ރިޓަޔަރވާ ސިވިލްސާވިސް މުވައްޒަފުންނަށް އެލަވަންސް ދިނުމަށް ގާނޫނީ މަސައްކަތްތައް ދަނީ ކުރަމުން: ރައީސް މުއިއްޒު
ރައްޔިތުން މަޖިލިސް ތެރެއިން ފާސްކުރަންޖެހޭ އިސްލާހުތަކެއް ހުންނާނެ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ރައްޔިތުންނާއި ސަލާމް ކުރައްވަނީ
އުމުރުން 55 ވެގެން ރިޓަޔަރވާ ސިވިލްސާވިސް މުވައްޒަފުންނަށް އެލަވަންސް ތައާރަފް ކުރާނެ ކަމަށާއި، އެކަމުގެ ގާނޫނީ މަސައްކަތްތައް ކުރަމުންދާ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އާއްމު ރައްޔިތަކު ދެންނެވި ސުވާލަކަށް ޖަވާބު ދެއްވަމުން ރައީސް މުއިއްޒު ވިދާޅުވީ 55 އަހަރު ވެގެން 65 އަހަރާ ދޭތެރޭގެ ރިޓަޔަރމަންޓް އަށް ދާ ބޭފުޅުންނަށް އެލަވަންސެއް ތަޢާރަފްކުރުމަށް ކުރަންޖެހޭ މަސައްކަތްތައް ކުރަމުންދާ ކަމަށެވެ.
ރައީސް މުއިއްޒު ވިދާޅުވީ އިދާރީ މަސައްކަތް ރައީސް އޮފީހުން ކުރަމުންދާ ކަމަށާއި، މިކަމަށް ގާނޫނުގެ ތެރެއިން މަގުފަހިކުރަންޖެހޭ ކަމަށެވެ. އެގޮތުން މިހާރު ލީގަލް ޓީމުން އެޓަރނީ ޖެނެރަލްއާއި ގުޅިގެން ގާނޫނުގެ މަސައްކަތްތައް ކުރަމުންދާ ކަމަށް ރައީސް މުއިއްޒު ވިދާޅުވިއެވެ. އަދި ވިދާޅުވީ ރައްޔިތުން މަޖިލިސް ތެރެއިން ފާސްކުރަންޖެހޭ އިސްލާހުތަކެއް ހުންނާނެ ކަމަށެވެ.
ރައީސް މުއިއްޒު ވިދާޅުވީ ވައުދުވެވަޑައިގެންނެވި ގޮތަށް އެލަވަންސް ލިބޭނެ ގޮތް ހަދައިދޭނެ ކަމަށާއި، ރައްޔިތުންނަށް ރަނގަޅު ހައްލެއް ހޯދައިދޭނެ ކަމަށެވެ.
