މަޖިލީހުގެ އިންތިޚާބުގެ މެޖޯރިޓީ މިސަރުކާރަށް ލިބިއްޖެނަމަ، ޓެކްސް ބޮޑުކުރާނެ: މެންބަރު ޔައުގޫބް
ރައްޔިތުން މަޖިލީހުގެ އިންތިޚާބުގެ ވޯޓުދޭއިރު ރައްޔިތުން ވަރަށް ބޮޑަށް ވިސްނަންޖެހޭ
ދާންދޫ ދާއިރާގެ މެންބަރު ޔައުގޫބް އަބްދުﷲ
ކުރިއަށް އޮތް ރައްޔިތުން މަޖިލީހުގެ އިންތިޚާބުގެ މެޖޯރިޓީ މިސަރުކާރަށް ލިބިއްޖެނަމަ، ޓެކްސް ބޮޑުކުރާނެ ކަމަށް ދާންދޫ ދާއިރާގެ މެންބަރު ޔައުގޫބް އަބްދުﷲ ވިދާޅުވެއްޖެއެވެ.
ރާއްޖެ ޓީވީގެ ފަލަ ސުރުޚީ ޕްރޮގްރާމުގައި މެންބަރު ޔައުގޫބު ވިދާޅުވީ ކުރިއަށް އޮތް ރައްޔިތުން މަޖިލީހުގެ އިންތިޚާބުގެ ވޯޓުދޭއިރު ރައްޔިތުން ވަރަށް ބޮޑަށް ވިސްނަންޖެހޭ ކަމަށެވެ. މިއަދުގެ ސަރުކާރަށް މަޖިލީހުގެ މެޖޯރިޓީ ލިބިއްޖެކަމުގައިވާނަމަ ރައްޔިތުންނަށް ބޮޑެތި އުދަނގޫތައް ޖެހޭނެ ކަމަށް މެންބަރު ވިދާޅުވިއެވެ.
މެންބަރު ޔައުގޫބު ވިދާޅުވީ މަޖިލީހުގެ މެޖޯރިޓީ ސަރުކާރަށް ލިބިއްޖެނަމަ ސަރުކާރު މުވައްޒަފުންގެ އަދަދު މަދުކޮށް، މުވައްޒަފުންގެ މުސާރަ ކުޑަ ކުރާނެ ކަމަށާއި، އަސަންދަގެ ޚިދުމަތް ލިބޭ މިންގަނޑެއް ކަނޑައަޅައި، ހިފަހައްޓާނެ ކަމަށާއި، ޑޮލަރު ވެސް ހިފަހައްޓާނެ ކަމަށެވެ. މެންބަރު ވިދާޅުވީ ޓެކްސް ބޮޑު ކުރާނެ ކަމެވެ. އެކަމުގެ ސަބަބުން ވިޔަފާރިވެރިންނާއި، ރައްޔިތުންނަށް ބޮޑެތި ގެއްލުންތަކެއް ލިބޭނެކަން މެންބަރު ފާހަގަކުރެއްވިއެވެ.
މެންބަރު ޔައުގޫބު ވިދާޅުވީ މިސަރުކާރުން ޓެކްސް ބޮޑު ކުރުމަށް މަސައްކަތް ކުރަނީ އެފަދަ ހާލަތެއް ކުރިމަތިވެގެން ނޫން ކަމަށެވެ. ކުރީގެ ސަރުކާރުން ޕްލާސްޓިކް ކޮތަޅަށް ޓެކްސް ނެގުމުން އެބޭފުޅުން އިދިކޮޅުގައި ތިއްބައި ފާޑުވިދާޅުވިކަން ފާހަގަކުރައްވައި މެންބަރު ވިދާޅުވީ މިއަދު ސަރުކާރުގައި ތިއްބައި އެކަން ދިފާއުކުރައްވާ ކަމަށެވެ. އަދި މިސަރުކާރުގެ ތިމާވެށީގެ ވަޒީރު ވެސް އެކަމަށް ތާއީދު ކުރެއްވިކަން މެންބަރު ފާހަގަކުރެއްވިއެވެ.
