މަހުން ނަގާ ޑިއުޓީ ކުޑަކުރަން މި ސަރުކާރުން މަސައްކަތެއް ނުކުރޭ، ރާއްޖެއަށް ފައިދާވާނެ އެއްބަސްވުމެއްގައި ސޮއި ނުކުރޭ - ރައީސް ޞާލިހް

މަހުން ނަގާ ޑިއުޓީ ކުޑަކުރަން މި ސަރުކާރުން މަސައްކަތެއް ނުކުރާ ކަމަށާއި، ރާއްޖެއަށް ފައިދާވާނެ އެއްބަސްވުމެއްގައި ސޮއި ނުކުރާ ކަމަށް އެމްޑީޕީގެ އެޑްވައިޒަރު އަދި ކުރީގެ ރައީސް އިބްރާހިމް މުހައްމަދު ޞާލިހް ވިދާޅުވެއްޖެއެވެ.

އެމްޑީޕީގެ ފަރާތުން 20 ވަނަ ރައްޔިތުންގެ މަޖިލީހަށް ވާދަކުރާ އެމްޑީޕީގެ ކެންޑިޑޭޓުންގެ ކެމްޕޭން ފެށުމަށް އާޓިފިޝިއަލް ބީޗްގައި ބޭއްވި ޖަލްސާފައި ވާހަކަފުޅުދައްކަވަމުން ރައީސް ޞާލިހް ވިދާޅުވީ ގައުމުގެ ހާލަތު މިއަދު އިހުސާސްކުރެވޭ ކަމަށެވެ. މިއަދު ބަލަން ތިބެވޭކަށް ނެތް ކަމަށާއި، މިސްރާބު ކަސިޔާރުވެ ހަމަމަގުން ނައްޓާލައިފި ކަމަށެވެ. މި ސަރުކާރުން ދޮގު ހަދައި އޮޅުވާލައިފި ކަމަށާއި، ސަރުކާރު ހަމަ މަގަށް ނާޅުވައިފިނަމަ މާދަމާވެސް ދޮގު ހަދާ އޮޅުވާލާނެ ކަމަށެވެ. މީގެ އިތުރުން މަސްވެރިންނަށް ދޮގު ހަދައިފި ކަމަށާއި، ގޯއްޗާއި ފުލެޓް ލިބުނު މީހުންނަށް އޮޅުވާލައިފި ކަމަށެވެ. ޕްރޮޖެކްޓްތައް ހުއްޓާލާ ސިޔާސީ ވަޒީފާތައް އިންތިހާއަށް އިތުރުކޮށްފި ކަމަށެވެ.

މީގެ އިތުރުން ހާރިޖީ ގުޅުންތައް ގައުމުތަކާއި ކެނޑި، ބާކީވަމުންދާ ކަމަށެވެ. މިއީ މަޖިލިސް އިންތިހާބު ބޮޑު އަގުލަބިއްޔަތަކުން ކާމިޔާބުކުރަންޖެހޭ ބައެއް ސަބަބުތައް ކަމަށެވެ.

ރައީސް ޞާލިހް ވިދާޅުވީ މަހުން ނަގާ ޑިއުޓީ ކުޑަކުރުމުގެ މަސައްކަތްތަކެއް މިސަރުކާރުން ކުރިއަށް ނުގެންދިޔަ ކަމަށެވެ. ވާހަކަ ދައްކާނެ ބޭރުގެ ގައުމެއް ނެތް ކަމަށާއި، ފަހަރެއްގައި ގައުމެއް ދެގައުމެއް އޮވެދާނެ ކަމަށެވެ. އެހެންނަމަވެސް ރާއްޖެއަށް ފައިދާވާކަހަލަ މަސައްކަތެއް، ހާއްސަކޮށް މަސްވެރިންނަށް ފައިދާވާނެ އެއްބަސްވުމެއް ހަދާތަން ނުފެންނަ ކަމަށެވެ.

ރައީސް ޞާލިހް ވިދާޅުވީ އެންމެ ފުރަތަމަވެސް މި ސަރުކާރުން ކުރެއްވި ގޯސްކަމަކީ މިފްކޯ އެސްޓީއޯގެ ދަށުން ވަކިކުރެއްވުން ކަމަށެވެ. އަދި އެމަނިކުފާނުގެ ސަރުކާރުގައި ވެސް ތިން ހަތަރު ފަހަރު އެ ފީސިބިލިޓީ ހަދައިގެން ގެނައި ކަމަށާއި، ނަމަވެސް އެއީ އެންމެ ރަނގަޅުގޮތް ކަމަށް ގަބޫލެއް ނުކުރައްވާ ކަމަށެވެ.

ރައީސް ޞާލިހް ވިދާޅުވީ އެސްޓީއޯގެ ދަށުގައި މިފްކޯ އޮތް ނަމަ ބޭންކުތަކުން ލޯނު ލިބޭނެކަމަށާއި، ނަމަވެސް މިއަދު މިފްކޯއަކަށް ފައިސާދޭނެ ބޭންކެއް ނުހުންނާނެ ކަމަށެވެ. އަދި މިފްކޯ ވަކިކުރުމަކީ ގޯހެއް ކަމަށް އައިއެމްއެފްއާއި ވޯލްޑް ބޭންކުންވެސް ބުނަމުންދާ ކަމަށާއި، ދެންވެސް ކުރަންވީ ކަމަކީ އެ ބަދަލު އަވަހަށް ގެނައުން ކަމަށް ރައީސް ޞާލިހް ވިދާޅުވިއެވެ.