އެތްލެޓިކޯ މެޑްރިޑް ވެސް ކަޓުވާލާ، އެތްލެޓިކް ބިލްބާއޯ ސްޕެނިޝް ކަޕް ފައިނަލަށް

އެތްލެޓިކޯ މެޑްރިޑް ވެސް ކަޓުވާލާ، އެތްލެޓިކް ބިލްބާއޯ ސްޕެނިޝް ކަޕް ފައިނަލަށް ދަތުރުކޮށްފި އެވެ.

ރެއާލް މެޑްރިޑާއި ބާސެލޯނާ ވެސް މުބާރާތުން ކަޓުވާލި އެތްލެޓިކް ބިލްބާއޯ އިން އެތްލެޓިކޯ މެޑްރިޑް ކަޓުވާލީ ސެމީފައިނަލް ދެވަނަ ލެގުގައި 3-0 ން ކުރި ހޯދައިގެންނެވެ. ފުރަތަމަ ލެގުވެސް 1-0 ން ކާމިޔާބުކުރި އެވެ. އެތްލެޓިކޯ މެޑްރިޑް ކަޓުވާލުމުގައިވެސް މުހިއްމު ދައުރެއް އަދާކުރީ ވިލިއަމްސްގެ ދެބެންނެވެ. 13 ވަނަ މިނިޓްގައި ފުރަތަމަ ލަނޑު ޖެހީ އިނާކީ ވިލިއަމްސް އެވެ. އޭނާއަށް ފުރުޞަތު ތަނަވަސްކޮށްދިނީ ނީކޯ ވިލިއަމްސްއެވެ. އަދި ދެވަނަ ލަނޑު 42 ވަނަ މިނިޓްގައި ޖެހީ ނީކޯ ވިލިއަމްސް އެވެ. ފުރުޞަތު ތަނަވަސްކޮށްދިނީ އިނާކީ ވިލިއަމްސް އެވެ. ފަހު ލަނޑު ޖެހީ ގުރުޒެޓާ އެވެ. މެޗު ކުޅުނީ 52000 ވުރެ ގިނަ ސަޕޯޓަރުންގެ ކުރިމަތީގަ އެވެ.

ފައިނަލްގައި އެތްލެޓިކް ބިލްބާއޯ ވާދަކުރާނީ ރެއާލް މަޔޯކާ އާއެވެ. މަޔޯކާ ފައިނަލްގެ ޖާގަ ހޯދީ ސެމީފައިނަލް ދެވަނަ ލެގުގައި ޕެނަލްޓީގައި ރެއާލް ސޮސިއެޑާޑް ބަލިކޮށްގެންނެވެ. މަޔޯކާ އަކީ ލަލީގާ ތާވަލްގެ 16 ވަނައިގައި އޮތް ޓީމެވެ. އެތްލެޓިކް ބިލްބާއޯ އޮތީ ފަސް ވަނައިގަ އެވެ.