ރައީސް ޔާމީންގެ ޕާޓީ، ޕީއެންއެފް ރަޖިސްޓްރީ ކުރުމަށް ފޯމުތައް ހުށަހަޅައިފި
28 ފެބުރުއަރީ 2024 | ބުދަ 00:52ޕީއެންއެފް އުފެއްދުމުގެ ހުއްދަ އީސީން ދިންތާ ގާތްގަޑަކަށް ތިން މަސް ފަހުން ފޯމުތައް އެ ކޮމިޝަނަށް ހުށަހަޅާފައިވަނީ އަންގާރަ ދުވަހު
ޕީއެންއެފް އުފެއްދުމުގެ ތެރެއިން
ކުރީގެ ރައީސް އަބްދުﷲ ޔާމީން އިސްވެ ހުންނަވައިގެން އުފައްދަވާ ޕާޓީ، ޕީޕަލްސް ނޭޝަނަލް ފްރޮންޓް (ޕީއެންއެފް) އުފެއްދުމަށް ބޭނުންވާ ފޯމުތައް އިލެކްޝަންސް ކޮމިޝަނަށް ހުށަހަޅައިފިއެވެ.
ޕީއެންއެފް އުފެއްދުމުގެ ހުއްދަ އީސީން ދިންތާ ގާތްގަޑަކަށް ތިން މަސް ފަހުން ފޯމުތައް އެ ކޮމިޝަނަށް ހުށަހަޅާފައިވަނީ އަންގާރަ ދުވަހުއެވެ. އެގޮތުން ރަޖިސްޓްރީ ކުރުމަށް 3،200 ފޯމު އެ ކޮމިޝަނަށް ހުށަހަޅާފައިވެއެވެ.
އެކަމުގެ އިތުރު މައުލޫމާތު ދެއްވަމުން އެ ޕާޓީގައި އިސްކޮށް ހަރަކާތްތެރިވާ ކުރީގެ ޔޫތް މިނިސްޓަރު މަލީޙް ވިދާޅުވީ، ޕީއެންއެފް އުފެއްދުމަށް ބޭނުންވާ އަދަދަށް އީސީއަށް ފޯމު ހުށަހަޅާފައިވާ ކަމަށެވެ. އަދި އުންމީދަކީ ޖަލްސާ ބޭއްވުމުގެ ހުއްދަ އީސީގެ ފަރާތުން އަވަހަށް ލިބުން ކަމަށް އޭނާ ވިދާޅުވިއެވެ.
ސިޔާސީ ޕާޓީއެއް ރަޖިސްޓްރީ ކުރުމަށް ބޭނުންވަނީ މަދުވެގެން 3،000 މެންބަރުންގެ ސޮއި ހިމެނޭ ފޯމުތަކެވެ. އެ އަދަދަށް ފޯމު ހަމަކޮށް ޕީއެންއެފް އިން އީސީއަށް ފޯމުތައް ހުށަހެޅި ނަމަވެސް، އެ ޕާޓީއަށް ވަންނަން ބޭނުންވާ އިތުރު ގިނަ ފަރާތްތަކެއް ތިބި ކަމަށް މަލީހް މީގެ ކުރިން ވިދާޅުވެފައިވެއެވެ.
އެގޮތުން 3،200 ފޯމު އީސީއަށް ހުށަހަޅާފައިވަނީ އެ ކޮމިޝަނަށް ފަސޭހަ ކުރުމުގެ ގޮތުން ކަމަށް މަލީހް ވިދާޅުވިއެވެ.
ޕީއެންއެފް އަކީ ރައީސް ޑރ. މުޙައްމަދު މުއިއްޒު އާއި ރައީސް ޔާމީނާ ދެމެދު އުފެދުނު ނުތަނަވަސްކަމުގެ ތެރެއިން، އޭރު ޕީޕީއެމް-ޕީއެންސީ ނުވަތަ ކޮންގްރެސް ކޯލިޝަނުގެ އިސް ލީޑަރެއްގެ ގޮތުގައި ހުންނެވި ރައީސް ޔާމީން ކުއްލި ގޮތަކަށް އުފެއްދެވި ޕާޓީއެކެވެ. މިހާރު ޕީޕީއެމް އަދި ޕީއެންސީގެ ކޯލިޝަނުގެ އިސް ލީޑަރެއްގެ ގޮތުގައި ހުންނަވަނީ ރައީސް މުއިއްޒުއެވެ.
