ވިނަރެސް ކައިރީގައި ނުރައްކާތެރި އެކްސިޑެންޓެއް: ކާރު ދުއްވަން އިން މީހާ ފިލައިފި
އެމީހާ ހޯދުމުގެ މަސައްކަތް ދަނީ ކުރަމުން
އެކްސިޑެންޓްގައި އަނިޔާވި މީހާ އެމްބިއުލެންސަށް އެރުވުމުގެ މަސައްކަތް ކުރަނީ
ވިނަރެސް ފްލެޓުކައިރީގައި ނުރައްކާތެރި އެކްސިޑެންޓެއްގައި ހިނގައި މީހަކަށް ވަރަށް ބޮޑަށް އަނިޔާވެއްޖެއެވެ.
ބުދަ ދުވަހު ފުލުހުން ބުނީ ހުޅުމާލެ ފޭސް-2 ވިނަރެސް ފްލެޓު ކައިރީގައި ނުރައްކާތެރި އެކްސިޑެންޓެއް ހިނގާފައިވާ ކަމަށް މެންދުރު ރިޕޯޓުކޮށްފައިވާ ކަމަށެވެ.
ފުލުހުން ބުނީ ބާރު ސްޕީޑްގައި ދުއްވާފައި ކާރެއް ކޮންޓްރޯލް ނުވެ ގޮސް މަގުގެ އެއްފަރާތުގައި މަޑުކޮށްގެން އިން ސައިކަލެއްގައި ޖެހިގެން މިހާތަނަށް ބެލިބެލުން އެނގިފައިވާ ކަމަށެވެ.
ސައިކަލުގައި އިން ފިރިހެން މީހާއަށް އަނިޔާވެގެން ހުޅުމާލެ ހޮސްޕިޓަލަށް ގެންގޮސް ފަރުވާ ދެމުންދާ ކަމަށް ފުލުހުން ބުނެއެވެ.
މީގެ އިތުރުން ފުލުހުން ބުނީ އެކްސިޑެންޓްގައި ހިމެނޭ ކާރު ދުއްވި މީހާ އެކްސިޑެންޓްވުމުން ފިލާގެން ގޮސްފައިވާ ކަމަށެވެ. އެމީހާ ހޯދުމުގެ މަސައްކަތް ކުރަމުންދާ ކަމަށް ފުލުހުން ބުނެއެވެ.
އެކްސިޑެންޓް ވީޑިއޯ ވަނީ ސޯޝަލް މީޑީއާގައި އާއްމުވެފައެވެ.
ބާރު ސްޕީޑްގައި ކާރު މަގަށް އަޅާއިރު، ކޮންޓްރޯލް ނުވެ ސައިކަލު ދުއްވާލޭނުން ގޮސް މަގުގެ އެއްފަރާތުގައި މަޑުކޮށްގެން އިން ސައިކަލުގައި ވަރަށް ބާރަށް ޖެހެއެވެ. ސައިކަލުގައި އިން މީހާ ވިއްސާގެން ގޮސް ވެއްޓެނީ އެސަރަހައްދުގައި އިން ފިހާރަ ކައިރިއަށެވެ. އަދި ދުވާރު ކައިރީގައި އިންދާފަ އިން ގަސް ވެސް ވިއްސާގެން ދެއެވެ. މީގެ އިތުރުން އެ ސަރަހައްދުގައި ޕާކު ކޮށްފައި އިން އެހެން ސައިކަލަކަށް ވަނީ ގެއްލުން ލިބިފައެވެ.
މަންޒަރު ދުށް މީހަކު ރާއްޖެއެމްވީއަށް ކިޔައި ދިން ގޮތުގައި ސައިކަލުގައި އިން ފިރިހެން މީހާއަށް ވަރަށް ބޮޑަށް އަނިޔާވެފައިވެ އެވެ. ގައިގެ އެތަން މިތަން މަށައިގެން ގޮސްފައިވާއިރު، ދެފައި ވަރަށް ބޮޑަށް ޒަހަމްވެފައިވާ ކަމަށެވެ. އަދި ކާރުގެ ތެރޭގައި 3 ޒުވާން ފިރިހެނުން ތިބި ކަމަށާއި، އެއްވެސް މީހަކަށް އަނިޔާ ނުވާ ކަމަށް އެމީހާ ބުންޏެވެ.
މި އެކްސިޑެންޓާ ގުޅިގެން ބަލަންޖެހޭ ކަންކަން ބަލަމުންދާ ކަމަށް ފުލުހުން ބުނެއެވެ.
