މި ސަރުކާރުން ބަޖެޓުގައި ފައިސާ ނެތިގެން މަޝްރޫޢުތައް ނުހިންގޭ ކަމަށް ބުނަނީ ރައްޔިތުންނަށް އޮޅުވާލަން ވެގެން ކަމަށް ހަނިމާދޫ ދާއިރާގެ މެމްބަރު އަބްދުލް ޣަފޫރު މޫސާ ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަ ސުރުހީޕްރޮގްރާމްގައި ވާހަކަދައްކަވަމުންނެވެ. އޭނާ ވިދާޅުވީ މި އަހަރަކީ އާމްދަނި އިތުރުވާނެ އަހަރެއްކަމަށާއި ބަޖެޓު ނެތިގެން ކަމަށް ބުނެ މަޝްރޫޢުތައް ހުއްޓާލުމަކީ ބަލައިގަނެވޭކަމެއް ނޫން ކަމަށެވެ. އަދި ބަޖެޓުގައި ހިމެނިފައިވާ ކަމެއް ނުވާންވީ ސަބަބެއް ނެތް ކަމަށް އޭނާ ވިދާޅުވިއެވެ.
ސަރުކާރުން ވަނީ ޕީއެސްއައިޕީ ބަޖެޓުގައި ހިމެނޭ މަޝްރޫޢުތައް ޕްރޮކިއުމެންޓް އަދި ޓެންޑަރ ކުރުމުގެ މަސައްކަތް ވެސް ހުއްދަ އާއި ނުލާ ނުކުރުމަށްއަންގާފައެވެ. މިނިސްޓްރީން ވަނީ ޚަރަދުތައް ކުރުމަށް ހުއްދަ އަށް އެދޭ ނަމަ ހުށަހަޅަންވާ ގޮތުގެ ތަފްސީލްވެސް އިދާރާތަކާއި ހިއްސާކޮށްފައެވެ. މީގެ އިތުރުން ފިނޭންސް މިނިސްޓްރީން ވަނީ ކައުންސިލްތަކުންވެސް ބްލޮކް ގްރާންޓާއި އަމިއްލަ އާމްދަނީ މެދުވެރިކޮށް އަދި ކައުންސިލްގެ ބަޖެޓުން ޚަރަދު ހަމަޖެއްްސުމަށް އެދިފައެވެ. އެ ސަރކިއުލާ އަކީ ނެރެންޖެހޭ ސަރކިއުލާ އެއް ކަމަށް ޤަބޫލު ނުކުރައްވާ ކަމަށް އޭނާ ވަނީ ވިދާޅުވެފައެވެ.
ސަރުކާރުން ބޭނުންވާ ކަންކަން މިހާރުވެސް ކޮށްދޭނެ ކަމަށް ބުނަމުންދާ ކަމަށާއި، ބަޖެޓު ނެތް ކަމަށް ބުނެ ދައްކަނީ ހަމަޖެހޭ ވާހަކަ އެއް ނޫން ކަމަށް އޭނާ ވަނީ ވިދާޅުވެފައެވެ.
ސަރކިއުލާ އައި ފަހުން ވެސް ސިޔާސީ މަޤާމުތަކަށް ވެސް މީހުން ނަގާ. ސިވިލް ސަރވިސް އަށް ވެސް މީހުން އެބަ ނަގާ. ކަން ހިނގާ ލިޔެކިޔުމުން މި ދައްކަނީ. ޕީއެސްއައިޕީ އަށް 8 ބިލިއަން ޚަރަދު ނުކުރެވުން އެއީ ޤަބޫލުކުރެވޭ ކަމެއް ނޫންމެމްބަރު ޣަފޫރު
ޣަފޫރު ވިދާޅުވީ ހަމައެކަނި ކަންކަންކޮށްދޭނެ ކަމަށް ސަރުކާރުން ބުނުމަކީ މިއަދު ރައްޔިތުން ގަބޫލުކުރާނެ ކަމެއް ނޫން ކަމަށެވެ. ބަޖެޓުގައި ކަންކަން ހިމަނަނީ ދާއިރާގެ މެމްބަރުންގެ ވެސް މަސައްކަތްތަކަކާއި އެކު ކަމަށް ވާއިރު އެ ބަޖެޓަށް ބެލުމެއް ނެތި ސަރުކާރުން ބޭނުންވާހާ ގޮތަކަށް މަޝްރޫއުތައް ކުރިއަށް ގެންދިއުމަކީ ބަލައިގަނެވޭ އުސޫލެއް ނޫން ކަމަށް އޭނާ ވިދާޅުވިއެވެ. މަޖިލީހުގެ ބަޖެޓް ކޮމިޓީގައި ވެސް ހިމެނިވަޑައިގަންނަވާ ޣަފޫރު ވަނީ ފުށިދިއްގަރު ފިޔަވާ، ސަރުކާރުން އެދުނު މަޝްރޫޢޫތައް ބަޖެޓުގައި ހިމަނާފައިވާނެ ކަމަށާއި އެ ބަޖެޓަށް އިޙްތިރާމްކުރަން ވާނެކަމަށް ވިދާޅުވެފައެވެ.
