނަ ދުވަހުއެވެ.

އިންތިޚާބު ލަސްވުމާ ގުޅިގެން އީސީން ބުނެފައިވަނީ މަޖިލިސް އިންތިޚާބާ ގުޅިގެން ނިމިފައި ހުރި ކަމަކަށް ބަދަލެއް ނާންނާނެކަމަށާ ރީ-ރަޖިސްޓްރޭޝަނަށް ގާތްގަނޑަކަށް އިތުރު 3 ދުވަސް ދޭނެކަމަށެވެ. މަޖިލީހުގެ އިންތިޚާބު ބާއްވާ ތާރީޚު ފަސްކުރުމުން 560 ޒުވާނުންނަށް އަލަށް ވޯޓު ލުމުގެ ހައްގު އިތުރަށް ލިބިގެންދާކަމަށް ކޮމިޝަނުން މައުލޫމާތުދެއެވެ.