ތިނަދޫގެ ބައިނަލްއަގުވާމީ ވައިގެ ބަނދަރުގެ މަޝްރޫއު، ދެ އަހަރުގެ ތެރޭގައި ނިންމާނަން: ރައީސް

ގދ. ތިނަދޫގައި ތަރައްގީކުރާ ބައިނަލްއަގުވާމީ އެއާޕޯޓުގެ ބިޔަ މަޝްރޫއު ދެ އަހަރުގެ ތެރޭގައި ނިންމަވާނެ ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެއެވެ.

ދެކުނުގެ ރަށްތަކަށް ރައީސް ކުރައްވަމުން ގެންދަވާ ދަތުރުފުޅުގެ ތެރެއިން ތިނަދޫއަށް ވަޑައިގެން ވަނީ، ބައިނަލްއަގުވާމީ އެއާޕޯޓެއް ގާއިމް ކުރުމަށް ތައިލެންޑްގެ ކުންފުންޏަކާ އެކު ފަހުމްނާމާއެއްގައި ސޮއިކުރައްވާފައެވެ. އެގޮތުން ޖުމްލަ 600 މިލިއަން ޑޮލަރުގެ މި މަޝްރޫއު ހިންގާނީ ތައިލެންޑްގެ ޕޭން ޕެސިފިކް ކުންފުނިން ކަމަށް ވާއިރު، މި މަޝްރޫއަކީ އެ ކުންފުނީގެ އަމިއްލަ ފައިނޭންސިންގައި ކުރިއަށް ގެންދާނެ މަޝްރޫއެކެވެ.

އެގޮތުން އެ މަޝްރޫއާ ގުޅޭ ގޮތުން ވާހަކަ ދައްކަވަމުން ރައީސް މުއިއްޒު ވިދާޅުވީ، އެ މަޝްރޫއާއެކު ސަރުކާރުގެ ތަސައްވުރަކީ ތިނަދޫގައި މިހާރު ހިއްކާފައި އޮތް ބިމާ ގުޅިގެން، މަދުވެގެން އިތުރު 50 ހެކްޓަރުގެ ބިން ހިއްކުމަށް ކަމަށެވެ.

އަދި އެ ބިމާ ގުޅިގެން ހަތަރު ކިލޯމީޓަރުގެ ރަންވޭއެއް ހިމެނޭ ގޮތަށް ބައިނަލްއަގުވާމީ އެއާޕޯޓެއް ގާއިމްކުރައްވާނެ ކަމުގައި ފާހަގަކުރައްވަމުން ރައީސް ވިދާޅުވީ، އެ އެއާޕޯޓް ވާނީ މުޅި ދުނިޔޭގައި ވެސް، އެ އެއާޕޯޓުގެ ރީތިކަން ފާހަގަކުރެވޭ، ލޭންޑްމާކް ޑިޒައިންއެއް ހުރި އެއާޕޯޓަކަށް ކަމަށެވެ. އަދި އެ އެއާޕޯޓުގެ ޓާމިނަލްއަކީ ފެނުގެ މަތީގައި ތަރައްގީ ކުރެވޭ ރަންވޭއަކަށް ވުމާއެކު ވެސް، އެ އެއާޕޯޓުގެ ތަރައްގީ ވާނީ ތިމާވެއްޓާ ރަށްޓެހި ގޮތްތަކުން ތަރައްގީ ކުރެވޭ އެއާޕޯޓަކަށް ވާނެ ކަމަށް ރައީސް ވިދާޅުވިއެވެ.

ތިނަދޫ އެއާޕޯޓާއެކު ސީޕްލޭން ޓާމިނަލް، ފްލައިން ސްކޫލް، އެއާ އެމްބިއުލާންސް ސާވިސް ފެސިލިޓީ، ޑިކޮމްރެޝަން ފެސިލިޓީ ގާއިމް ކުރެވޭނެ ކަމަށް ރައީސް ވިދާޅުވިއެވެ.

މި މަޝްރޫގެ އިތުރަށް، އެއާޕޯޓް މަޝްރޫއުގެ ތެރެއިން ހުވަދު އަތޮޅުގެ 12 ރަށެއްގައި 12 ރިސޯޓް ގާއިމް ކުރެވޭނެ ކަމަށް ވެސް ރައީސް ވިދާޅުވިއެވެ. އެގޮތުން އެއީ 2،408 އެނދު ކަމުގައި ރައީސް ފާހަގަ ކުރެއްވިއެވެ. ރައީސް އިތުރަށް ވިދާޅުވީ އެ މުޅި މަޝްރޫއު، އެންމެ ގިނަވެގެން ދެ އަހަރުގެ ތެރޭގައި ނިންމަވާނެ ކަމަށެވެ.

ތިނަދޫގައި ބައިންއަގުވާމީ އެއާޕޯޓެއް އެޅުމަށް މި ސަރުކާރުން ނިންމާފައިވާއިރު، ތިނަދޫގައި ބައިނަލްއަގުވާމީ އެއާޕޯޓެއް އެޅުމަކީ ރައީސް މުއިއްޒުގެ މެނިފެސްޓޯގައި ނުހިމެނޭ އަދި ވައުދުވެވަޑައިގެންނެވި ކަމެއް ވެސް ނޫނެވެ. އެ ވައުދު ވެވަޑައިގެންނެވީ ކުރީގެ ރައީސް އިބްރާހިމް މުޙައްމަދު ޞާލިޙްއެވެ.

އެހެން ނަމަވެސް މި މަޝްރޫއުއަކީ ތިނަދޫގެ އިތުރުން ދެކުނުގެ ރަށްތަކުގައި ޓޫރިޒަމް ކުރިއަރައި ދިނުމަށް އެހީވެދޭނެ މަޝްރޫއެއް ކަމަށް ސަރުކާރުން ބުނެއެވެ.