ގަލޮޅު ދަނޑުގައި ހިނގި މާރާމާރީއާއި ގުޅިގެން ހައްޔަރު ކުރި 13 މީހަކު ދޫކޮށްލައިފިއެވެ.

ފުލުހުން ބުނީ ފެބްރުއަރީ 7 ވަނަ ދުވަހު ގަލޮޅު ދަނޑުގައި ވިކްޓްރީ ސްޕޯޓްސް ކުލަބާއި ކުޑަހެންވޭރު ސްޕޯޓްސް ކުލަބު ބައްދަލުކުރި މެޗްގެ ކުޅުން ކުރިއަށްދަނިކޮށް ބަޔަކު މީހުން ދަނޑު މައްޗަށް އަރައި ހަމަނުޖެހުން ހިންގައި، ވިކްޓްރީ ސްޕޯޓްސް ކުލަބުގެ ކުޅުންތެރިންނާ އޮފިޝަލުންނާ މެދު މާރާމާރީ ހިންގި މައްސަލައިގައި ޖުމުލަ 16 މީހަކު ހައްޔަރުކުރި ކަމަށެވެ.

އެމީހުންގެ ތެރެއިން މިވަގުތު ފުލުހުންގެ ބަންދުގައި ތިބީ 3 މީހުން ކަމަށް ފުލުހުން ބުނެއެވެ. އެމީހުންގެ ބަންދާ މެދު ގޮތެއް ނިންމުމަށް ފެބްރުއަރީ 18 ވަނަ ދުވަހު ކްރިމިނަލް ކޯޓަށް ހާޒިރުކުރުމުން 15 ދުވަހަށް ބަންދުކުރުމަށް ވަނީ އަމުރުކޮށްފައެވެ.

ފުލުހުން ބުނީ ދެންތިބި 13 މީހުންގެ ތެރެއިން ބައެއް މީހުން ދޫކޮށްލައި އަދި އަނެއްބައި މީހުން ޝަރުތުތަކާއެކު ދޫކޮށްލާފައިވާ ކަމަށެވެ.

މި މައްސަލަ ފުލުހުން ދަނީ ތަހުގީގުކުރަމުންނެވެ.