އަކްރަމް ވިދާޅުވީ ބައެއްގެ އަތުން ފައިސާ ނަގައިގެން ނަމަވެސް ބަޔަކަށް އެއްޗެއްް ދީފައެއް ނޯންނާނެ ކަމަށް
ޕްލޭނިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް (ވ) ގެދޮރުވެރިޔާ ސްކީމާ ގުޅޭގޮތުން ކޮމިޓީގައި މައުލޫމާތު ދެއްވަނީ
ނިމިދިޔަ ސަރުކާރުން ކުރިއަށް ގެންދިޔަ ގެދޮރުވެރިޔާގެ ސްކީމުގައި ގޯހެއް ހަދާފައި ނޯންނާނެ ކަމަށާއި، ގޯހެއް ހަދާފައި އޮތް ނަމަ އެ ބަޔަކަށް ފިޔަވަޅު އަޅައި، ރައްޔިތުންނަށް އެމީހުންގެ ހައްގުތައް ދިނުމަށް ނިމިދިޔަ ސަރުކާރުގެ ގެދޮރުވެރިކަމާ ބެހޭ ވުޒާރާގެ ސްޓޭޓް ވަޒީރަކަށް ހުންނެވި އަކްރަމް ކަމާލުއްދީން ވިދާޅުވެއްޖެއެވެ.
ހޯމަ ދުވަހު ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމެޓީ އާއި ގައުމީ ތަރައްގީ އާއި ތަރިކައާ ބެހޭ ކޮމެޓީ ގުޅިގެން ބޭއްވި ކޮމެޓީގައި ވާހަކަ ދައްކަވަމުން އަކްރަމް ވިދާޅުވީ، ނިމިދިޔަ ސަރުކާރުން އެ މަސައްކަތް ކުރީ އުސޫލެއް ހަދައި، އެ އުސޫލުގެ މަތިން ކަމަށެވެ.
އެހެން ނަމަވެސް މި ފްލެޓްތަކަށް ޝަރުތު ހަމަނުވާ ކަމަށް އޭސީސީން ކަނޑައަޅާ ކެޓަގަރީތަކަށް ބަލައިގެން ތަހްގީގު ކުރިއަށް ގެންދާނަމަ، 4،000 ގެ އިތުރުން ވެސް ހުރިހާ ފޯމުތަކެއް ވެސް ބަލަން ޖެހޭނެ ކަމަށް އަކްރަމް ވިދާޅުވިއެވެ.
އެގޮތުން އެ ކޮމެޓީގައި އޭސީސީން ވަނީ، ގެދޮރުވެރިޔާގެ ފުރަތަމަ 4،000 ފްލެޓް ލިބޭ މީހުންގެ ތެރެއިން ޝަރުތު ހަމަނުވާ ކަމަށް ކަނޑައެޅި މީހުންގެ ފޯމުތައް 12 ކެޓަގަރީއަކަށް ބަހާލައިފަ އެވެ. އެ ކެޓަގަރީތަކަކީ:
ގެދޮރުވެރިޔާގެ ފްލްޓް ކޮމެޓީގައި ވެސް އިސްކޮށް ހަރަކާތްތެރިވެވަޑައިގެންނެވި އަކްރަމް ވިދާޅުވީ ގެދޮރުވެރިޔާގެ މަޝްރޫއުއަކީ ރައްޔިތުންގެ މަސްލަހަތާ ވަރަށް ބޮޑަށް ގުޅިފައި އޮތް ކަމެއް ކަމަށާއި، އެ މަޝްރޫއުގެ ތެރެއިން ފުރަތަމަ ފެލްޓް ލިބޭ މީހުންނަށް ލިޔުން ވެސް ހަވާލުކޮށްފައިވާ ކަމަށެވެ.
އެހެން ކަމުން ކުރީގެ ސަރުކާރުގެ އެ ނިންމުންތަކަށް އައު ސަރުކާރުން އިޙްތިރާމް ކުރަންވާނެ ކަމަށް އަކްރަމް ވިދާޅުވިއެވެ.
އަކްރަމް ވިދާޅުވީ ގެދޮރުވެރިޔާގެ މި މައްސަލަ ބަލައި ނިމޭއިރު، ރައްޔިތުންނަށް، އެމީހުންގެ ހައްގު ލިބޭނެ ގޮތަކަށް ވާންވާނެ ކަމަށާއި، އެގޮތުން އެ މައްސަލައިގައި ބަޔަކު ގޯސްކޮށް އަމަލުކޮށްފައިވާނަަމަ، އެފަދައިން އަމަލުކުރި ބަޔަކާ މެދު ފިޔަވަޅު އަަޅައި، ރައްޔިތުންނަށް ހައްގުތައް ދިނުމަށް އަކްރަމް އެދިވަޑައިގެންނެވިއެވެ.
އަކްރަމް ވިދާޅުވީ، މި މައްސަލައިގައި ރިޕޯޓެއް ނެރެންވާނީ ދެ ފަރާތުން ތިބެ ވާހަކަ ދައްކެމުގެ އިތުރުން، ރަނގަޅު އިންވެސްޓިގޭޝަނެއް ފުރިހަމަކޮށްގެން ކަމަށެވެ. އަދި އެއާއެކު އަކްރަމް ދެއްވި ޔަގީން ކަމަކީ، އެ މައްސަލައިގައި ގޯހެއް ހަދާފައެއް ނޯންނާނެ ކަމުގެ ޔަގީންކަމެވެ. އެގޮތުން އަކްރަމް ވިދާޅުވީ ބައެއްގެ އަތުން ފައިސާ ނަގައިގެން ނަމަވެސް ބަޔަކަށް އެއްޗެއްް ދީފައެއް ނޯންނާނެ ކަމަށެވެ.
އަކްރަމް އެފަދައިން ވިދާޅުވީ، ގެދޮރުވެރިޔާގެ ފްލެޓްގެ ތެރެއިން، ފުރަތަމަ 4،000 ގެ ލިސްޓުގައި ބޮޑެތި މައްސަލަތަކެއް އުޅޭ ކަމަށް ބުނެ އޭސީސީން ގެދޮރުވެރިކަމާ ބެހޭ ވުޒާރާއަށް ސިޓީއެއް ފޮނުއްވާފައިވަނިކޮށެވެ. އެގޮތުން އެ ލިސްޓުން ޝަރުތު ހަމަވަނީ ގާތްގަޑަކަށް އެންމެ 20 ޕަސެންޓް ފޯމުގައި ކަމަށް އޭސީސީން ބުނެފައިވެއެވެ.
