މަކިޓާ އެތްލެޓިކްސް މުބާރާތް: އެޗްޑީއެޗް އަދި ޖީއެންއޭސީ ޗެމްޕިއަންކަން ހޯދައިފި

10 ވަނަ އެޓޯލް ޖޫނިއާ ޗެމްޕިއަންޝިޕް އެތްލެޓިކްސް މުބާރާތުގެ ފިރިހެން ބައިގެ ޗެމްޕިއަންކަން ހދ.އެޓޯލް އެޑިއުކޭޝަން ސެންޓަރު (އެޗްޑީއެޗް) އިން ހޯދިއިރު، އަންހެން ބައިގެ ޗެމްޕިއަންކަން ޏ.އެޓޯލް އެޑިއުކޭޝަން ސެންޓަރު (ޖީއެންއޭސީ) އިން ހޯދައިފި އެވެ.

އައްޑޫ ސިޓީ ހިތަދޫގައި ކުރިޔަށްދިޔަ މި މުބާރާތުގެ 13 އަހަރުން ދަށުގެ ފިރިހެން ބައިން އެންމެ މޮޅު އެތްލީޓަކަށް ޏ.އެޓޯލް އެޑިއުކޭޝަން ސެންޓަރުގެ އަހުމަދު ޝައްޔިރު ނާޒިމް ޖަލީލު ހޮވުނުއިރު، 13 އަހަރުން ދަށުގެ އުމުރު ފުރައިގެ އަންހެން ބައިން އެންމެ މޮޅު އެތުލީޓަކަށް ހޮވުނީ ހދ.އެޓޯލް އެޑިއުކޭޝަން ސެންޓަރުގެ ރިފާ މުހައްމަދު އެވެ. އަހުމަދު ޝައްޔިރު ތިން ރަން މެޑަލް ހޯދިއިރު، ރިފާ ވަނީ ދެ ރަން މެޑަލް އަދި އެއް ރިހި މެޑަލް ހޯދާފައެވެ.

މުބާރާތުގެ 16 އަހަރުން ދަށުގެ ފިރިހެން ބައިގެ އެންމެ މޮޅު އެތްލީޓަކަށް ޒެފިއަސް ސްޕޯޓްސް ކްލަބްގެ މުހައްމަދު މުނާޒު އަލީ ހޮވުނުއިރު، 16 އަހަރުން ދަށޫގެ އަންހެން ބައިން އެންމެ މޮޅު އެތްލީޓަކަށް ހޮވުނީ ސ.ހިތަދޫ ސްކޫލްގެ އައިޝަތު ހިމްނާ ހަސަން އެވެ. މުނާޒު ތިން ރަންމެޑަލް ހޯދާފައިވާއިރު، ހިމްނާވެސް ވަނީ ތިން ރަން މެޑަލް ހޯދާފައެވެ.

މުބާރާތުގެ 19 އަހަރުން ދަށުގެ ބައިން އެންމެ މޮޅު ފިރިހެން އެތްލީޓަކަށް ޒެފިއަސް ސްޕޯޓްސް ކްލަބްގެ ސަރީސް އަހުމަދު ހޮވުނުއިރު، 19 އަހަރުން ދަށުގެ އެންމެ މޮޅު އަންހެން އެތްލީޓަކަށް ހޮވިފައިވަނީ ޖަމާލުއްދީން ސްކޫލްގެ ނަޝާ ނިޒާރެވެ. ސަރީސް ދެ ރަން މެޑަލް އަދި ސިލްވާ މެޑަލްއެއް ހޯދިއިރު، ނަޝާ ވަނީ ތިން ރަން މެޑަލް ހޯދާފައެވެ.

މި މުބާރާތުގެ 13 އަހަރުންދަށުގެ ފިރިހެން ބައިން ހާފިޒު އަހުމަދު ސްކޫލް ޗެމްޕިއަންކަން ހޯދިއިރު، އެ އުމުރު ފުރައިގެން އަންހެންބައިން ޗެމްޕިއަންކަން ހޯދީ ހދ. އެޓޯލްސް އެޑިޔުކޭޝަން ސެންޓަރެވެ. 16 އަހަރުން ދަށުގެ އުމުރު ފުރައިގެ ފިރިހެން ބައިގެ ޗެމްޕިއަންކަން ގދ. އެޓޯލްސް އެޑިޔުކޭޝަން ސެންޓަރު ހޯދިއިރު، އެ އުމުރު ފުރައިގެ އަންހެން ބައިގެ ޗެމްޕިއަންކަން ހޯދީ ޏ.އެޓޯލްސް އެޑިޔުކޭޝަން ސެންޓަރެވެ. 19 އަހަރުން ދަށުގެ އުމުރު ފުރައިގެ ފިރިހެން ބައިގެ ޗެމްޕިއަންކަން ޏ.އެޓޯލްސް އެޑިޔުކޭޝަން ސެންޓަރު ހޯދިއިރު، އެ އުމުރު ފުރައިގެ އަންހެން ބައިގެ ޗެމްޕިއަންކަން ހޯދީ އައްޑޫހައިސްކޫލެވެ.

މުބާރާތުގެ ފިރިހެން ބައިން އެންމެ މޮޅު އެތުލީޓަކަށް ޒިފިއަސް ސްޕޯޓްސްކުލަބު މުހައްމަދު މުނާޒު އަލީ ހޮވުނުއިރު، އެންމެމޮޅު އަންހެން އެތުލީޓަކަށް ހޮވުނީ ހިތަދޫ ސްކޫލުގެ އައިޝަތު ހިމްނާ ހަސަނެވެ. މުބާރާތުގައި މުނާޒު ވަނީ ތިން ރަން މެޑެލްއާއެކު ރެކޯޑެއް ހަދާފައެވެ. މީގެއިތުރުން ހިމްނާ ވަނީ ތިން ރަން މެޑަލް ހޯދައިގެން މުބާރާތުގައި ދެ ރެކޯޑެއް ހަދާފައެވެ.