ރާއްޖޭގެ ރަށްތަކުގެ މަގު ހެދުމުގެ މަޝްރޫއު މިއަހަރުގެ ފަހު ކޮޅު ފަށާނެ ކަމަށް، ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ވިދާޅުވެއްޖެ އެވެ.

ރައީސް މުޢިއްޒު މިހެން ވިދާޅުވީ ނ އަތޮޅުގެ ރަށްތަކަށް ކުރައްވާ ދަތުރުފުޅުގައި ހޯމަ ދުވަހު އެ އަތޮޅު މާފަރަށް ވަޑައިގެން، އެ ރަށުގެ ރައްޔިތުންނާ ބައްދަލު ކުރައްވައި ވާހަކަ ދައްކަވަމުންނެވެ.

ރައީސް މުޢިއްޒު ވިދާޅުވީ، މަގު ހެދުމަކީ އެމަނިކުފާނު ވެފައިވާ ވައުދެއް ކަމަށެވެ. މާފަރު ހިމެނޭހެން ޖުމުލަ ގޮތެއްގައި ހުރިހާ ރަށެއްގެ މަގު ހެދުމަށް ވައުދުވެފައިވާ ކަމަށް ރައީސް ފާހަގަ ކުރެއްވި އެވެ. މުޅި ރާއްޖޭގައި މަގު ހެދުމުގެ މަޝްރޫއު ފެށުން ތާވަލް ކޮށްފައި ވަނީ މިއަހަރުގެ ފަހު ކޮޅު ފަށަންކަން ފާހަގަ ކުރައްވައި ރައީސް ވިދާޅުވީ، މި އަންނަ އަހަރު ގިނަ ރަށްތަކުގެ މަގު ހެދުމުގެ މަޝްރޫއު ކުރިއަށް ގެންދަން އޮތް ކަމަށެވެ.

މީގެ އިތުރުން ރައީސް މުޢިއްޒު ވިދާޅުވީ މާފަރު އެއާޕޯޓު ރަނގަޅު ފެންވަރުގެ ރަންވޭއަކާ އެކު ހުޅުވިފައި އޮތް ނަމަވެސް، އެ ފެންވަރުގެ ރަންވޭގެ އެއާޕޯޓަކަށް ބޭނުންވާާ ބައިވަރު އެހެން ކަންކަން ވެސް ހުރި ކަމަށެވެ. އެގޮތުން އެންމެ މުހިންމީ އެކަށީގެންވާ ފެންވަރުގެ ޓާމިނަލެއްގެ މަސައްކަތް ކަމަށް ރައީސް ވިދާޅުވި އެވެ.

ނ އަތޮޅުގައި ވަރަށް ގިނަ ރިސޯޓުތައް ހުރުމާއި، އިތުރު އެނދުތަކެއް އިތުރުވުމުގެ މަރުޙަލާގައި ހުރުމާއެކު، ވަރަށް ބޮޑު ފުރުސަތެއް އޮތް ކަމަށް ރައީސް މުޢިއްޒު ވިދާޅުވި އެވެ. އެއާއެކު މާފަރު އެއާޕޯޓުގައި ހުންނަން ޖެހޭ އެހެން ކަންތައްތަކެއް ހުރި ކަމަށް ވެސް ރައީސް ވަނީ ވިދާޅުވެފަ އެވެ.

އެގޮތުން ފަތުރުވެރިން އައުމަށް ފަހު، ފުރުމާ ދޭތެރޭގައި ވަގުތީ ގޮތުން މަޑުކޮށްލަން ތިބޭ ހޮޓަލެއްގެ ވާހަކަ ރައީސް ފާހަގަ ކުރެއްވި އެވެ. އެކަމުގެ އިތުރުން އެއާޕޯޓުގެ ތަރައްޤީ އަށް ވަރަށް ގިނަ އެހެން ކަންކަން ޕްލޭން ކުރަމުން ގެންދާ ކަމަށް ވެސް ރައީސް ވަނީ ވިދާޅުވެފަ އެވެ.

އެ ބައްދަލުވުމުގައި ވާހަކަ ދައްކަވަމުން ރައީސް ވިދާޅުވީ މާފަރުގައި ބޯހިޔާވަހި ކަމުގެ މަޝްރޫއެއް އަންނަ އަހަރު ހިންގަން ޕްލޭން ކޮށްފައިވާ ކަމަށެވެ. އެގޮތުން 2026 ވަނަ އަހަރުގެ ބަޖެޓުގައި ބޯހިޔާވަހި ކަމަށް އެއް ބިލިއަން ރުފިޔާ ކަނޑައަޅާއިރު، ބޯހިޔާވަހި ކަމުގެ މަޝްރޫއު ހިންގާ ރަށް ތަކުގެ ތެރޭގައި މާފަރު ހިމެނޭނެ ކަމަށް ވެސް ވިދާޅުވެފައިވެ އެވެ.

މީގެ އިތުރުން ވެސް މާފަރުގެ ތަރައްޤީ އަށް ޖުމުލަ ގޮތެއްގައި ކުރަން ޖެހޭ މަސައްކަތްތައް ސަރުކާރުން ކުރަމުން ގެންދާނެ ކަމަށާއި، އެ ދަތުރުގެ ބޭނުމަކީ އެ ޔަގީންކަން ދެއްވުމާއި، ކަންކަން ކުރަމުން އަންނަ ގޮތް ހިއްސާ ކުރުން ކަމަށް ވެސް ރައީސް ވިދާޅުވެފައިވެ އެވެ.