އަނިޔާގެ ސަބަބުން ކުޅުމާ ދުރުގައި ހުރި، ލިވަޕޫލްގެ ފޯވާޑް މުޙައްމަދު ޞަލާޙު އެ ކުލަބުގެ ފަރިތަކުރުންތަކަށް ނިކުންނަން ފަށައިފި އެވެ.

މިޞްރުގެ ކެޕްޓަންކަން ވެސް ކުރަމުން އަންނަ ޞަލާޙު އަށް އަނިޔާވީ، ދާދި ފަހުން ނިމުނު އެފްރިކާ ކަޕް އޮފް ނޭޝަންސްގައި ކުޅެނިކޮށެވެ. އެ މުބާރާތުގެ ފުރަތަމަ މެޗުގައި މިޞްރުން ގާނާއާ ދެކޮޅަށް ކުޅެނިކޮށް، ޞަލާޙު އަށް ވަނީ އަނިޔާވެފަ އެވެ. އެ އަނިޔާގެ ސަބަބުން، ޞަލާޙު އަށް ވަނީ މުބާރާތުގެ ބާކީ މެޗުތައް ގެއްލިފަ އެވެ. އެއާއެކު މިޞްރަށް ވެސް ވަނީ ބޮޑު ގެއްލުމަކާ ކުރިމަތިލާން ޖެހިފަ އެވެ.

އޭގެ ފަހުން ލިވަޕޫލުން އަންގާރަ ދުވަހު ކުރިއަށް ގެންދިޔަ ފަރިތަކުރުންތަަކަށް ޞަލާޙު ވަނީ ނިކުމެފަ އެވެ. ޞަލާޙު އަށް ލިބުނު އަނިޔާގެ ސަބަބުން ގާތް ގަނޑަކަށް، ހަތަރު ހަފްތާގެ މުއްދަތަކަށް އޭނާ ކުޅުމާ ދުރުގައި ހުންނަން ޖެހިދާނެ ކަމަށް ވެސް އޮތީ ލަފާ ކޮށްފަ އެވެ. ބޭރުގެ މީޑިއާ ތަކުގައި ބުނެފައިވާ ގޮތުން، އަނިޔާގެ ފަހުން ޞަލާޙު ކުރިއަށް ގެންދިޔަ ރިކަވަރީގެ ކަންކަން ވަރަށް ކާމިޔާބެވެ. އެހެންކަމުން، ލިވަޕޫލުން ކުރިއަށް އޮތް ތަނުގައި ކުރިއަށް ގެންދާ ފަރިތަކުރުންތަކުގައި އޭނާ ޤަވާއިދުން ބައިވެރިވާނެ ކަމަށް ވެސް ވަނީ ބުނެފަ އެވެ. ނަމަވެސް، އެންމެ އަވަހަށް ލިވަޕޫލުން ދެން ކުޅޭނެ މެޗުގައި އޭނާ ކުޅޭނެ ކަމެއް ނުވަތަ ނޫން ކަމެއް ޔަގީން ނޫން ކަމަށް ވެސް ބުނެފައިވެ އެވެ.

އެފްރިކަން ކަޕަށް ޞަލާޙު ޤައުމީ ޓީމަށް ދޫކުރަން ޖެހުމުން، ލިވަޕޫލްގެ ކަންބޮޑުވުން އިންތިހާ އަށް އޮތެވެ. އޭގެ ފަހުން އޭނާ އަށް އަނިޔާވީއިރު، ލިވަޕޫލްގެ ކޯޗު ޔާގަން ކްލޮޕް ވަނީ އެކަމުގެ ކަންބޮޑުވުން ވެސް ފާޅުކޮށްފަ އެވެ. ނަމަވެސް، ޞަލާޙު ނެތި ވެސް ލިވަޕޫލުން ވަނީ އެ ޓީމުގެ ރަނގަޅު ނަތީޖާތައް ދަމަހައްޓައިފަ އެވެ. ލިވަޕޫލަށް ދެން އެންމެ އަވަހަށް އޮންނާނީ މި މަހުގެ 17 ވަނަ ދުވަހު ރަށުން ބޭރުގައި ބްރެންޓްފޯޑާ ދެކޮޅަށް ކުޅޭ މެޗެވެ.