ތ. ވަންދުއާއި ދ. ހުޅުދެލީގައި ޕޮލިސް ޕޯސްޓު ހުޅުވައި، ފުލުހުން އެ ދެ ރަށުގައި ތިބެގެން ރައްޔިތުންނާ ގާތުން ޚިދުމަތް ދޭންފަށައިފިއެވެ.

ވަންދޫގައި ޕޮލިސް ޕޯސްޓު ހުޅުވުމަށް ބުރާސްފަތި ދުވަހު ހެނދުނު އެ ރަށުގައި ބޭއްވި ރަސްމިއްޔާތުގައި، ޕޯސްޓު ހުޅުއްވައިދެއްވީ ކޮމިޝަނަރ އޮފް ޕޮލިސް އަލީ ޝުޖާއުއާއި ތ އަތޮޅު ކައުންސިލުގެ ރައީސް އަބްދުﷲ ޝަރީފެވެ.

ޕޮލިސް ޕޯސްޓު ހުޅުއްވައިދެއްވައި ކޮމިޝަނަރ އޮފް ޕޮލިސް ދެއްކެވި ވާހަކަފުޅުގައި، ޕޮލިސް ޕޯސްޓެއް ގާއިމުކުރުމުގެ އެންމެ ބޮޑު އެއް ބޭނުމަކީ މަދުން ނަމަވެސް އެރަށުގައި ހިނގާ ކުށްތަކާއި އަލަށް ތައާރަފުވުމަށް ފުރުސަތު އޮތް ކުށްތަކުން އެރަށުގެ މުޖުތަމައު ސަލާމަތްކޮށް، ރައްކާތެރި އަމާން ވެއްޓެއް ގާއިމުކުރުން ކަމަށް ވިދާޅުވިއެވެ. އަދި މީހުން ދިރިއުޅޭ ކޮންމެ ރަށެއްގައި ވެސް ފުލުހުން ގާއިމުވެ ތިބުން މުހިންމުވަނީ މުޖުތަމައުގެ ދާޚިލީ ސަލާމަތާއި ރައްކާތެރިކަމާއި އަމަންއަމާންކަން ދެމެހެއްޓުމަށްޓަކައި ކުރަންޖެހޭ ކަންކަމާއި، ޖިނާއީ ކުށް ކުރުން ހުއްޓުވައި، ގާނޫނު ދެމެހެއްޓުމަށް ކަމުގައި ވިދާޅުވިއެވެ.

ހުޅުދެލީ ޕޮލިސް ޕޯސްޓު ހުޅުވުމަށް ބުރާސްފަތި ދުވަހުގެ މެންދުރު އެ ރަށުގައި ބޭއްވި ރަސްމިއްޔާތުގައި، ޕޮލިސް ޕޯސްޓު ހުޅުއްވައިދެއްވީ ކޮމިޝަނަރ އޮފް ޕޮލިސް އަލީ ޝުޖާއުއާއި ފިއްލަދޫ ކައުންސިލުގެ ނައިބު ރައީސް އިބްރާހީމް ޝިނާޒެވެ.

ހުޅުދެލީ ޕޮލިސް ޕޯސްޓު ހުޅުވައިދެއްވައި ކޮމިޝަނަރ އޮފް ޕޮލިސް ދެއްކެވި ވާހަކަފުޅުގައި، ރާއްޖެއަކީ ތަންމިނަށް ހުޅުވިފައިވާ ގައުމަކަށްވެފައި، ކުށް ދައުރުވުން އެހެން ގައުމުތަކާ އަޅައިބަލާއިރު ހަލުވި ގައުމަކަށް ވީތީ، ރާއްޖޭގެ ކޮންމެ ރަށެއްގައި ވެސް ފުލުހުންގެ ޚިދުމަތް ދިނުން މުހިންމު ކަމަށް ވިދާޅުވިއެވެ. އަދި ދާޚިލީ ކަންކަމާއި ޖިނާއީ ކުށްކުރުން ހުއްޓުވައި، ތަހުގީގުކޮށް ގާނޫނު ތަންފީޒުކުރުމާއި، ގާނޫނު ނެގެހެއްޓުމަށް ބޭނުންވާ ގާނޫނީ ބާރާއި އިޚްތިޔާރު ލިބިފައިވާ ފުލުހުންގެ ޚިދުމަތެއް ފޯރުކޮށްދޭ މަރުކަޒެއް ހުޅުވައި ޚިދުމަތް ދިނުމަށް ފުލުހުންގެ ގާނޫނު ލާޒިމުކުރާކަމަށް ވިދާޅުވިއެވެ.

ވަންދުއާއި ހުޅުދެލީ ޕޮލިސް ޕޮލިސް ޕޯސްޓު ހުޅުވުމަށްފަހު ޕޮލިސް ޕޯސްޓުގައި ގައުމީ ދިދައާއި ފުލުހުންގެ ދިދަ ނަގާފައިވެއެވެ.

ޕޮލިސް ޕޯސްޓު ހުޅުވުމަށް ބޭއްވި ރަސްމިއްޔާތުތަކުގައި، ފުލުހުންގެ އެގްޒެކެޓިވް އޮފިސަރުންނާއި ކޮމިޝަންޑު އޮފިސަރުންނާއި އެހެނިހެން ފުލުހުންގެ އިތުރުން، އެ ރަށްރަށުގެ ކައުންސިލަރުން ބައިވެރިވެވަޑައިގަތެވެ. އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުންނާއި އެހެނިހެން އިދާރާތަކުގެ މުވައްޒަފުން ބައިވެރިވެފައިވެއެވެ.