މެއި 6 ޙަމަލާ: ގޮއްވާލި ބޮމުގެ ފިޒިކަލް އެނާލިސިސް ތައްޔާރުކުރި ފަރާތުގެ ހެކިބަސް ނަގައިފި
22 ފެބުރުއަރީ 2024 | ބުރާސްފަތި 07:31ޤައުމީ ސަލާމަތަށް ނުރައްކާވެދާނެ މައުލޫމާތު ހިމެނިދާނެކަމަށް ބަލައި އަޑުއެހުން ކުރިއަށް ގެންދިޔައީ ސިއްރުކޮށްގެން
ރައްޔިތުންގެ މަޖިލީހުގެ ކުރީގެ ރައީސް މުޙައްމަދު ނަޝީދަށް އަމާޒުކޮށް ދިން ޙަމަލާ
ރައްޔިތުންގެ މަޖިލީހުގެ ކުރީގެ ރައީސް މުޙައްމަދު ނަޝީދަށް އަމާޒުކޮށް ދިން ޙަމަލާއާ ގުޅިގެން އުފުލާފައިވާ ދައުވާތަކުގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ޤައުމީ ސަލާމަތަށް ނުރައްކާވެދާނެ މައުލޫމާތު ހިމެނިދާނެކަމަށް ބަލައި ސިއްރުކޮށްގެން ކުރިއަށް ދިޔަ މި އަޑުއެހުމުގައި ވަނީ ދައުލަތުގެ ހެއްކެއްގެ ހެކިބަސް ނަގާފައެވެ. އެއީ މި މައްސަލައާ ގުޅޭ ޙާދިސާގައި ގޮއްވާލި ބޮމުގެ ފިޒިކަލް އެނާލިސިސް ރިޕޯޓު ތައްޔާރުކުރި ފުލުސް އޮފިސަރެވެ.
އަދި ހެކިވެރިޔާ ވަނީ އައި.އީ.ޑީގެ ތަފްސީލުތަކާއި ބާރު ގަދަ ކަމާއި ބެހޭ ގޮތުން ހެކިބަސް ދީފައެވެ.
މި މައްސަލައިގައި ކުރިއަށްވެސް ދައުލަތުގެ ގިނަ ހެކިންގެ ހެކިބަސް ނެގުން އެބައޮތެވެ.
މި މައްސަލައިގައި 29 ނޮވެމްބަރު 2023 ގައިވެސް އަޑުއެހުމެއް ބާއްވާފައިވެއެވެ. އެ ދުވަހުގެ އަޑުއެހުމުގައި 2 ހެއްކެއްގެ ހެކިބަސް ނަގާފައިވެއެވެ.
އޭގެ ތެރޭގައި ހިމެނެނީ ދިވެހި ފުލުހުންގެ ޚިދުމަތުގައި ކްރައިމް ސީން އިންވެސްޓިގޭޝަން އޮފިސަރެއްގެ ގޮތުގައި މަސައްކަތް ކުރައްވަމުންދާ ފަރާތަކާއި، މި މައްސަލައާ ގުޅިގެން ފިޒިކަލް އެގްޒެމިނޭޝަން ރިޕޯޓެއް ތައްޔާރުކޮށްފައިވާ ފަރާތެވެ. އޭނާއަކީ ކުރިން ފުލުހެއްގެ ގޮތުގައި މަސައްކަތް ކުރި ފަރާތެކެވެ.
