ރޯދަ މަހު އިންތިޚާބު ބާއްވަން ސަރުކާރުން ބޭނުންވަނީ ރައްޔިތުންގެ ތާއީދު ގެއްލެމުންދާތީ: ނިޔާޒު
ރާއްޖޭގައި މިހާރު ކަންކަން ވަމުންދާގޮތަށް ބަލާއިރު ވޯޓުލާން ނުނިކުތުމުގެ އާދައެއް އޮތްއިރު ރޯދަ މަހު އިންތިޚާބު ބާއްވާނަމަ ވޯޓުލާން ނިކުންނަ މީހުންގެ އަދަދު މަދުވާނެ
ހުޅުމާލެ ދާއިރާގެ މެމްބަރު އަލީ ނިޔާޒު
ރަމަޟާން މަހު، ރައްޔިތުންގެ މަޖިލީހުގެ އިންތިޚާބު ބާއްވަން މިސަރުކާރުން ބޭނުންވަނީ މިހާރު ކަންތައްތައް ހިނގާގޮތުން ސަރުކާރުގެ ރުހުން ރައްޔިތުންގެ މެދުގައި އޮތް މިންވަރަށް ބަލާއިރު ވީ އެންމެ އަވަހަށް އިންތިޚާބު ބޭއްވުމަކީ ސަރުކާރަށް އޮތް އެންމެ ރަނގަޅު ގޮތްކަމުގައިވާތީކަމަށް ހުޅުމާލެ ދާއިރާގެ އެމްޑީޕީ މެމްބަރ އަލީ ނިޔާޒު ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ނިޔާޒު ވިދާޅުވީ ރާއްޖޭގައި މިހާރު ކަންކަން ވަމުންދާގޮތަށް ބަލާއިރު ވޯޓުލާން ނުނިކުތުމުގެ އާދައެއް އެބަ އޮތްކަމަށެވެ. އެހެން އެކަން އޮއްވާ ރޯދަ މަހު މަޖިލީހުގެ އިންތިޚާބު ބާއްވައިފިނަމަ ވޯޓުލާން ނިކުންނަ މީހުންގެ އަދަދު މަދުވާނެކަމަށް ނިޔާޒު ވިދާޅުވިއެވެ.
އެހެންކަމުން މިކަމަކީ ސަރުކާރަށް މިކަމުން ފައިދާ ވާނެ ކަމެއްގެ ގޮތުގައި ބެލުމުގެ ޖާގަ އެބައޮތްކަމަށް ނިޔާޒު ވިދާޅުވިއެވެ. އެއީ ރައްޔިތުން ސަރުކާރަށް ކުރާ ތާއީދު ދަށްވަމުންދާތީކަމަށް ނިޔާޒު ވިދާޅުވިއެވެ.
މީގެއިތުރުން މަޖިލީސް އިންތިޚާބު ރޯދަމަހުގެ ފަހުން ބާއްވާގޮތަށް ޤާނޫނަށް ގެނައި އިސްލާހު ތަސްދީގުކުރެއްވުމުގައި ރައީސް ލަސްކުރައްވަމުން ގެންދަވާ ގެންދެވުމަކީވެސް އިންތިޚާބާމެދު ރައްޔިތުން ފޫހިކުރުވުމަށް ކުރައްވާ ކަމެއްކަމަށް ނިޔާޒު ވިދާޅުވިއެވެ. އެބިލު ތަސްދީގުކުރައްވަން ބޭނުންފުޅުނުވާނަމަ ބިލު އަނބުރާ މަޖިލީހަށް ފޮނުއްވާލެއްވުމުން ވަގުތު އޮއްވާ ބިލަށް ބަދަލު ގެނައުމުގެ ފުރުސަތު ފަހިވެގެންދާނެކަމަށްވެސް ނިޔާޒު ވިދާޅުވިއެވެ.
ނަމަވެސް ސަރުކާރުން ކަންކުރަނީ އެ ގޮތަށް ނޫންކަމަށާއި މިއީ ޒިންމާދާރުކުޑަ ގޮތެއްގައި ކުރަމުންގެންދާކަމެއްކަމަށް ނިޔާޒު ވިދާޅުވިއެވެ.
