ރައީސް އަތޮޅު ތެރެއަށް ކުރައްވަނީ ރަސްމީ ދަތުރުފުޅެއް، އެކަމަކު ކުރައްވަނީ މަޖިލިސް އިންތިޚާބުގެ ކެމްޕޭނު!
ރައްޔިތުންގެ މަޖިލީހުގެ އިންތިޚާބު ކައިރިވެފައިވަނިކޮށް، ރައީސް މުއިއްޒު ވަނީ އަތޮޅުތެރޭގެ ރަށްތަކަށް ދަތުރުތަކެއް ކުރައްވަން ފައްޓަވާފައި
ރައީސާއި ނައިބު ރައީސް
މަޖިލިސް އިންތިޚާބުގެ ކެމްޕޭނުގެ އިތުރުން، މަޖިލިސް އިންތިޚާބުގެ ކެންޑިޑޭޓުންނާ ގުޅުންހުރި ވާހަކަތައް ދެއްކެވިނަމަވެސް، ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަތޮޅު ތެރެއަށް ކުރައްވާ ދަތުރުފުޅަކީ ރަސްމީ ދަތުރުފުޅެއް ކަމަށް ރައީސް އޮފީހުން ބުނެފިއެވެ.
ރައްޔިތުންގެ މަޖިލީހުގެ އިންތިޚާބު ކައިރިވެފައިވަނިކޮށް، ރައީސް މުއިއްޒު ވަނީ އަތޮޅުތެރޭގެ ރަށްތަކަށް ދަތުރުތަކެއް ކުރައްވަން ފައްޓަވާފައެވެ. މި ދަތުރުފުޅުތަކުގައި އެމަނިކުފާނު ގެންދަވަނީ ބައެއް އަތޮޅުތަކުގެ ރައްޔިތުންނާއި ކައުންސިލުތަކާ ބައްދަލު ކުރައްވަމުންނެވެ.
ތ އަތޮޅުން ފެއްޓެވި މި ދަތުރުފުޅަކީ ރަސްމީ ދަތުރުފުޅެއް ނަމަވެސް، މި ދަތުރުފުޅުގައި ރައީސް މުއިއްޒު ގެންދަވަނީ މި ސަރުކާރު ދެމެހެއްޓުމަށް މަޖިލިސް އިންތިޚާބު މުހިންމު ކަމަށް ވިދާޅުވެފައެވެ. އަދި މަޖިލިސް އިންތިޚާބާގުޅޭ އިތުރު ވާހަކަތައް ވެސް އެމަނިކުފާނު ދައްކަވާފައިވާއިރު، ބައެއް ރަށްރަށަށް ރައީސް މުއިއްޒު ވަޑައިގަންނަވާއިރު އަރިހުގައި އަންނަ މަޖިލިސް އިންތިޚާބުގައި ޕީއެންސީގެ ފަރާތުން ވާދަކުރައްވާ ކެންޑިޑޭޓު ވެސް ހުންނަވައެވެ.
މީގެ އިތުރުން ބައެއް ރަށްތަކުގައި ހުވަފެނީ ވައުދުތައް ވެސް އެމަނިކުފާނު ގެންދަވަނީ ވެވަޑައިގަންނަވަމުންނެވެ. އެގޮތުން އެ މަޝްރޫއުތައް ހިންގޭނީ މަޖިލިސް އިންތިޚާބުގެ މެޖޯރިޓީ ލިބިގެން ކަމަށް ވެސް ރައީސް މުއިއްޒު ވިދާޅުވެފައިވެއެވެ.
އެހެން ކަމުން މި ދަތުރުފުޅުތައް ރަސްމީ ދަތުރުފުޅުތަކަށް ވާނެ ގޮތަކާމެދު ބައެއް އާންމުން ދަނީ ސުވާލުކުރަމުންނެވެ.
