ފައިސާ ޗާޕުކުރުން ހުއްޓާލީ މި ސަރުކާރަކުން ނޫން، މިދިޔަ ސަރުކާރުން: އީސަ
އެމްޑީޕީގެ ސަރުކާރުން، 2022 ވަނަ އަހަރުގެ ނޮވެމްބަރުގެ ތެރޭގައި ފައިސާ ޗާޕު ނުކުރުމަށް ނިންމައި، 31 ޑިސެމްބަރު 2023 އިން ފެށިގެން އެކަން މުޅިން ހުއްޓާލަން އޮތީ ނިންމާފައި
އެމްޑީޕީގެ "މިސްރާބު ހަމަމަގަށް"ގެ ތަރުޖަމާނު އަދި ކެނދިކުޅުދޫ ދާއިރާގެ މެންބަރު އަހްމަދު އީސަ
ސަރުކާރުން ފައިސާ ޗާޕުކުރުން ނިމުމަކަށް ގެނައީ ރައީސް ޑރ. މުޙައްމަދު މުޢިއްޒުގެ މި ސަރުކާރުން ނޫން ކަމަށާއި، އެކަން ނިމުމަކަށް ގެނައީ ކުރީގެ ސަރުކާރުން ކަމަށް އެމްޑީޕީގެ "މިސްރާބު ހަމަމަގަށް"ގެ ތަރުޖަމާނު އަދި ކެނދިކުޅުދޫ ދާއިރާގެ މެންބަރު އަހްމަދު އީސަ ވިދާޅުވެއްޖެއެވެ.
ސަރުކާރުން ފައިސާ ޗާޕުކުރުން ހުއްޓާލީ މި ސަރުކާރުން ކަމަށް ވިދާޅުވެ، ރައީސް މުއިއްޒު އަދި ސަރުކާރުގެ ވަޒީރުންނާއި ސަރުކާރަށް ތާއީދުކުރާ މެންބަރުން ގެންދަވަނީ އެކަމުގެ ވާހަކަ ވަރަށް ބޮޑަށް ދައްކަވަމުންނެވެ. އެގޮތުން ކުރީގެ ސަރުކާރުން އިގްތިސާދީ އެކި ބޭނުންތަކަށް ފައިސާ ޗާޕުކުރުމުގެ ސަބަބުން، ތަކެތީގެ އަގު ހިފެހެއްޓުމާއި އިގްތިސާދީ ކުރިއެރުން ހޯދުމުގައި ދަތިތައް ކުރިމަތިވާ ކަމަށް ވިދާޅުވެ، އެ ސަރުކާރަށް މި ސަރުކާރުގެ އިސް ބޭފުޅުން ގެންދަވަނީ ފާޑު ވިދާޅުވަމުންނެވެ.
އެކަމަށް އިޝާރަތްކުރައްވަމުން އީސަ ވިދާޅުވީ، ރައީސް މުއިއްޒު ވަޑައިގަންނަވާ ކޮންމެ ރަށެއްގައި ފައީސާ ޗާޕުކުރުން ހުއްޓާލީ މި ސަރުކާރުންކަމަށް ވިދާޅުވާ ވިދާޅުވުމަކީ، ރައްޔިތުންނަށް އޮޅުވާލައި އިތުރުފުޅު ހައްދަވަން ވިދާޅުވާ ވާހަކަތަކެއް ކަމަށެވެ. އަދި ފައިސާ ޗާޕުކުރުން ހުއްޓާލީ މިދިޔަ ސަރުކާރުންކަން ދައުލަތުގެ ރަސްމީ ލިޔެކިޔުންތައް ބެލުމުން ފެންނާނެ ކަމަށް އީސަ ވިދާޅުވިއެވެ.
އެގޮތުން އެމްޑީޕީގެ ސަރުކާރުން، 2022 ވަނަ އަހަރުގެ ނޮވެމްބަރުގެ ތެރޭގައި ފައިސާ ޗާޕު ނުކުރުމަށް ރަސްމީކޮށް ނިންމައި، 31 ޑިސެމްބަރު 2023 އިން ފެށިގެން އެކަން މުޅިން ހުއްޓާލަން ނިންމާފައި އޮތް ކަން ފިނޭންސް މިނިސްޓްރީގެ ލިޔެކިޔުންތަކާއި ރައީސުލްޖުމްހޫރިއްޔާގެ އޮފީހުގެ ނިންމުންތަކާއި އަދި މަޖިލީހުގެ ނިންމުންތަކުން ފެންނާނެ ކަމަށް އީސަ ވިދާޅުވިއެވެ.
އީސަ ވިދާޅުވީ ރައީސް މުއިއްޒު ގެންދަވަނީ ކޮންމެ ދުވަހަކު ވެސް ދޮގު ދޮލަނގަށް، ދޮގެއް އިތުރު ކުރައްވަމުން ކަމަށެވެ. އަދި އޭގެ ތެރެއިން ފައިސާ ޗާޕުކުރުން ހުއްޓާލީ އެބޭފުޅުން ކަމަށް ވިދާޅުވުމަކީ ވެސް އިތުރު ދޮގެއް ކަމަށް އީސަ ވިދާޅުވިއެވެ.
