ކިސްގެ ނަޒަރުގައި ދިވެހި ފުޓްބޯޅައިގެ އަގަކީ ނިއު، ވިކްޓަރީ، ވެލެންސިއާ

ދިވެހި ފުޓްބޯޅަ އަށް ވަރަށް ގިނަ ދުވަހު ހިދުމަތްކޮށްދިން ތަޖުރިބާކާރު ކޯޗު ހަންގޭރީގެ ލާސްލޯ ކިސްގެ ނަޒަރުގައި ދިވެހި ފުޓްބޯޅައިގެ އަގަކީ ނިއުރޭޑިއަންޓާއި ވިކްޓަރީ އާއި ވެލެންސިއާ ކަމަށް އޭނާ ބުނެފި އެވެ.

ހަންގޭރީގައި މިވަގުތު ދިރިއުޅެމުންދާ ކޯޗު މިހެން ބުނީ ދެ ވަނަ ޑިވިޝަނުގައި ކުޅެ އޭނާގެ ކުރީގެ ޓީމު ވިކްޓަރީ ފުރަތަމަ ޑިވިޝަނަށް ކޮލިފައިވުމާ ގުޅިގެން ފޭސްބުކް ކޮމެންޓެއްގަ އެވެ.

ކުރީގެ ކުޅުންތެރިޔާ އަހުމަދު މަރުޒޫގް ދެ ވަނަ ޑިވިޝަނާ ބެހޭ ގޮތުން ފޭސްބުކްގައި ދެއްކި ވާހަކައަށް ކޮމެންޓް ކުރަމުން ކިސް ބުނީ ދިވެހި ފުޓްބޯޅައިގެ ފޯރިގަދަ ކުރެވޭނީ ނިއު އާއި ވިކްޓަރީ އާއި ވެލެންސިއާ ވަރުގަދަ ވެގެން ކަމަށެވެ.

އޭނާ އަކީ ރާއްޖޭގައި މަސައްކަތް ކުރި އެންމެ ކާމިޔާބު އެއް ކޯޗެވެ. އޭނާ ވަނީ ދިވެހި ތިން ޓީމަކަށް ކޯޗުކޮށްދީފަ އެވެ. އެއީ ވެލެންސިއާ އާއި ވިކްޓަރީގެ އިތުރުން ވީބީ އަށެވެ. އޭނާ އެންމެ ފުރަތަމަ މާލެ އައީ 1996 ވަނަ އަހަރު ވެލެންސިއާ އަށެވެ. އޭގެ ފަހުން ދެ ފަހަރެއްގެ މަތީން ވެލެންސިއާ އަށް ކޯޗުކޮށްދީ ގިނަ ތަށިތަކެއް ހޯދައިދިނެވެ. ވެލެންސިއާ ނޫން ޓީމަކުން ކިސް ފުރަތަމަ ފެނުނީ 2008ގައި ވީބީންނެވެ. އޭނާ ވިކްޓަރީ އަށް އައީ 2016 ވަނަ އަހަރު އެ ޓީމު ވަރަށް ބޮޑަށް ހީނަރުވެފައި އޮއްވަ އެވެ.