އެންމެންގެ ވެސް އަމާޒަކީ ޖަރުމަނު ލީގާއި، ޗެމްޕިއަންސް ލީގު ކާމިޔާބު ކުރުން: ޑްރީސެން
22 ފެބުރުއަރީ 2024 | ބުރާސްފަތި 00:47އައު ކޯޗެއް ހޯދުމާ ހިސާބަށް ދާއިރު، ކުލަބުގެ ކުޅުންތެރިންނާއި، އިސްވެރިން ސަމާލުކަން ދޭން ޖެހޭ މުހިންމު އެހެން ކަންތައްތަކެއް ވެސް އެބަހުރި
ބަޔާން މިއުނިކްގެ ސީއީއޯ ޑްރީސެން
ބަޔާން މިއުނިކްގެ ކުޅުންތެރިންނާއި، އިސްވެރިންގެ ވެސް އަމާޒަކީ މި ސީޒަންގެ ޖަރުމަނު ލީގު އަދި ޔުއެފާ ޗެމްޕިއަންސް ލީގު ކާމިޔާބު ކުރުން ކަމަށް އެ ކުލަބުގެ ސީއީއޯ ޖޭން ކްރިސްޓިއަން ޑްރީސެން ވިދާޅުވެއްޖެ އެވެ.
އޭނާ މިހެން ވިދާޅުވީ، މި ސީޒަނަށްފަހު ބަޔާންގެ ކޯޗުކަމުން ތޯމަސް ޓުޗެލް ވަކިވާން ނިންމުމާއެކު އެވެ. ބަޔާންގެ އިސްވެރިންނާއި، ޓުޗެލްއާ ދެމެދު މަޝްވަރާ ކުރުމަށްފަހު، އެ ނިންމުން ނިންމީ ދެ ފަރާތް ވެސް އެއްބަސްވާ ގޮތެއްގެ މަތީންނެވެ.
އެކަމާ ގުޅޭ ގޮތުން ވާހަކަ ދައްކަވަމުން ޑްރީސެން ވިދާޅުވީ، ބަޔާންގެ އަމާޒަކީ ކުރިއަށް އޮތް ސީޒަނަށް ރަނގަޅު ކޯޗެއް ހޯދުން ކަމަށެވެ. އަދި ކުލަބުން އެކަންކަމާ ގުޅުން ހުރި ފަރާތްތަކުން އެ މަަސައްކަތް ކުރިއަށް ގެންދާނެ ކަމަށާއި، ކޯޗެއް ހޯދުމުގެ ކުރިން ބަލަން ޖެހޭ އެހެނިހެން ކަންކަން ހުންނާނެ ކަމަށް ވެސް އޭނާ ވިދާޅުވި އެވެ.
މީޣެ އިތުރުން ޑްރީސެން ވިދާޅުވީ އައު ކޯޗެއް ހޯދުމާ ހިސާބަށް ދާއިރު، ކުލަބުގެ ކުޅުންތެރިންނާއި، އިސްވެރިން ސަމާލުކަން ދޭން ޖެހޭ މުހިންމު އެހެން ކަންތައްތަކެއް ވެސް އޮތް ކަމަށެވެ. އެގޮތުން އެންމެ ބޮޑު އިސްކަމެއް ދޭން ޖެހޭނީ ޖަރުމަނު ލީގުގެ ތަށި ދިފާއުކޮށް، އަނެއްކާ ވެސް ލީގު ޗެމްޕިއަންކަން ހޯދުން ކަމަށް އޭނާ ވަނީ ވިދާޅުވި އެވެ. އޭގެ އިތުރުން ޔުއެފާ ޗެމްޕިއަންސް ލީގު ކާމިޔާބު ކުރުމަށް ވެސް ޚާއްސަ ސަމާލުކަމެއް ދޭން ޖެހޭ ކަމުގައި ޑްރީސެން ވަނީ ވިދާޅުވެފަ އެވެ.
މި ސީޒަންގެ ޖަރުމަނު ލީގުގައި މިހާރު ބަޔާންގެ ނަތީޖާ ވަނީ ދަށްވެފަ އެވެ. މިވަގުތު އެ ޓީމު ދެ ވަނައިގައި އޮތްއިރު، އެއް ވަނައިގައި އޮތް ބަޔާ ލެވަކޫސަނާ ދެމެދު އޮތް ފަރަގު ވަނީ އަށް ޕޮއިންޓަށް ފުޅާވެފަ އެވެ. އަނެއްކޮޅުން ޗެމްޕިއަންސް ލީގުގެ ގަދަ 16 ވަނަ ބުރުގެ ފުރަތަމަ ލެގުގައި ލާޒިއޯއާ ދެކޮޅަށް ކުޅުނު މެޗުން ބަލިވެ، ބަޔާން އޮތީ ޕްރެޝަރުގަ އެވެ.
